Su manga Panduan kanu Datu
31
Nia ba su manga palibasan nu datu a si Limuil a inipamandu nu ina nin a inipasulat lun nu Kadenan2 sa nia panduan nu ina nin sa lekanin na “Dua na manga wata, saki i mimbata sa leka,
seka su wata ku a inibpasad ku kanu Kadenan.
3 Di ka mibped su bagel'engka atawa ka su kakawasan nengka kanu manga babay
a pakabinasa kanu manga datu.
4 Limuil a wata ku, di a benal 'gkaalus kanu manga datu
atawa ka kanu 'gkangaunutan su kainem sa makalangut.
5 Ka amaika malangut su datu na kalipatanan nin su inibpaliugat lun a galebekan
taman sa makapandaya nin su kawagib'u manga miskinan.
6 Nia nu painem kanu makalangut
na su manga pebpaya den enggu su 'gkangalidu i ginawa nin.
7 Na pandaya ka den a silan i minem
ka enggu nilan kalipatanan su kamiskin nilan enggu su kamalasayan nilan.
8 Idtindeg'engka su kawagib'u manga taw a papegkabulugan,
su manga taw a entu a di nilan 'gkagaga pedtindeg i kawagib'in.
9 Na inggulalan nengka su wagib a kapangukum,
idtindeg'engka su kawagib'u manga miskinan enggu su pamakanasisita.”
Su Ula-ula nu Matulanged a Kaluma
10 Sangat i kapasang'in a 'bpangilayn su matulanged a kaluma a babay,
ka malegen pan i alaga nin kanu balaalaga a manga palamata.
11 Masela i salig sa lekanin nu kaluma nin enggu kanu kapegkagaga nin
na di den 'gkulang sekanin ka masela i pakadtabang'u kaluma nin a babay sa lekanin.
12 Na nia nin mambu ipembalas kanu kaluma nin na kapianan
ka di nin penggulan sa mawag sa taman a bibiag pan sekanin.
13 Magapas a benal sa kapangilay nin sa maumbal a ginis
a mapamanay nin.
14 Mana sekanin manga layag'u padagang
ka pakapananggit sekanin sa kauyagan a ganat pan sa mawatan a dalepa.
15 Pebpanay sekanin penggedam
ka 'bpagadilan nin sa makan su sakambinabatan nin
enggu 'bpagenggan nin sa galebekan su manga panunugun nin a babay.
16 Mataw sekanin mamili sa mapia a lupa a mapamasa
enggu 'bpamulan nin sa manga ubas a ebpun kanu napantiali nin.
17 Mategel i kanggalebek'in, mabagel
enggu dili mataw malugat.
18 'Gkailay nin i pakauntung su dagangan nin
enggu apia magabi den na penggalebek pamun sekanin.
19 Sekanin demun i 'bpagumbal kanu manga ginis
a 'bpamanayn nin a mambalegkas.
20 Pedtabangan nin su manga miskinan
enggu su pamakanasisita.
21 Di 'gkalidu i ginawa nin amaika pakauma su katenggaw
kagina aden mangakapal a balegkas a mambalegkas'u sakambinabatan nin.
22 Sekanin bun i 'bpamanay sa ampis'u 'bpagigan nilan,
su manga balegkas'in na mapulu i alaga nin a ginis.
23 Su kaluma nin na 'bpagadatan lu kanu 'bpangukuman
kagina isa bun sekanin kanu 'bpamangukum kanu dalepa.
24-25 Mabagel i tindeg'in a babay, 'bpagadatan sekanin
enggu di 'gkalidu i ginawa nin pantag kanu mangauma pan a timpu.
'Bpangumbal sekanin sa manga balegkas enggu manga sabitan
ka pebpasan nin kanu manga padagang.
26 Su manga kadtalu a 'bpeliu kanu ngali nin na ilemu den langun
enggu su ukit'a kabpamandu nin na aden limu nin.
27 Pedtiakapan nin sa mapia su sakambinabatan nin
ka di a benal sekanin 'bpauk-pauk.
28 Na 'gkapamedta sekanin nu manga wata nin
enggu su kaluma nin
29 sa nia 'gkadtalu nu kaluma nin na “Madakel i matulanged a babay
ugaid'a nalawanan nengka silan langun.”
30 Su kanisan na pakabimban enggu pebpapas bun,
ugaid'a su babay a aden gilek'in kanu Kadenan a Mapulu na mapamedta.
31 Nia dait sa lekanin na pembalasan kanu kapia na penggulan nin
enggu pamedtan sia kanu kadakelan na taw.
Wassalam