Su Sengal sa Kapugi kanu Kadenan
149
Pugin su Kadenan a Mapulu!Edsengalan sekanin sa bagu a sengal,
pugin sekanin sia kanu kapendidilimudan nu manga matidtu a manga taw nin.
2 Enggalaw-galaw kanu a manga taw a Israil sa kanu Minaden sa lekanu;
edsisigalaw kanu a manga wata nu Zion sa kanu Datu nu.
3 Pugi nu su ingala nu Kadenan a Mapulu a unut su kadsasagayan,
edsengalan sekanin sa aden tambul'in enggu palabuni-bunian a kutiapi.
4 Ka su Kadenan a Mapulu na 'gkasuatan nin su manga taw nin;
pembadtugen nin su mababa i muletad'in sa ukit a kapapanaban nin kanilan kanu manga kuntela nilan.
5 Makadsisigalaw su matidtu a manga taw nu Kadenan kanu kinapanaban nilan!
Makadsengal silan sa kagalaw sa apia sia pan silan kanu manga 'bpagigan nilan!
6 Pebpugin nilan sa matanug su Kadenan
a pegkapetan nilan bun su magalang a sundang'ilan
7 a adil sa kasuli kanu manga bangsa a di pedsimba kanu Kadenan
enggu kapedsiksa kanu manga taw nilan.
8 Na adil silan sa kaiket'ilan sa sangkali kanu manga datu nu entu
enggu kasangkali nilan sa putaw kanu 'gkangaunutan nu entu
9 taman sa sugaten nilan sa kawagib a mana bun su nakasulat kanu kitab.
Su entu a kabadtugan na kanu langun nu matidtu a taw nu Kadenan.
Pugin su Kadenan a Mapulu!