Su Kapugi nu Langun nu Inaden nu Kadenan
148
Pugin su Kadenan a Mapulu!Pugin su Kadenan a Mapulu nu langun nu lu sa sulega,
pugin sekanin nu langun na lu sa kawang-kawangan!
2 Pugin sekanin nu langun nu malaikat'in,
pugin sekanin nu langun nu sundalu nin kanu sulega!
3 Pugin sekanin nu senang enggu su ulan-ulan,
pugin sekanin nu langun nu 'bpamedsigay a bitun!
4 Pugin sekanin nu lu kanu ikapitu pangkat'u langit,
pugin sekanin nu manga ig lu kanu kawang-kawangan!
5 Pangeni-ngenin tanu i mapugi nilan su ingala nu Kadenan a Mapulu
ka inaden nin silan langun sa ukit a kinadtalu nin bu.
6 Inibetad'in su manga entu kanu dait a kabetadan nin,
inisugu nin i lu den ba silan taman sa taman.
Na su entu a kasuguan nin na di den a benal madsalin-salin.
7 Pugin su Kadenan a Mapulu nu sia sa dunia,
pugin sekanin nu mangasela a balangiawa kanu lagat taman kanu pused'u lagat,
8 pugin sekanin nu apuy, nu manga ilu enggu namug
taman den kanu mangabagel a sambel.
9 Pugin sekanin nu manga palaw enggu su manga bakulud,
pugin sekanin nu 'bpamangunga a manga kayu enggu su langun na kayu a sidar.
10 Pugin sekanin nu manga talaw a binatang enggu su langun na pangangayamen,
manga malanap-lanap enggu manga papanuk.
11 Pugin sekanin nu manga datu kanu dunia enggu su langun na taw,
su 'gkangaunutan enggu su ped pan a 'bpangulu kanu dunia,
12 su manganguda a mama enggu su manganguda a babay,
maitu bun su manga matua den enggu su manga wata.
13 Pangeni-ngenin tanu i pugin nilan su ingala nu Kadenan a Mapulu
ka su ingala nin bu man i mapulu sa langun.
Na su kabadtugan nin na mapulu pan kanu langit enggu kanu langun nu aden sa dunia.
14 Pinagkabagel'in su manga taw nin
ka enggu su langun nu matidtu a taw nin
a su manga taw a Israil a masupeg sa lekanin na mugi sa lekanin.
Pugin su Kadenan a Mapulu!