Su Kapugi kanu Kadenan sa kanu Kapedtiakap'in kanu Awrusalim
147
Pugin su Kadenan a Mapulu!Ngin den i kapia nin i kadsengal sa pugi kanu Kadenan tanu
ka sangat man i kapia nin su entu, nakadait man sa lekanin i kadsengal lun sa pugi.
2 Su Kadenan a Mapulu i papedtindeg 'bpaluman kanu Israil;
pabpagulin nin su nangabiag a manga taw a Israil.
3 Papegkapian nin su nangalupet i atay nin a manga taw
enggu papegkaulian nin su manga pali nilan.
4 Katawan nin su kadakel'u manga bitun
enggu binedtuan nin sa manga ngala su entu.
5 Su Kadenan tanu a Mapulu na sangat i kabarakat'in enggu kabagel'in,
su katuntay nin na di matengkad.
6 Ipebpulu nin su 'gkangaumis a taw
enggu ibpelusak'in su manga taw a dupang.
7 Edsengalan tanu su Kadenan a Mapulu sa sengal a kadsukul-sukul,
paunin su palabuni-bunian a kutiapi a pugi sa lekanin a Kadenan tanu.
8 'Bpelapaten nin pedtanggub sa gabun su kawang-kawangan
ka pabpagulanan nin su dunia
ka pabpangetun nin su manga utan kanu manga bakulud.
9 'Bpagenggan nin sa makan su manga binatang
enggu su manga pipis'u uwak amaika 'bpamanguliang silan.
10 Dikena nin 'gkasuatan su kuda a mabagel
atawa ka su kalengkas'u kadtatalaguy nu taw.
11 Ka nia man 'gkasuatan nu Kadenan a Mapulu na su taw a magilek sa lekanin
enggu su taw a sia i inam'in kanu sangat a kakalimu nin.
12 Hu Awrusalim, pugi nu su Kadenan a Mapulu!
Hu Zion,a pugi nu su Kadenan nu!
13 Ka papegkabagelen nin su alid'u bengawan nengka,
pebpalihalan nin su manga taw a pegkaleben sa leka.
14 Pebpalilintaden nin su manga dulunan nengka,
papegkausugan ka nin sa mangapia a benal a kauyagan.
15 Na ipedsugu nin u ngin i 'gkalinian nin penggula sia sa dunia,
su kadtalu nin na sakelap mata bu i kapegkauma nin kanu papedtumpan lun.
16 Pebpagulan sekanin sa ilub a manabia ka pan i mana ginis a maputi a nakabelat kanu lupa,
mana aw a nakatagayak.
17 Pebpagulan sekanin sa ilu a mana manganaut a watu,
na dala makatika edtindeg kanu katenggaw nin.
18 Na pedtalu bu sekanin na 'gkatunag den su entu,
papedsanggiupen nin bu su sambel na 'gkatunag den su entu, daka 'bpelanag su ig.
19 Ipebpayag'in su kadtalu nin enggu su manga kasuguan nin taman kanu manga pangitaban nin
sa kanu manga taw a Israil a tupu nu Yakub.
20 Di nin i nia penggulan kanu manga ped a bangsa,
di nilan katawan su manga kasuguan nin.
Pugin su Kadenan a Mapulu!