Kitab Istir
sia kanu Kitab Taurat
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a kitab na makapantag kanu kinapailay nu Kadenan kanu katidtu nin kanu inibpasad'in kanu manga taw a Israil. Apia dala malabit sia su ingala nu Kadenan a Mapulu ugaid'a mailay sia u panun i kinapalipuas'in kanu manga taw a Yahudi kanu nanget a kapegkaibped'ilan pebpatay. Na nia inusal'u Kadenan kanu kinapalipuas'in kanilan na su babay a bedtuan sa Istir. Nanggula su nia kanu timpu a manga pat gatus lagun atawa ka lima gatus lagun unan na kinambata kanu Isa al-Masih.
Na kanu entu ba timpu na nia pendatu kanu siudad a Susa na su Sultan Ahasirus sa dalepa a Pirsia enggu Midia.a Na nia nin kasakupan na magatus enggu duapulu enggu pitu kaprubinsia iganat sa dalepa a India taman kanu dalepa a Itupia. Na aden isa a gay na migkanduli su sultan ka inipailay nin u endaw taman i kapegkagaga nin enggu kakawasa nin. Saleta mambu na su kaluma nin a puteli a bedtuan sa Basti na migkanduli bun a kaped'in su langun nu manga babay sa kanu pendatuan nilan. Na inipatawag'u sultan su puteli ugaid'a pibpalawan sekanin nu puteli tembu sinambian sekanin kanu Istir.
Na isa kanu 'gkangasaligan nu sultan a bedtuan sa Haman a tupu nu Agagb a danden a kuntela nu manga taw a Yahudi i kiugan nin mimatay su langun nu manga taw a Yahudi sabap sa dili sekanin 'bpagadatan nu isa a taw a Yahudi a bedtuan sa Murdikay a wata magali nu Puteli Istir. Na daka sinemupeg su Puteli Istir kanu Sultan Ahasirus ka nangeni sekanin sa tabang sa matebped den su mawag a kahanda ni Haman kanilan, na sinugutan mambu nu sultan su entu. Tembu naaden su kapedsela-sela nilan a bedtuan sa Purim a tanda a inilipuas silan nu Kadenan a Mapulu.