Ikadua a Kitab'u Nabi Samuil
sia kanu Kitab Taurat
Su Ikadua a Samuil na seged'u Ika-isa a Samuil. Su nia na makapantag kanu kapendatu nu Daud sa dalepa a Yahuda taman kanu manga dalepa a sakup'u Israil. Na mailay bun sia su kauget'u kinandatu nin sa dalem'u nakapatpulu lagun apeg'u ukit'u kinandatu nin taman kanu ngin i napagukit-ukitan nin kanu kinandatu nin. Na inibpasad'u Kadenan i su manga muliataw nin i tatap endatu kanu manga taw a Israil.
Na kanu timpu nu kinandatu nin na papembantasen sekanin nu Kadenan a Mapulu kanu kapembunua nin kanu manga tupu nu Saul enggu kanu manga ped pan a manga kuntela nin taman kanu langun nu 'gkagkahanda nin ka sangat man a inikalimu sekanin nu Kadenan a Mapulu.
Nadsinantal bun sia su unga nu kinandusa nu Daud sabap kanu kinadulug'in kanu kaluma nu isa kanu mangategel sa kambunua a sundalu nin. Na apia ka maitu na inikalimu pamun sekanin nu Kadenan kagina kanu kinapatingguma nu Kadenan sa tiuba kanu manga taw a Israil sabap kanu kinandusa nin 'bpaluman na pinupus mangagan nu Kadenan su entu a tiuba asal'a di katimalan matay su manga taw nin a Israil. Mailay sia su kabagel'u salig'u Daud ka apia nakandusa sekanin na nangeni sekanin sa senep sa atay a ampun kanu Kadenan a Mapulu enggu tinalima nin u ngin i kasiksan nu Kadenan a Mapulu sa lekanin sabap kanu kinandusa nin a entu.
Na su uyag-uyag'u Daud na masela a benal a palihala atawa ka nakadtabang'in kanu manga taw kagina sia kanu tupu nin nakanggulalan su kalipuasan nu langun nu taw.