Su Kinapatay nu Saul enggu su manga Wata nin a Mama
31
Na binunu nu manga taw a Pilistin su manga taw a Israil lu kanu palaw nu dalepa a Gilbua. Na madakel i minatay kanu manga taw a Israil taman sa su ped na namakadtatalaguy. 2 Na da silan teleni maneled'u manga taw a Pilistin taman sa nagaus'ilan su Saul enggu su manga wata nin a mama. Na pinangimatayan nilan su manga wata a entu nu Saul a si Jonatan, Abinadab enggu Malkisua. 3 Na sangat a napasangan su Saul kanu entu a kinambunua taman sa nangasugat sekanin na busug enggu napalian sekanin sa tidtu-tidtu. 4 Na nia pidtalu nu Saul kanu 'bpananggit kanu matalem'in na “Bindas ka su sundang'engka ka imatayi aku den ka amaika di aku nengka imatayan na nia mimatay sa laki na su manga taw a di 'bpaginugut kanu Kadenan a Mapulua taman sa panaman aku nilan pan.” Ugaid'a dala i entu paginuguti nu 'bpananggit sa matalem'in kagina nagilekan sekanin tembu su Saul den i minindas kanu sundang'in ka sinandak'in i ginawa nin. 5 Na guna mailay nu 'bpananggit kanu matalem'in i minatay den su Saul na sinandak'in bun i ginawa nin taman sa minatay bun sekanin lu kanu ubay nu Saul. 6 Na kanu entu bun ba a gay na minatay su Saul apeg'u telu kataw a wata nin a mama enggu su 'bpananggit kanu matalem'in taman den kanu manga taw nin a naped'in.7 Na guna katawi nu manga taw a Israil a lu pegkaleben kanu bala nu ligid'u kadatalan nu dalepa a Yisril enggu lu kanu lipag'u lawas'a ig'u Jordan i su manga sundalu nu Israil na namakadtatalaguy silan enggu su kinapatay nu Saul apeg'u manga wata nin a mama na tinagak'ilan su manga dalepa nilan. Na linudepan nu manga taw a Pilistin su manga kawalayan nilan taman sa pigkampuan nilan su entu.
8 Na kanu temundug a gay na linemu su manga taw a Pilistin kanu palaw nu Gilbua ka enggu nilan mapangua su manga aden pamun katagan nin a manga igagama nu namamatay a sundalu nu manga taw a Israil. Na nailay nilan lu su bangkay nu Saul enggu su bangkay nu telu kataw a wata nin. 9 Na pinutukan nilan sa ulu su Saul enggu kinua nilan su manga igagama nin sa kapembunua. Entu pan ka napapait silan sa katigan lu kanu langun nu 'gkangasakupan nu manga taw a Pilistin taman den kanu manga pedsimban kanu pegkakadenanen nilan sa su Saul na minatay den. 10 Na lu nilan inibetad su manga igagama nu Saul sa kapembunua lu kanu pedsimban kanu pegkakadenanen nilan a si Astarti. Na binitin nilan menem su lawas'u Saul lu kanu alad'u dalepa a Bit-San.
11 Ugaid'a guna makauma kanu pakinegan nu manga taw sa Yabis-Giliadb su pinakaidan nu manga taw a Pilistin kanu Saul 12 na su langun nu mangawalaw a pabubunua a mama na linemalag silan kanu nalalamagan taman sa nakauma silan kanu dalepa a Bit-San. Daka kinua nilan su bangkay nu Saul enggu su bangkay nu manga wata nin a mama a lu kanu alad'u dalepa a Bit-San. Na mimbalingan silan sa dalepa a Yabis a init'ilan su bangkay nu Saul enggu su bangkay nu manga wata nin ka lu nilan ba tinutung. 13 Na kinua nilan su manga tulan nu entu ka inilebeng'ilan kanu atag'u kayu a tamaris kanu dalepa a Yabis enggu dala silan pamegkan kanu dalem'u nakapitu gay.
Wassalam