Su Kinapanaled'u Daud kanu manga Taw a Amalik
30
Na nakauma su Daud enggu su manga taw nin kanu ikatelu nin gay kanu dalepa a Siklag. Na saleta sa entu na nalusudan den nu manga taw a Amalik su dalepa a Nigib enggu Siklag taman sa tinutung'ilan su dalepa a Siklag. 2 Na pinangua nilan su langun nu babay enggu su manga wata apeg'u manga matua. Ugaid'a apia sakataw na dala inimatayan nilan ka pinaunut'ilan bu silan mawa lu. 3 Na nailay nu Daud enggu su manga taw nin i natutung den su siudad. Na su manga kaluma nilan apeg'u manga wata nilan na pinangua nu manga kuntela nilan. 4 Na sabap sa entu na namakauliang sa matanug su Daud enggu su manga taw nin taman sa nalubayan silan kanu kinapaguguliang'ilan. 5 Nakua bun su dua kataw a kaluma nu Daud a si Ahinuam a taw sa Yisril enggu si Abigil a balu ni Nabal a taw sa Karmil.6 Na sangat a nalidu i ginawa nu Daud kagina 'gkalipunget a benal su manga taw nin kanu kinakua a entu kanu manga wata nilan taman sa pegkiugan nilan pembalantay sa watu su Daud. Ugaid'a nangadap sekanin kanu Kadenan a Mapulu asal'a 'gkabagel su ginawa nin. 7 Daka nia nin pidtalu kani Abiatar a 'bpangurban a wata ni Ahimilik na “Anggit ka sia su pidsugan a balegkas'u 'bpangurban.” Na pidtapik den mambu ni Abiatar su entu kanu Daud. 8 Daka nangadap su Daud kanu Kadenan a Mapulu sa nia nin pidtalu na “Ngintu, seleden ku su manga linemusud sa lekami? Ngintu, magaus ku silan?” Nia inisumpat'u Kadenan sa lekanin na “Uway, seled ka silan ka magaus'engka man silan enggu makalipuas'engka su manga pinangua nilan a manga taw.”
9-10 Daka ginemanat den su Daud enggu su nem gatus a manga taw nin taman sa nakauma silan kanu lepak'u Bisur. Na migkalidtabun lu ba su dua gatus a manga taw nin kagina 'gkapasangan silan 'bpelipag lu ka 'gkalugat a benal silan. Ugaid'a su Daud enggu su pat gatus a manga taw nin na tinemalus kanu kabpaneled'ilan. 11 Na sia kanu kabpaneled'ilan na nakailay su manga taw nu Daud sa taw a Egypt. Daka pinananggit'ilan su entu kanu Daud taman sa pinakan enggu pinainem'ilan. 12 Na inenggan nilan bun sa ginangu a unga na igus enggu dua akup a ginangu a unga na ubas. Na guna sekanin makakan na migkabagel sekanin. Saleta na su mama a nia na dala makakan enggu dala makainem kanu dalem'u telu gay. 13 Na daka inidsan sekanin nu Daud sa “Entain i mapulu nengka? Endaw ka pegkaleben?” Na nia nin inisumpat na “Taw aku a Egypt enggu ulipen aku nu taw a Amalik. Nakatelu gay aku den sia kagina tinagak aku nu mapulu ku ka dinemalu aku. 14 Na linusudan nami su kalupan a Nigib kanu manga taw a Kirit enggu kanu manga taw a Yahuda taman den kanu kalupan a Nigib a pegkalebenan nu manga tupu nu manga taw a Kalib enggu tinutung'ami bun su dalepa a Siklag.” 15 Na nia pidtalu nu Daud sa lekanin na “Mapakay a unutan kami nengka kanu manga taw a minggula sa entu?” Na nia nin inisumpat na “Uway, unutan ku sekanu amaika idsapa nengka kanu Kadenan i di aku nengka imatayan atawa ka imbalingan lu kanu mapulu ku.”
16 Na guna su maitu na inunutan den nu taw a Egypt su Daud lu kanu manga taw a Amalik. Na nia nilan nauman lu na 'bpamegkan silan enggu 'bpamanginem ka 'bpamenggalaw-galaw silan kagina madakel i nangakua nilan kanu kalupan nu manga taw a Pilistin enggu kanu kalupan nu manga taw a Yahuda. 17 Na guna su maitu na binunu silan nu Daud iganat sa edsukilep taman sa magabi kanu temundug a gay. Na dala nakalipuas kanu manga taw a Amalik nia tabia na su pat gatus kataw a manganguda a migkukuda sa unta. 18 Na nakua nu Daud 'bpaluman su langun nu manga pinangua nu manga taw a Amalik sa kanilan apeg'u dua kataw a kaluma nin. 19 Na dala nakulang kanu langun nu pinangua nu manga taw a Amalik sa kanilan apeg'u manga taw magidsan pan i wata enggu matua ka nakua 'bpaluman nu Daud su langun nu entu. 20 Na pinangua nin bun su manga bili-bili enggu su manga sapi. Na pinauna nu manga taw nu Daud su entu kanu ped pan a pangangayamen. Na nia 'bpamedtalun nu manga taw na “Nia ba i nangakua ni Daud sa kanu kinambunua nin.”
21 Na guna makauma su Daud lu kanu lepak'u Bisur na inalaw silan nu dua gatus a manga taw nin a dala makaunut sabap kanu kinalugat'ilan. Na guna silan maubay nu Daud na sinalam'in silan. 22 Ugaid'a su langun nu dikena mapia i ukit'in enggu dala katagan nin a manga taw nin a nakaunut sa lekanin embunua na nia nilan 'bpamedtalun na “Di silan dait a umunan kanu nangakua tanu kanu manga taw a Amalik kagina dala silan unut sa lekitanu. Na nia nilan bu makua na su manga kaluma nilan enggu su manga wata nilan ka mawa den silan sia.” 23 Ugaid'a nia pidtalu nu Daud na “Manga lusud ku sa tian, di pakasugat i nan, di nu ipedsingit su inenggay nu Kadenan a Mapulu sa lekitanu. Tiniakapan tanu nin enggu tinabangan tanu nin kanu kinataban tanu kanu kuntela tanu a entu a namelusud sa lekitanu. 24 Na dala man makikineg sa lekanu kanu pedtalun nu a nan. Ka nia man dait na kaumunan langun magidsan i migkalidtabun a tinemameng kanu manga igagama enggu su minunut sa kinambunua na isa bu i kaumun lun.” 25 Na iganat kanu entu ba a gay na binaluy nu Daud a atulan su entu kanu manga taw a Israil. Na sampay saguna na ipenggulalan nilan bun su entu.
26 Na guna silan makauma sa Siklag na pinasigkilan nu Daud kanu manga nakua nilan su manga pakat'in a 'gkangaunutan kanu dalepa a Yahuda sa nia nin katigan na “Nia ba su ibpagenggay ku sa lekanu a ebpun kanu nangakua nami kanu manga kuntela nu Kadenan a Mapulu.” 27 Na nia ba a entu pinasigkilan a manga dalepa na su dalepa a Bait-Il, dalepa a Ramut kanu kalupan a Nigib, dalepa a Yatir, 28 dalepa a Arur, dalepa a Sipmut, dalepa a Istimua, 29 dalepa a Rakal, manga dalepa a 'gkangasakupan nu manga taw a Yiramil, manga dalepa a 'gkangasakupan nu manga taw a Kin, 30 dalepa a Hurma, dalepa a Bur-Asan, dalepa a Atak, 31 dalepa a Hibrun enggu kanu ped pan a dalepa a nabpawangan nilan kanu kabpamagena nilan.