Kitab Rut
sia kanu Kitab Taurat
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Dikena langun nu 'bpamalitiala kanu Kadenan na nakakineg den pantag kanu Muabitis a babay a bedtuan sa Rut. Na katawan nami i paidu bu sa lekitanu i nakabatia kanu kitab pantag kanu nia a babay.
Na sabap kanu limu nu Kadenan sa lekitanu na migkahanda sekanin sa makasalin nami su tudtulan kanu Rut sa basa a Maguindanaon. Su nia a tudtulan na sia nakadalem kanu Danden a Kitab a nakasulat sa basa a Hibru. Kagina ka madakel sa lekitanu i dili mataw matia sa basa a Hibru na inisalin nami sa basa a Maguindanaon su nia a tudtulan ka enggu tanu katuntayan sa mapia su ukit'u Kadenan enggu su manga pinggula nin kanu entu a timpu.
Su dalem'u nia a kitab na nanggula kanu samuk a timpu nu 'Bpamangukum. Silan ba a entu su kinemamal kanu Israil kanu timpu a da pan datu nu entu a dalepa. Na su babay ba a nia a si Rut a ganat sa dalepa a Muab na nakagkaluma sa mama a Yahudi a ganat kanu dalepa a Israil. Guna matay su kaluma nin na inipailay ni Rut su senep sa atay a kinakalimu nin kanu panugangan nin a si Nuimi enggu su senep sa atay a kinasalig'in kanu tidtu a Kadenan a pedsimban nu manga taw sa Israil. Daka nakagkaluma sekanin 'bpaluman sa mama a bedtuan sa Buas a ganat bun kanu maginged'u kaluma nin a minatay. Nakambata silan sa wata a mama a nabaluy a katupuan nu Daud (Nabi Daud). Na su Daud na nabaluy a Sultan sa Israil.
Aden bun kitab pantag kanu 'Bpamangukum na inipailay sia ba su kapasang enggu kamalasayan sabap kanu kinataligkud'u manga taw nu Israil kanu Kadenan. Sia menem kanu dalem'u kitab'u Rut na inipailay menem u panun i kinapalihala kanu isa a babay a lapu a tinemalima kanu Kadenan nu manga taw nu Israil sa senep sa atay nin taman sa nakalusud sekanin kanu pinamili nu Kadenan a manga taw nin.
Na nia mauli sia na mangeni-ngeni tanu kanu Kadenan sa edsisinggumanan nin su lidseki nin ka enggu tanu katuntayan sa mapia su manga ukit'in.
Edsukul-sukul kami kanu apia entain i enggihad matia kanu nia ba a libelu pantag kanu Rut.
Palihalan tanu nu Kadenan kanu kabatia sa nia ba a tudtulan. Pangeni-ngenin tanu bun i tabangan tanu nin sa mailay su guna-guna nu nia ba a kapaganadan taman sa makapamandu kanu muliataw tanu.