Rut 1

Kitab Rut

sia kanu Kitab Taurat

Kanu timpu a nia pan 'bpamegkamal na su 'bpamangukum lu sa bangsa na Israil na aden nakatingguma a masela a kinanggutem. Daka aden isa a mama a taw sa Bitlihim a sakup'a Yudia i linemu sa bangsa na Muab a ped'in su kaluma nin enggu su dua kataw a manga wata nilan a mama ka lu pan silan migkakaleben.2 Nia ngala nu entu a mama na si Ilimilik enggu su kaluma nin na si Nuimi. Na su dua kataw menem a manga wata nilan na si Malun enggu si Kiliun. Tupu silan nu Iprat a taw sa Bitlihim a sakup'u Yudia.

Kanu kapegkakaleben nilan lu sa Muab na 3 minatay si Ilimilik. Na nia bu nasama na si Nuimi enggu su dua kataw a manga wata nin a mama. 4 Na nakagkaluma silan sa babay na Muab a bedtuan sa Urpa enggu Rut. Kanu dalem'u nakasapulu lagun a kapegkakaleben nilan lu 5 na minatay menem si Malun enggu si Kiliun. Kagina ka maitu na nia bun den nasama na si Nuimi ka da den kaluma nin enggu wata nin.

Su Kinauli ni Nuimi sa Bitlihim a Kaped'in si Rut

6 Guna makineg'i Nuimi i pinambalilidseki nu Kadenan sa mapia a masabpet su manga taw lu kanu dalepa a Yudia, na nagadil sekanin sa kaganat'in sa Muab a ped'in su manga mamanugang lun. 7 Na ginemanat den silan 'bpawang sa Yudia ugaid'a sia kanu kabpelalakaw nilan 8 na nia pidtalu ni Nuimi kanu manga mamanugang lun na “Nia mapia na embalingan kanu den kanu pegkalebenan nu manga ina nu ka pangeni-ngenin ku kanu Kadenan i ikalimu kanu nin sa mana bun su kinakalimu nu sa laki enggu kanu manga wata ku a minatay den. 9 Na pangeni-ngenin ku bun kanu Kadenan i pagkaluman kanu nin 'bpaluman ka enggu aden makatuludu sa lekanu.”

Daka sinium den silan ni Nuimi sa ukit a kabpagetaw nin den kanilan. Ugaid'a namanguliang silan sa matanug 10 taman sa nia pidtalu nu manga mamanugang lun na “Di nami seka tagaken, munut kami sa leka lu kanu maginged'engka.”

11 Ugaid'a nia inisumpat'i Nuimi na “Nia mapia na embalingan kanu den. Dua na manga wata ku, ngintu ka 'bpagunut kanu sa laki? Ngin i kataw nu lun, embata aku pamun sa manga wata a mama asal'a mapangaluma nu? 12 Pamanguli kanu den ka di aku den man makagkaluma ka matua aku den. Apia nia ku lun basan i makagkaluma aku pan sa saguna bun ba a nia a magabi enggu makambata aku sa manga wata a mama 13 na di kanu man makatigkel sa di kanu makagkaluma sa ped taman a kagkasela nilan. Mapait a benal i inipananam'u Kadenan sa laki kumin sa lekanu.” 14 Na namanguliang menem silan. Daka sinium'i Urpa su panugangan nin ka nagetaw entu pan ka minuli sekanin ugaid'a si Rut na sinegedan nin si Nuimi ka initegel'in i ginawa nin sa kagkalidtabun nin.

15 Daka pidtaluan ni Nuimi sekanin sa “Ilay ka Rut, su idas'engka na minuli den lu kanu maginged'in enggu kanu pegkakadenanen nin na tundug ka den sa lekanin muli.”

16 Ugaid'a nia inisumpat'i Rut na “Di aku nengka den pedsapali. Suguti aku den sa kaunut ku sa leka. Apia endaw ka mangay na lu aku bun ba mangay. Endaw ka 'gkaleben na lu aku bun ba. Su maginged'engka na mabaluy bun a maginged ku taman sa su Kadenan nengka na mabaluy a Kadenan ku. 17 Ka u endaw ka matay na lu aku bun ba matay taman sa lu aku den ba makalebeng. Na idsapa ku i tiuban aku nu Kadenan amaika pitasen ku pan seka nia tabia na su kapatay i mapabpitas sa lekita.”

18 Na guna katawi ni Nuimi i senep sa atay ni Rut su kabpagunut'in na da den mambu sekanin edtalu.

19 Na tinemalus den silan lemalakaw taman sa nakauma den silan sa Bitlihim. Na kanu kinauma nilan na langun nu taw na nakakedu i ginawa nilan taman sa nakapamagidsaya su manga babay sa “Kena ba si Nuimi i nan?”

20 Na nia pidtalu ni Nuimi na “Di aku nu den pembedtui sa Nuimi ka nia nu den ibedtu sa laki na Mara kagina su Barakat sa Langun na inipatala nin sa laki su sangat i kapait'in. 21 Na kanu kinaganat ku sia na pakasesengaw aku ugaid'a guna aku pambalingana nu Kadenan sia na nakalusak aku den. Na ngintu ka pembedtuan aku nu pan sa Nuimi inunta na tinaligkudan aku nu Kadenan taman sa pinatala aku nin sa kamalasayan?”

22 Na maitu ba i nanggula kanu kinambalingan ni Nuimi ebpun sa Muab a kaped'in su mamanugang lun a si Rut a taw sa Muab. Kanu kinauma nilan lu sa Bitlihim na 'bpagebpunan pedsabpet su bantad a barli.