Su Kinapanulabet'i Rut lu kanu Inawidan ni Buas
2
Na aden kawasa enggu badtug a mama a bedtuan sa Buas. Nabpagali sekanin ni Nuimi sia kanu kaluma nin a si Ilimilik.2 Kanu isa a gay na nia pidtalu ni Rut kani Nuimi na “Suguti aku nengka pan sa kalu ku kanu 'bpangangawidan ka enggu aku makapanulabet lu kanu 'gkaganatan nu apia entain i semugut sa laki.” Daka nia inisumpat'i Nuimi na “Mapia i entu dua na manga wata. Lu ka den.”
3 Kagina ka maitu na linemu den si Rut kanu 'bpagaganian ka enggu makapanulabet kanu 'gkangatagak'u 'bpamangumpay. Daka nia nin napanulabetan na su 'bpangangawidan ni Buas a pagali ni Ilimilik.
4 Na nakauma mambu si Buas a ebpun sa Bitlihim enggu sinalam'in su manga 'bpamagagani sa “Palihalan kanu nu Kadenan.”
Na sinumpatan nilan sa “Palihalan ka bun nu Kadenan.”
5 Daka nia nakaidsa ni Buas kanu 'gkasaligan nin na “Entain i babay a nan?”
6 Na nia inisawal'u 'gkasaligan nin na “Sekanin su babay sa Muab a minunut kani Nuimi kanu kinauli nin sia. 7 Nagetaw sekanin sa laki kagina mapita sa kapanulabet'in na sinugutan ku mambu sekanin. Na nan pamun i kinasilung'in.”
8 Guna su maitu na inubay ni Buas si Rut ka nia nin lun pidtalu na “Bai, pakikineg aku nengka. Da ka den 'bpanulabet lu kanu ped a inawidan ka sia ka den ba edtatanggunut kanu manga babay a 'bpamenggalebek sa laki. 9 Nia ka bu ilay na u endaw silan 'bpamangumpay ka lu ka den ba edtatanggunut. Inidtakena ku den kanu manganguda ku a mama i di ka nilan samuken. Amaika kamalan ka menem na kua ka sa mainem'engka lu kanu binangga a pinanageban nu manga mama.”
10 Na guna makineg'i Rut i entu na sinemugiud sekanin kanu lupa taman sa nia nin pidtalu na “Ngintu ka ipegkalimu aku nengka inunta na lapu aku bu sia?”
11 Na nia inisawal'i Buas sa lekanin na “Katawan ku den su langun na kinakalimu nengka kanu panugangan nengka iganat den kanu kinapatay nu kaluma nengka. Na katawan ku bun i da nengka lilingaya temagak su manga lukes'engka enggu su dalepa nengka ka sia ka mindalepa kanu dala demun katawan nengka lun. 12 Na balasan ka nu Kadenan a pedsimban nu manga taw sa Israil kanu pinggula nengka a entu taman sa matalutup su balas'in sa leka ka sinaligan nengka sekanin a makapangelung.”
13 Daka nia inisumpat'i Rut na “Hu datu na sangat i kapia na palangay nengka sa laki. Na pinagkabagel'engka su ginawa ku kanu kananaw nu kadtalu nengka sa laki, sa apia da aku makalepeng kanu manga babay a 'bpamenggalebek sa leka.”
14 Guna mauma su kutika na kabpemaudtu na tinawag'i Buas si Rut sa “Bai, ubay ka sia ka kua ka sa pan a nia a makasudsak kanu pagasam.” Daka minayan den sekanin kanu ubay nu manga 'bpamenggalebek taman sa dinualan sekanin ni Buas sa sinendag a bantad. Na midtantu mambu keman si Rut enggu aden pan nasama nin.
15 Na guna menem sekanin embalingan manulabet na pinanutuman ni Buas su manga 'bpamenggalebek lun sa “Padtaday nu den sekanin kanu kabpamundut'in apia san pan kanu ubay nu manga pinanguyun na di nu den pedsapali. 16 Nia pan mula na makin nu pan sekanin panagaki sa manga tiugkayan na bantad a barli ka enggu aden mapamundut'in.”
17 Na taman sa edsukilep i kinapanulabet'i Rut lu kanu inawidan. Na guna nin penggunua su napanulabet'in na manga pat kasupa. 18 Entu pan na pinananggit'in ka minuli sekanin enggu inipailay nin kanu panugangan nin su kadakel'u nakua nin a bantad a barli. Na inenggay nin bun sa lekanin su nasama nin keman.
19 Na nia inidsa ni Nuimi sa lekanin na “Endaw ka tampal nanulabet sa bantad a barli kagina? Entain i kigkuan kanu inawidan a pinanulabetan nengka? Palihalan nu Kadenan su kigkuan kanu inawidan a napapanulabet sa leka!”
Saleta na pidsinantal'i Rut kanu panugangan nin u endaw sekanin nanulabet. Na nia nin pidtalu na “Su kigkuan kanu inawidan a pinanulabetan ku na bedtuan sa Buas.”
20 Na nia nadtalu ni Nuimi kanu mamanugang lun na “Palihalan sekanin nu Kadenan a di pakalipat kanu limu nin magidsan pan i bibiag udi na minatay.” Na nia nin pan pidtalu kani Rut na “Masupeg a benal i kinabpagali ta kanu mama a entu. Isa sekanin a wagib a mangauna enggu makatuludu sa lekita a nangabalu.”
21 Daka nia pamun pidtalu ni Rut na “Nia pan liu san na pidtaluan aku nin sa lu aku demun kun manulabet a kaped'u 'bpamenggalebek sa lekanin taman a di matebas su kapedsabpet.”
22 Nia pamun inisawal'i Nuimi na “Mapia i entu dua na manga wata i lu ka demun panulabet a maped'u manga babay a 'bpamenggalebek kani Buas ka basi aden pan makagkaid sa leka u lu ka pan mangay kanu ped a inawidan.”
23 Kagina ka maitu na lu den nanulabet si Rut a kaped'u manga 'bpamenggalebek kanu inawidan ni Buas taman sa kinasabpet kanu bantad a barli. Daka nanulabet bun sekanin kanu kinasabpet sa bantad. Mandiadi na lu bun sekanin pegkakaleben kanu panugangan nin.