Su Kinaliu
sia kanu Kitab Taurat
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a kitab na makapantag kanu Kinaliu atawa ka su kinapambaya-baya nu Kadenan a Mapulu kanu manga taw a Israil a manga tupu nu Nabi Yakub ebpun kanu kinapangungulipen kanilan nu Piraun a datu nu Egypt. Na su nia a nanggula na manga sangibu enggu dua gatus lagun unan nu kinambata kanu Isa al-Masih. Na su Nabi Musa i inusal'u Kadenan sa kinapangaden kanu Kitab Taurat.
Na namakapat gatus lagun i kinagkakaleben nu manga taw a Israil kanu dalepa a Egypt. Na su Musa enggu su Harun i inusal'u Kadenan kanu kinapambaya-baya nin kanu manga taw a Israil sia nakanggulalan kanu manga tanda a kagaipan enggu kanu manga tiuba a inisiksa nu Kadenan kanu manga taw a Egypt a mana su kinadsisi nu lagat enggu su ped pan a manga tiuba asal'a makapailay nu Kadenan su kapegkagaga nin.
Sia kanu kabpelalakaw nilan 'bpawang kanu dalepa a inibpasad'u Kadenan a ipebpusaka nin sa kanilan na mimbuku enggu sinemungkang silan kanu Kadenan ugaid'a dalem ka maitu na lalayun bun silan pedtapiden nu Kadenan. Na sangat a inikalimu nu Kadenan su manga taw a Israil ka sia kanu kapegkapasang kanilan na tinulunan silan nu Kadenan sa makan enggu mainem apia nia nin kaaden i tatap silan pedsungkang kanu Kadenan.
Na mailay bun sia su kinaenggay nu Kadenan kanu Sapulu a Kasuguan lu kanu palaw sa Sinai. Nakadalem bun sia ba su manga atulan nu Kadenan makapantag kanu kaumbal'ilan kanu Balung-balung a Tuleda a 'Bpangadapan kanu Kadenan apeg den nu ukit'u kapegkurban nilan enggu su manga ped pan a atulan kanu kabpangadap sa lekanin a Kadenan.
Na ulian nu entu na nia kahanda nu Kadenan kanu langun nu nia ba na masimba sekanin nu manga taw taman sa maguyag-uyag silan sia luyud kanu kahanda nu Kadenan.