Su Manga Awal
sia kanu Kitab Taurat
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Palihala enggu kalilintad sa lekanu a manga lusud'ami sa tian. Katawan nami i balapantag a benal sa lekitanu a manga Maguindanaon i katuntayan su apia ngin a nakadalem kanu Kitab, labi-labi den su tudtulan pantag kanu kinapangaden sa dunia. Sia kanu ilemu nu mangatua na madakel i nangakineg tanu a tudtulan makapantag kanu kinapangaden nu Kadenan sa dunia. Na tembu pigkahanda nu Kadenan i makasalin su Kitab a sinulatan makapantag kanu tudtulan nu ‘Manga Awal’ ka enggu tanu mabatia taman sa kasabutan sa mapia su tidtu-tidtu a kahanda nu Kadenan enggu su ukit'u kinapangaden nin sa dunia. Nia sinemulat kanu Kitab'u Manga Awal na su Nabi Musa sia nakanggulalan kanu kabarakat'u Kadenan. Su kadtalu sa English a ‘Genesis’ na ebpun sa basa a Grik a ‘Geneseos’ a sia sa basa a Maguindanaon na ‘Manga Awal’ enggu nia nin maena sa lekitanu na su punan-punan nu dunia taman den kanu langun nu namakadalem lun.
Su Libelu nu Manga Awal na inebad sa dua timan. Na gemanat sa Manga Awal 1 taman sa Manga Awal 11 ayat 26 na makapantag kanu kinapangaden kanu dunia enggu su kinalimbag kanu muna-muna a taw a mana su Adam. Sia ba namakadalem su tudtulan makapantag kanu Adam enggu su kaluma nin a su Siti Hawa, su makapantag kanu edsuled a si Kabil enggu si Habil, su makapantag kanu Nuh enggu su kinadsanaw nu dunia maitu bun su tudtulan makapantag kanu Tantawan a binedtuan sa Babil.
Na iganat menem sa Manga Awal 11 ayat 27 taman sa Manga Awal 50 ayat 26 na makapantag kanu katupuan nu bangsa na Israil a pinamili nu Kadenan enggu makapantag bun kanu manga pasad'u Kadenan. Nia gaid muna-muna sia ba na su pantag kanu kinapamili enggu su kinasugu nu Kadenan kanu Ibrahim a ginelalan sa Ama nu langun nu 'bpamalitiala. Na entu pan ka su tudtulan makapantag kanu wata nin a su Iskak enggu su apu nin a su Yakub. Ugaid'a sinambian nu Kadenan su ngala nu Yakub sa Israil kagina inatuan nin taman sa tinalaw nin edsigi su Kadenan (Manga Awal 32 ayat 28). Na su sapulu enggu dua a manga wata nu Israil i nabaluy a palaus'u bangsa a Israil.
Nia kahanda nu sinemulat kanu nia ba a Kitab na asal'a kasabutan tanu sa mapia u ngin ba su ula-ula nu Kadenan. Mabatia sia ba kanu libelu nu Manga Awal i pigkahanda nu Kadenan i mangaden sekanin sa taw ka enggu nin kapangungundayan su langun nu pinangaden. Nia nin kahanda na maguyag-uyag su taw a idtagapeda nin su Kadenan sa ukit a kapaginugut, kasimba enggu kapugi kanu kaisa-isa nin a Kadenan. Inenggan nu Kadenan su taw sa baya-baya ugaid'a nia nin lun bu pinangeni na paginugutan sekanin sa senep sa atay. Na guna makambaladusa su taw na inipayag'u Kadenan i saben-sabenal a sekanin bu i makagaga gemagas enggu mampun kanu dusa (Manga Awal 3 ayat 21). Nakadalem sia ba kanu libelu nu Manga Awal i saben-sabenal a di magaga nu taw gemagas su dusa nin (Manga Awal 3 ayat 7). Papedtuntayan bun nu nia ba a Kitab i balapantag a benal kanu Kadenan su paginugut enggu su salig'u taw sa lekanin. Da makaamung kanu kinadsanaw nu dunia su Nuh sabap kanu paginugut enggu salig'in kanu Kadenan (Manga Awal 6 ayat 7 taman sa ayat 9). Natalima nu Ibrahim su manga pasad'u Kadenan sabap kanu kinapaginugut'in enggu kanu salig'in (Manga Awal 15 ayat 1 taman sa ayat 6, enggu Manga Awal 22 ayat 16 taman sa ayat 18). Na iganat sia ba kanu tudtulan nu Ibrahim na ipebpagilay nu Kadenan su ukit a kinatuman nin kanu langun na manga pasad'in kanu Ibrahim taman sa nakatindeg su bangsa na Israil a su pinamili nu Kadenan. Nia ba su masela a kahanda nu Kadenan na makapangaden sekanin sa bangsa a maginugut, semimba enggu mugi sa lekanin taman sa sia ba makanggulalan kanu bangsa a nia na kapalihalan su langun na taw sia sa liwawaw na dunia.
Na bagu tanu batian su nia ba a Kitab na mangeni-ngeni tanu kanu Kadenan sa tabangan tanu nin a katuntayan sa mapia su nakadalem kanu libelu nu Manga Awal a inisulat'u Musa.