Su Manga Awal
sia kanu Kitab Taurat
Su Punan-punan
1
Na sia kanu punan-punan na pinangaden nu Kadenan su langit enggu lupa. 2 Na kanu entu na da pan palas'u dunia, da pan dalem'in enggu nabausan pamun nu malibuteng su kaludan ugaid'a 'bpamagatag-ataga kanu liwawaw nu ig su Ruhb nu Kadenan.3 Na nia pidtalu nu Kadenan na “Maaden su maliwanag” na naaden su maliwanag. 4 Daka nailay nu Kadenan i mapia su maliwanag. Na inipitas'in su maliwanag ebpun kanu malibuteng. 5 Na nia nin inibedtu kanu maliwanag na malamag enggu nia nin menem inibedtu kanu malibuteng na magabi. Na sinemagad su magabi enggu nakauma su mapita na entu ba su muna-muna a gay.
6 Na nia pidtalu nu Kadenan na “Maaden su pageletanc kanu ig ka enggu makadsenggaya su entu.” 7 Na naaden su entu. Maitu ba i kinapangaden nu Kadenan kanu pageletan. Na pinadsenggaya nin su ig a tampal sa baba kanu ig a tampal sa pulu. 8 Nia inibedtu nu Kadenan kanu pageletan na kawang-kawangan. Daka sinemagad su magabi enggu nakauma menem su mapita na entu ba su ikadua a gay.
9 Na nia pidtalu nu Kadenan na “Endidilimuda su ig sa kababan nu kawang-kawangan enggu embuat menem su mamala a lupa.” Na naaden su entu. 10 Na nia inibedtu nu Kadenan kanu mamala a lupa na kalupan enggu nia nin menem inibedtu kanu ig a nangalimud na lagat. Daka nailay nu Kadenan i mapia su entu. 11 Na nia pidtalu nu Kadenan na “Mapaetu su kalupan sa uman i embalangan na 'bpamangetu sia sa liwawaw na dunia a mana su pamulan a mapaguni enggu su langun nu 'bpamangunga a aden lagas'in.” Na naaden su langun nu entu. 12 Na namangetu kanu kalupan su langun nu 'bpamangetu sia sa liwawaw na dunia a mana su pamulan a mapaguni enggu su langun nu 'bpamangunga a aden lagas'in. Na nailay nu Kadenan i mapia su entu. 13 Daka sinemagad su magabi enggu nakauma menem su mapita na entu ba su ikatelu a gay.
14 Na nia pidtalu nu Kadenan na “Maaden lu kanu kawang-kawangan su manga pakatayawd asal'a makadsenggaya su malamag enggu su magabi. Na nia bun ba i maumbal a tanda kanu manga timpu, kanu manga gay enggu kanu manga lagun. 15 Na su manga pakatayaw lu kanu kawang-kawangan na entu ba i makatayaw kanu liwawaw na dunia.” Na naaden su langun nu entu. 16 Na maitu ba i kinalimbag'u Kadenan kanu dua timan a masela a pakatayaw enggu su manga bitun. Na su pakasulalang i katayaw i pakapagkatayawe kanu kagagabian enggu su malubay menem i katayaw i pakapagkaliwanagf kanu kalalamagan. 17 Na inibetad'u Kadenan su entu lu kanu kawang-kawangan ka enggu nin 'gkatayawan su dunia, 18 makapagkaliwanag kanu malamag enggu kanu magabi enggu makapadsenggaya kanu maliwanag enggu kanu malibuteng. Daka nailay nu Kadenan i mapia su entu. 19 Na sinemagad su magabi enggu nakauma menem su mapita na entu ba su ikapat a gay.
20 Na nia pidtalu nu Kadenan na “Maaden kanu ig su langun na embalangan na balangiawa sa ig enggu maaden bun su manga papanuk lu kanu kawang-kawangan.” 21 Na maitu ba i kinapangaden nu Kadenan kanu mangasela a balangiawa lu kanu lagat enggu su langun nu ped pan a embalangan nu balangiawa a 'bpaguyag-uyag kanu ig taman den kanu uman i embalangan nu manga papanuk. Daka nailay nu Kadenan i mapia su entu. 22 Na pinalihalan nu Kadenan su langun nu entu sa nia nin pidtalu na “Pagkadakel kanu enggu payapat kanu kanu lagat. Mapagkadakel bun su langun nu manga papanuk sia sa liwawaw na dunia.” 23 Na sinemagad su magabi enggu nakauma menem su mapita na entu ba su ikalima a gay.
24 Daka pidtalu nu Kadenan i “Mangaden su kalupan sa uman i embalangan na balangiawa a mana su pangangayamen enggu su manga malanap-lanap taman den kanu uman i embalangan nin a talaw a binatang sia sa liwawaw na dunia.” Na naaden su langun nu entu. 25 Na maitu ba i kinalimbag'u Kadenan kanu uman i embalangan nu talaw a binatang, embalangan na pangangayamen enggu embalangan na manga malanap-lanap. Daka nailay nu Kadenan i mapia su entu.
26 Na nia pidtalu nu Kadenan na “Lemimbagg tanu sa manusia a makaalung-alungh sa lekitanu a makakamal kanu manga seda, kanu 'bpamelayug lu kanu kawang-kawangan, kanu manga binatang enggu kanu langun nu malanap-lanap taman den kanu langun nu lu kanu liwawaw nu dunia.”
27 Na guna su maitu na pinangaden nu Kadenan su manusia
a makaalung-alung sa lekanin.
Na sia kanu alung-alung'u Kadenan
na pinangaden su manusia,
magidsan su mama enggu su babay.
28 Na pinalihalan nu Kadenan su langun nu entu sa nia nin pidtalu na “Pagkadakel kanu enggu payapat kanu kanu lusud'u dunia taman sa 'gkiug-kiugi nu su entu. Kamali nu su langun na seda lu kanu didalem'u lagat enggu su langun nu 'bpamelayug lu kanu kawang-kawangan taman den kanu langun na binatang kanu kalupan.” 29 Daka nia pidtalu nu Kadenan na “Pakikineg kanu sa mapia! Ibpagenggay ku sa lekanu su langun na embalangan na 'bpamangetu sia sa liwawaw na dunia a mana su pamulan a mapaguni enggu su langun nu 'bpamangunga a aden lagas'in. Na entu ba i mabaluy a makan nu.
30 “Na ibpagenggay ku bun su pamumulanen a makan nu langun nu embalangan na pangangayamen a mana su manga talaw a binatang enggu su 'bpamelayug lu sa kawang-kawangan taman den kanu langun nu 'bpaguyag-uyag sa liwawaw nu lupa.” Na nanggula su langun nu entu. 31 Na nailay nu Kadenan i sangat i kapia nu langun nu pinangaden nin. Daka sinemagad su magabi enggu nakauma menem su mapita na entu ba su ikanem a gay.