2
Na maitu ba i kinaimasad mangaden kanu langit enggu lupa taman den kanu langun na namakadalem lun. 2 Guna mapasad'u Kadenan su kinapangaden nin a entu na nangintelenena sekanin kanu ikapitu a gay. 3 Daka pinambalilidseki nu Kadenan su ikapitu a gay ka sinuti nin kagina entu ba su gay a nangintelenen sekanin kanu kinapangaden.Su Adam enggu su Siti Hawa
4 Nia ba su nakasulat makapantag kanu inipapangadenb kanu langit enggu lupa sa kanu kinapangaden lun.
Guna 'bpangadena nu Kadenan a Mapuluc a Kadenan su langit enggu lupa na 5 da pan 'bpamangetu a manga utan enggu pamumulanen sia kanu liwawaw nu dunia kagina da pan 'gkahanda nu Kadenan a Mapulu i mulan. Saleta mambu na da pan taw a makapangangawid kanu lupa. 6 Ugaid'a aden lenusd a lu pakabpun kanu lupa, na entu ba i pakabubu kanu kalupan.
7 Daka nangaden su Kadenan a Mapulu sa tawe a ebpun kanu libubuk entu pan ka iniyupan nin lu kanu ngilung sa napas a 'bpagenggay sa uyag-uyag taman sa mimbalangiawa su taw. 8 Guna su maitu na minumbal su Kadenan a Mapulu sa pamumulanan lu kanu dalepa a bedtuan sa Eden a tampal sa sebangan nu entu ka lu nin ba inibetad su taw a pinangaden nin. 9 Daka napaetu sekanin lu ba sa langun na embalangan na kayu a makalilini i palas'in enggu mapia a pegken i unga nin. Na lu ba kanu luk'u entu a pamumulanan su kayu a pakaenggay sa uyag-uyag enggu su kayu a pakaenggay sa kataw pantag sa mapia enggu mawag.
10 Na aden lawas'a ig a lu pakabpun kanu Eden enggu entu ba i pakaiwasa kanu pamumulanan. Iganat lu ba na pedsapak su ig ba a entu taman sa mimbaluy a pat timan a lawas'a ig. 11 Nia bedtuan kanu ika-isa a lawas'a ig na Pisun enggu lu i entu pakatuga kanu embala-bala nu kalupan sa Habila a aden manga bulawan nin. 12 Na pagelin a benal i bulawanf nu nia ba a dalepa. Madakel bun lu ba i bidiliug enggu palamata a yuniks. 13 Na nia menem bedtuan kanu ikadua a lawas'a ig na Gihun enggu lu i entu pakatuga kanu kalupan sa Kus. 14 Su ikatelu menem a lawas'a ig na bedtuan sa Tigrish enggu lu i entu pakatuga tampal sa sebangan nu dalepa a Asur.i Na Yupratisj menem i bedtuan kanu ikapat a lawas'a ig.
15 Daka inibetad'u Kadenan a Mapulu lu kanu pamumulanan a entu sa Eden su taw ka enggu nin 'gkapangangawidan enggu katiakapan su entu. 16 Nia inisugu nu Kadenan a Mapulu sa lekanin na “Makambaya-baya ka sa kakan kanu manga unga nu kayu kanu pamumulanan 17 nia tabia a di nu kapakayan a kanen na su unga nu kayu a pakaenggay sa kataw pantag sa mapia enggu mawag. Da ka a benal keman kanu unga nu kayu ba a entu ka saben-sabenal a matayk ka kanu entu demun ba a gay.”
18 Na guna su maitu na pidtalu nu Kadenan a Mapulu i “Dikena mapia kanu mama i dala tagapeda nin. Pangadenan ku sekanin sa makadait sa lekanin a makatabang lun.” 19 Na pinangaden nu Kadenan a Mapulu su langun na embalangan na binatang enggu langun na embalangan na papanuk sa kawang-kawangan a ebpun sa lupa. Na pinaubay nin den ba a entu lu kanu mama ka enggu nin madsusuliman u ngin i ipamedtu nin lun. Na apia ngin i ibedtu nu mama kanu manga balangiawa na entu den ba i manga ngala nilan. 20 Na pinamedtuan den mambu nu mama sa manga ngala su langun na embalangan na pangangayamen, su manga papanuk sa kawang-kawangan enggu su manga talaw a binatang. Ugaid'a dala natun nu mama a makadait sa lekanin a makatabang lun. 21 Tembu pinatulug'u Kadenan a Mapulu su mama taman sa nakatulug a benal. Na kanu kapedtulug'in na inabat'u Kadenan a Mapulu su satiman kanu gusuk'in, entu pan ka pinadtikup'in su pali. 22 Na su gusuk ba a entu a inabat'u Kadenan a Mapulu lu kanu mama i binaluy nin a babay enggu iniubay nin lu kanu mama. 23 Daka nia pidtalu nu mama na
“Saguna na nia den su tulan a ebpun kanu tulan ku,
su sapu ebpun kanu sapu ku.
Na kagina ka ebpun sekanin kanu mamal
na babaym i ibedtu sa lekanin.”