Su Kinasasat taman sa Kinambaladusa nu Taw
3
Na sia kanu langun na binatang a pinangaden nu Kadenan a Mapulu na su nipaya i sangat a tagakalen sa langun. Nia nin inidsa kanu babay na “Benal ba a pidtalu nu Kadenan i di kanu kapakayan a keman kanu apia ngin a unga na kayu sia kanu pamumulanan?” 2 Nia inisumpat'u babay kanu nipay na “Kapakayan kami a keman kanu unga nu manga kayu sia kanu pamumulanan. 3 Nia tabia a di nami kapakayan a kanen na su unga nu kayu a lu kanu luk'u pamumulanan. Nia pidtalu nu Kadenan na u keman kami kanu unga nu entu a kayu atawa ka apia amin nami bu na natatalanged a matayb kami.” 4 Daka nia inisumpat'u nipay kanu babay na “Saben-sabenal a di kanu matay. 5 Kagina katawan man nu Kadenan i endaw demun i kakan nu kanu entu a unga na kaadenan kanu na sabut. Na mabaluy kanu den ba a entu a mana su Kadenan ka katawan nu den u ngin i mapia enggu mawag.” 6 Na guna madsima-sima nu babay i su unga nu kayu a entu na mapia a pegken enggu mapia i palas'in taman sa makalilini a benal kagina makaenggay sa sabut, na kinua nin enggu kinan nin. Na inenggan nu babay su kaluma nin taman sa kinan nin mambu su entu. 7 Daka kanu entu demun ba na naadenan silan na sabut enggu napamikil'ilan i nakagkawas-kawas silan. Guna su maitu na napadtatambil silan sa manga launc ka minumbal silan sa makadapeng kanu lawas'ilan.8 Na guna su pedsukilep den na nakineg'ilan su kabpelakaw nu Kadenan a Mapulu lu kanu pamumulanan. Daka pinagenan nilan su Kadenan a Mapulu lu kanu pageletan nu manga kayu nu pamumulanan. 9 Ugaid'a tinawag'u Kadenan a Mapulu su mama enggu inidsan nin sa “Endaw ka?” 10 Na nia inisawal'u mama na “Nakineg ku su kabpelakaw nengka sia kanu pamumulanan enggu nagilekan aku kagina nakagkawas-kawas aku tembu ba nagena aku.” 11 Daka inidsan nu Kadenan a Mapulu sa “Entain i midtalu sa leka sa nakagkawas-kawas ka? Ngintu, kineman ka kanu unga nu kayu a inisapal ku a di 'gkapakayan a pegken?” 12 Na nia inisumpat'u mama na “Kagina su babay a inenggay nengka a maped ku na inenggan aku nin kanu unga taman sa kinan ku mambu.” 13 Na guna su maitu na inidsan nu Kadenan a Mapulu su babay sa “Ngin i nia ba a pinggula nengka?” Nia inisawal'u babay na “Pinagakalan aku nu nipay tembu ba nakan ku.”
14 Daka nia pidtalu nu Kadenan a Mapulu kanu nipay na
“Sabap kanu nan a pinggula nengka
na seka bu i idsinta kanu langun nu pangangayamen
enggu kanu langun nu manga binatang sia sa liwawaw na dunia.
Na temakas ka bu sa kapananap'engka
enggu taman a bibiag ka pan
na demila ka bu lu kanu libubuk.
15 Na seka enggu su babay
na pambunuan ku
maitu bun su tupu nengka enggu su tupud nin.
Na su tupu nu babay
i gemesa kanu ulu nengka
ugaid'a tukan nengka su palu nin.”
16 Daka nia menem pidtalu nu Kadenan a Mapulu kanu babay na
“Sangat a pakapasangan ku seka kanu kagkagingay nengka
enggu makin mangilut i kagkapasang'in
kanu timpu na kambata nengka.
Ugaid'a apia ka maitu
na mapangingalap'engkae bun su kaluma nengka
enggu sekanin i endatu sa leka.”
17 Nia nin menem pidtalu kanu Adam na
“Kagina ka pinakikineg'engka su kaluma nengka
taman sa kinan nengka su unga nu kayu
a inisapal ku sa leka a di nengka kanen
na idsinta su lupa sabap sa leka.
Na taman sa bibiag ka pan
na nia nengka bu di pagatingen na lugu
asal bu na makakan ka.
18 Nia mamangetu kanu lupa
na manga teneken a utan
ugaid'a nia nengka kanen na su unga nu pamumulanen.
19 Makasabpet ka sa makan
sia makanggulalan kanu igis'u ating'engka
taman sa kambalingan nengka kanu lupa
kagina lupa bun i nabpunan nengka.
Na kagina ka libubuk ka bun nakabpun
na sa libubuk ka bun makambalingan.”
20 Na binedtuan nu mama su kaluma nin sa Sittie Hawaf kagina sekanin su ina nu langun nu manusia. 21 Na pimbalegkasan nu Kadenan a Mapulu sa upis'a binatang su Adam enggu su kaluma nin. 22 Daka nia pidtalu nu Kadenan a Mapulu na “Ilay nu! Makalagid den su taw sa lekitanu kagina katawan nilan den u ngin i mapia enggu mawag. Kagina ka maitu na di den dait a sugutan silan a makakan kanu unga nu kayu a pakaenggay sa uyag-uyag ka u sugutan silan na di den ba a entu silan matay.”
23 Guna su maitu na pinaawa silan nu Kadenan a Mapulu lu kanu pamumulanan sa Eden ka enggu nilan 'gkapangangawidan su lupa a awal'ilan. 24 Na guna den silan makapaawa lu kanu pamumulanan na minetad su Kadenan a Mapulu sa manga malaikatg enggu pedtatalinggi a sundang a 'bpangalaw-kalaw lu temampal kanu sebangan nu pamumulanan sa Eden ka enggu nin 'gkatamengan su lalan a ipedsangul kanu kayu a pakaenggay sa uyag-uyag a da taman nin.