Si Kabil enggu si Habil
4
Na dinulug'u Adam su kaluma nin a su Sittie Hawa. Na migkagingay sekanin taman sa mimbata a binedtuan nin sa Kabil.a Nia pidtalu nu Sittie Hawa na “Kanu tabang'u Kadenan a Mapulu na nakambata aku sa wata a mama.” 2 Na nakambata menem sekanin 'bpaluman sa ali ni Kabil a nia nin inibedtu lun na si Habil.b Na nia pigkaselanan ni Habil na kapedtuganul sa manga ayam enggu si Kabil menem na kabpangangawid.3 Na naipus su manga timpu, na aden isa a gay a nananggit si Kabil sa unga nu nasabpet'in ka inenggay nin a umunc kanu Kadenan a Mapulu. 4 Na si Habil menem na nia nin pinananggit na mangasebudd a sapu nu muna-muna a manga pipis'u pangangayamen nin. Na sangat a nasuatan nu Kadenan a Mapulu si Habil enggu su inenggay nin a umun. 5 Ugaid'a si Kabil enggu su inenggay nin a umun na dala kasuati nu Kadenan a Mapulu. Na sabap sa entu na sangat a nalipunget si Kabil taman sa nakumu-kumu su beneng'in. 6 Guna su maitu na inidsan nu Kadenan a Mapulu si Kabil sa “Ngintu ka 'gkalipunget ka enggu nginan ka nakumu-kumu i beneng'engka? 7 U mana bu man ka mapia i penggulan nengka na natatalanged a matalima ka. Ugaid'a u nia nengka enggulan i dikena mapia na makatibpu ka den sa ngali na buaya. Kagina pegkiugan a benal 'bpagulipen nu kabaladusan ugaid'a dait a malepas nengka su entu.”
8 Na aden isa a gay a inenggat'i Kabil su ali nin a si Habil sa nia nin pidtalu na “Lemu ta kanu malinawag.” Na guna su lu den silan kanu 'bpangangawidan na sinugkuban ni Kabil su ali nin a si Habil ka binunu nin. 9 Daka inidsan nu Kadenan a Mapulu si Kabil sa “Endaw su ali nengka a si Habil?” Na nia nin inisumpat na “Di ku katawan. Enduken, saki ba i pedtuganul kanu ali ku?” 10-11 Daka nia pidtalu nu Kadenan a Mapulu na “Ngin i pinggula nengka a nan? Su lugu nu ali nengka a nakatuga lu kanu lupa na 'bpananawag sa laki sa tabang. Na kagina ka pinatuga nengka su lugu nu ali nengka na idsinta ku seka sia kanu lupa ka bugawn ku seka taman sa di ka den makapangangawid. 12 Na amaika pangangawidan nengka su lupa na di ka nin pasabpeten sa mapia. Dala natatalanged a kapangintelenan nengka taman sa endadalaug ka sia sa liwawaw na dunia.” 13 Na nia nakasumpat'i Kabil kanu Kadenan a Mapulu na “Sangat i kapasang'in su kasiksan a nan sa laki. 14 Ilay ka ba, binugaw aku nengka saguna sia kanu kalupan enggu makawatan aku den kanu kaadapan nengka. Na da den kapangintelenan ku taman sa endadalaug aku bu kanu liwawaw nu dunia. Na apia entain i makailay sa laki na bunun aku nin.” 15 Ugaid'a nia lun inisumpat'u Kadenan a Mapulu na “Di i entu manggula! Ka apia entain i munu sa leka na isuli ka sa makapitu takep.” Daka tinaguan nu Kadenan a Mapulu si Kabil sa tanda asal'a kasapalan su apia entain a miug lun mimatay. 16 Guna su maitu na minawa si Kabil kanu adapan nu Kadenan a Mapulu ka lu sekanin mindadalepa sa kalupan a bedtuan sa Nude a temampal kanu sebangan nu pamumulanan a Eden.
17 Na dinulug'i Kabil su kaluma nin enggu migkagingay taman sa mimbata sa wata a mama a binedtuan nin sa Inuk. Daka napatindeg si Kabil sa siudad a binedtuan nin kanu ngala nu wata nin a si Inuk. 18 Na si Inuk ba a nia i ama ni Irad enggu si Irad menem i ama ni Mihuyail. Na si Mihuyail menem i ama ni Mitusail enggu si Mitusail i ama ni Lamik. 19 Na nangaluma si Lamik sa dua kataw a babay. Nia ngala nu nauna a kaluma nin na si Ada enggu nia menem temundug na si Zila. 20 Nia nambata ni Ada na si Yabal, na sekanin i punsuan nu lu 'bpamegkaleben sa balung-balung a tuleda a aden manga pangangayamen nin. 21 Aden ali ni Yabal a nia nin ngala na Yubal, na sekanin menem i punsuan nu manga pakukutiapi enggu su papapalendag. 22 Na aden bun mambu wata ni Zila a nia nin ngala na si Tubal-Kabil, na sekanin menem i punsuan nu manga panday sa galang enggu putaw. Aden bun suled'i Tubal-Kabil a babay a nia nin ngala na si Naama.
23 Na nia pidtalu ni Lamik kanu dua kataw a kaluma nin na
“Pakikineg aku nu Ada enggu Zila!
Itagu nu sa ginawa su edtalun ku!
Aden binunu ku a manguda a mama
kagina pinalian aku nin.
Inimatayan ku
sabap sa pinakasakitan aku nin.
24 Na u makapitu takep kasulian
su apia entain a munu kani Kabil
na makapitupulu enggu pitu takep menem kasulian
su apia entain a munu sa laki.”
Si Sit enggu si Inus
25 Na dinulug 'bpaluman nu Adam su kaluma nin enggu mimbata menem sa wata a mama. Nia lun inibedtu nu Sittie Hawa na Sitf kagina nia nin pidtalu na “Inenggan aku nu Kadenan sa ped a wata a sambi kani Habil kagina binunu sekanin ni Kabil.” 26 Na nakambata bun mambu sa wata a mama si Sit enggu binedtuan nin sa Inus.g Na iniganat den kanu entu ba a timpu na linemudsu den semimba su manga taw sia kanu ingala nu Kadenan a Mapulu.