Su Kinaliu
sia kanu Kitab Taurat
Su Kinagkadakel'u manga Taw a Israil
1
1-4 Na nia ba su ngala nu manga wata nu Israila a minunut sa lekanin lu sa Egypt: si Rubin, Simiun, Libi, Yahuda, Isakar, Sibulun, Buniamin, Dan, Naptali, Gad enggu si Asir apeg den nu manga sakambinabatan nilan. 5 Na su Yusup na nauna den lu sa Egypt. Na su tupu nu Israil na pitupulu kataw silan langun.b6 Na kanu kinaipus'u manga timpu na da den su Yusup enggu su manga tebped'in sa pused apeg'u nangauna a muliataw nilan ka namamatay den. 7 Ugaid'a pegkadakel-pegkadakel bun su manga taw a Israil taman sa pakapenu den silan kanu manga dalepa sa Egypt.
Su Kinapakapasang kanu manga Taw a Israil
8 Guna maipus su manga timpu na aden nakasambi endatu lu sa Egypt a di nin pegkilalan su Yusup. 9 Na nia nin pidtalu kanu manga taw nin na “Ilay nu, pegkadakel-pegkadakel bun a benal su manga taw a Israil kumin sa lekitanu. 10 Na pagitungen tanu sa mapia u panun i kakumpen tanu sa kapegkadakel'ilan ka aden a entu na aden munu sa lekitanu na lu silan temampil kanu pembunu a entu sa lekitanu taman sa makaawa silan sia.”
11 Guna su maitu na minetad silan sa 'gkangasaligan a tamegesen asal'a mapeges'ilan su manga taw a Israil sa ukit a kapanggalebek kanilan sa mapasang. Inipanggalebek kanilan su kinapatindeg kanu siudad'u Piraunc a bedtuan sa Pitum enggu Ramisis a 'bpanaguan kanu manga kauyagan enggu kanu langun-taman. 12 Ugaid'a makin papegkapasangan su manga taw a Israil na makin bun silan pegkadakel-pegkadakel taman sa pakapayapat den silan kanu dalepa sa Egypt a sabapan a kinapangandam'u manga taw a Egypt kanilan. 13 Na daka makin nilan pinakapasangan sa galebek su manga taw a Israil. 14 Pinakapasangan sa ukit a kinapapangumbal kanilan mamikal sa patpasagi a budta a pinadtegas enggu ipapendeketa lun taman den kanu langun nu galebekan sa kabpangangawid. Na da lat a nanam'u manga taw a Egypt kanu manga taw a Israil kanu langun nu entu.
15 Na inisugu bun nu Piraun kanu dua kataw a walian nu manga Hibrud a si Sipra enggu si Pua i 16 “Amaika makangguwalian kanu sa babay na Hibru a nia nin mambata na wata a mama na imatayi nu ugaid'a amaika wata a babay na di nu den 'bpagimatayi.” 17 Ugaid'a sabap sa aden gilek'ilan kanu Kadenan na da nilan unuti su inisugu a entu kanilan nu datu ka endaw i 'gkangguwalianan nilan a babay na Hibru a nia nin 'gkambata na wata a mama na di nilan 'bpangimatayan. 18 Daka inipatawag'u datu silan ka inidsan nin sa “Ngintu ka dala nu unuti su inisugu ku? Ka dala nu imatayi su manga wata a mama a pimbata nilan.” 19 Na nia nilan inisumpat na “Datu, dikena man mana su manga babay na Egypt su manga babay na Hibru, ka su manga babay na Hibru na malemu gaid i kambata nilan ka di kami pan pakauma na nakambata den silan.” 20-21 Na sabap sa gilek'ilan a entu kanu Kadenan na pinalihalan silan nu Kadenan sa kaluma enggu manga muliataw. Saleta na pegkadakel-pegkadakel bun a benal su manga taw a Israil.
22 Daka inisugu menem'u Piraun kanu langun nu manga taw nin i idtug'ilan kanu lawas'a ig sa Nilu su langun na bagu pimbata a wata a mama nu Hibru. Ugaid'a su manga wata a babay na padtadayn nilan den a mauyag.