Su Kinambata kanu Nabi Musa taman kanu Kinagkasela nin
2
Aden isa a tiwalay a tupu nu Libi 2 a nakambata sa wata a mama. Na nailay nu ina nin i mapia a benal su wata, na inipagena nin sa kanu dalem'u nakatelu ulan. 3 Guna su di den makapagena su wata na kinemua su ina nin sa baskit ka pinamelen nin sa ispaltu enggu lita ka lu nin ba inibetad su wata nin, entu pan ka inanggit'in lu kanu lawas'a ig sa Nilu, lu kanu mangalambeg a utan.4 Saleta mambu na pedsandengen bun nu kaka nin a babay su ali nin ka 'bpagilayn nin u ngin i manggula nin. 5 Daka nakauma su puteli a wata nu Piraun lu kanu lawas'a ig ka pebpaigu, na gagalu nu kapebpaigu nin na pendadalakaw su manga ulipen nin lu kanu adteban. Daka nasandeng'u puteli su baskit lu kanu mangalambeg a utan. Na inipakua nin kanu ulipen nin su entu. 6 Na guna nin kasawi na nia nin nailay na wata a mama a 'bpaguliang. Na nalat a benal i ginawa nin lun taman sa nia nin nadtalu na “Wata na Hibru i nia.” 7 Guna su maitu na minubay su kaka nu wata kanu puteli ka pidtalu nin lun i “Amaika miug ka na pangilayan ku seka sa babay na Hibru a makapasusu enggu makatuludu kanu wata a nan.” 8 Na nia pidtalu nu puteli na “Uway.” Na daka inangayan den nu wata a babay su ina nin ka pinalu nin kanu puteli. 9 Na nia lun pidtalu nu puteli na “Pasusu ka enggu tuludu ka sa laki su nia a wata ka bayadan ku seka.” Na maitu den ba mambu i pinggula nu ina nu wata.
10 Guna su pegkasela den su wata na inisigkil'u ina nin lu kanu puteli, na initimbang mambu nu puteli sa wata nin enggu binedtuan nin sa Musaa kagina lu nin nasabet kanu lawas'a ig.
Su Kinaawa nu Musa lu sa Dalepa a Egypt
11 Guna su masela den su Musa na aden isa a gay a kinakap'in su manga pagidsan nin a taw a Hibru, na nailay nin i kapapegkapasang kanilan penggalebek enggu nailay nin bun i papegkasakitan nu isa a taw a Egypt su pagidsan nin a Hibru. 12 Daka nangingilay sekanin, na guna su dala 'gkailay nin a taw na inimatayan nin su taw a Egypt enggu inilebeng'in lu kanu pedtad. 13 Na kanu temundug a gay na mimbalingan menem sekanin lu a nauman nin su dua kataw a Hibru a 'bpagukag. Na inidsan nin su nakadtibaba sa “Nginan ka papegkasakitan nengka sekanin inunta na sakalugu kanu bu?” 14 Na nia nin inisumpat na “Enduken, entain i minenggay sa leka sa kawagib sa kakamalan kami nengka? Ngintu? Imatayan aku nengka bun a mana su pinakaidan nengka kanu taw a Egypt?” Daka nagilekan su Musa enggu nia natagu sa ginawa nin na “Natawan besen su pinggula ku a entu.” 15 Na guna makauma kanu pakinegan nu Piraun su entu na kiugan nin mimatay su Musa ugaid'a minawa mamagayas su Musa ka lu mibpawang sa dalepa a Midian.b
Guna sekanin makauma lu na nangintelenen sekanin sia kanu ubay nu kalut. 16 Saleta mambu na su 'bpangurban kanu dalepa a Midian na aden pitu kataw a wata nin a babay. Na linemu silan kanu kalut ka pedsageb silan sa ipebpaginem kanu manga pangangayamen nu ama nilan. 17 Daka aden menem nakauma a manga patutuludu bun sa bili-bili na pabpagawan nilan lu su pitu kataw a manga babay. Ugaid'a pidtabangan silan nu Musa taman sa sekanin den i napainem kanu pangangayamen nu manga babay. 18 Sabap sa entu na nangagan nakauli su manga babay, na inidsan silan nu ama nilan a si Ruilc sa “Nginan ka mana mapanay i kinauli nu saguna?” 19 Na nia nilan inisumpat na “Aden isa a mama a taw sa Egypt i naninindeg sa lekami kanu manga patutuludu sa bili-bili taman sa sekanin pan i napainem kanu manga pangangayamen tanu.” 20 Na nia pidtalu nu ama nilan na “Endaw i mama ba a entu? Ngintu ka tinagak'u? Patalus'u sia ka enggu makakan.” 21 Na pinatalus'ilan den su Musa taman sa miniug sa lu sekanin 'gkaleben.
Na inipagkaluma ni Ruil kanu Musa su wata nin a si Zipura. 22 Na nakambata silan sa wata a mama. Na binedtuan nu Musa sa ngala a Gilsumd kagina nakalapu sekanin kanu entu a dalepa.
Su Kinabpayag'u Kadenan kanu Musa lu kanu Kayu a 'Bpangalaw-kalaw
23 Na kanu kinaipus'u manga lagun na apia minatay den su datu nu manga taw a Egypt na da bun masalin su kapapegkapasang penggalebek kanu manga taw a Israil taman sa nakauma kanu pakinegan nu Kadenan su kabpaguguliang'ilan sa kabpangeni sa tabang. 24 Na guna makineg'u Kadenan su entu na nagkalendem'in su kapasadan nin kanu Ibrahim, Iskak enggu Yakub. 25 Na 'gkadsima bun man nu Kadenan su 'gkatala nilan tembu inipamamantag'in silan.