3
Na kanu timpu a lu pegkaleben su Musa sa Midian na sekanin i pedtuganul kanu manga pangangayamen nu panugangan nin a si Ruila a 'bpangurban lu. Na aden isa a gay a inisedseg'u Musa su manga pangangayamen lu kanu tawan-tawan a dalepa taman sa nakauma sekanin lu kanu palaw nu Kadenan a bedtuan sa Hurib. 2 Na pibpayagan sekanin lu ba nu Kadenan a Mapulu a sia nakanggulalan kanu malaikat'in a mibpalas sa 'bpangalaw-kalaw a apuy kanu sapun a kayu. Na nadsusuliman a benal'u Musa su kapegkalaw-kalaw nu entu a kayu ugaid'a dili 'gkatutung 3 tembu sangat a nagaip sekanin. Na pedsupegan nin ka pedsusulimanen nin u ngintu ka di 'gkatutung. 4 Na guna mailay nu Kadenan a Mapulu i pedsupeg sekanin ka 'bpagilayn nin su kayu na tinawag sekanin nu Kadenan sa “Musa, Musa.” Na nia nakasumpat'u Musa na “Ngintu ba?” 5 Na nia pidtalu nu Kadenan na “Da ka gaid pedsupeg sia. Iawa nengka i ampis'a ay nengka a nan ka suti a lupa i pedtindegan nengka a nan. 6 Saki ba su Kadenan nu manga kaapuan nengka a su Ibrahim, Iskak enggu Yakub.” Daka dinapengan nu Musa su beneng'in ka nagilekan edtulik kanu Kadenan.7 Na pidtalu nu Kadenan a Mapulu kanu Musa i “'Gkadsusuliman ku a benal su kapapegkapasang kanu manga taw ku a Israil lu sa Egypt. 'Gkakineg ku bun su kabpaguguliang'ilan sa kabpangeni sa tabang sa laki sa kanu kapapegkapasang kanilan nu mangategas a 'gkangasaligan nu Piraun. Na 'gkatawan ku man a benal su 'gkangatala nilan. 8 Na nia ba i sabap'in i kinasia ku ka enggu ku silan makalipuas kanu manga taw a Egypt. Na palun ku silan kanu maulad enggu kawasa a kalupan a pendalepan nu manga taw a Kanaan, manga taw a Hit, manga taw a Amur, manga taw a Piris enggu manga taw a Hib taman kanu manga taw a Hibus. 9 Na saben-sabenal man a nakasampay sa laki su kabpaguguliang'ilan 'bpangeni sa tabang taman sa nailay ku su kapapegkapasang'u manga taw a Egypt kanilan. 10 Tembu pedsugun ku seka Musa sa lu ka kani Piraun ka iawa nengka su manga taw ku a Israil lu kanu dalepa a Egypt.”
11 Na nia inisumpat'u Musa kanu Kadenan na “Entain aku besen a mangadap kanu Piraun enggu mawa kanu manga taw sa Israil lu sa Egypt?” 12 Na nia menem pidtalu lun nu Kadenan na “Di ku man seka padtadayn. Nia ba i tanda sa saki su Kadenan a sinemugu sa leka: Na amaika maawa nengka den silan kanu dalepa a Egypt na simban aku nu kanu nia ba a palaw.”
13 Na nia menem inisumpat'u Musa na “Amaika lemu aku den kanu manga taw a Israil ka edtalun ku kanilan i sinugu aku sia nu Kadenan a Kadenan nu manga kaapuan nami na ngin i edtalun ku amaika idsan aku nilan u entain i ngala nu sinemugu sa laki?” 14-15 Na nia inisumpat'u Kadenan na “Na u entain aku na entu aku ba. Edtalu ka kanu manga taw a Israil i saki ba su Kadenan a Mapulu a sinemugu sa leka. Na entu ba su ngalab ku enggu entu ba i itawag sa laki taman sa taman. Saki su Kadenan nu kaapuan nu a su Ibrahim, Iskak enggu Yakub.
16 “Na lu ka sa Egypt ka limud ka su 'gkangaunutan nu manga taw a Israil ka edtalu ka kanilan i ‘Su Kadenan a Mapulu na mibpayag sa laki a Kadenan nu manga kaapuan tanu a su Ibrahim, Iskak enggu Yakub. Na nia nin katigan na “'Gkadsuliman ku a benal sekanu enggu su papegkaidan sa lekanu nu manga taw a Egypt. 17 Na ibpasad ku i iawa ku sekanu kanu dalepa a nan a papegkapasang sa lekanu enggu palun ku sekanu kanu kawasa a kalupan a pendalepan nu manga taw a Kanaan, manga taw a Hit, manga taw a Amur, manga taw a Piris enggu manga taw a Hib taman kanu manga taw a Hibus.” ’
18 “Pakikinegen ka man nu manga 'gkaunutan nu manga taw a Israil. Paunut ka silan lu kanu Piraun ka edtalu nu sa lekanin i ‘Su Kadenan a Mapulu a Kadenan nu manga Hibru na mibpayag sa lekami. Na kagina ka maitu na 'bpangenin nami sa leka i suguti kami den sa makalu kami kanu tawan-tawan a dalepa ka enggu kami makagkurban kanu Kadenan a Mapulu ka telu gay pan i kalalag'ami lun.’ 19 Na katawan ku man i di miug si Piraun sa kaganat'u lu, nia tabia na mapeges pan sekanin. 20 Tembu ba siksan ku su manga taw a Egypt sia makanggulalan kanu langun nu dala idsan nin a limu ku lu kanilan. Na entu pan ba ka semugut sekanin.”
21 Na nia pan pidtalu nu Kadenan kanu Musa na “Pagkalemeken ku sa lekanu su pamusungan nu manga taw sa Egypt ka enggu aden mait'u kanu kaganat'u lu. 22 Na uman i manga babay nu na mamangeni sa bulawan enggu pilak apeg'a balegkas lu kanu pagubay nin a manga babay na Egypt enggu mamangeni bun silan lu kanu manga babay a ana nilan. Na su entu a pinamangeni nu na ipausal'u kanu manga wata nu. Na kanu maitu ba a ukit na makua nu su manga kakawasan nilan sa di nilan penggedamen.”