4
Ugaid'a nia menem inisumpat'u Musa kanu Kadenan na “Ngin i enggulan ku amaika di aku paginugutan nu manga taw a Israil atawa ka di aku nilan pakikinegen sa saben-sabenal a pibpayagan aku nengka a su Kadenan a Mapulu?” 2 Na nia inisumpat'u Kadenan a Mapulu na “Ngin i pedsegedan nengka a nan?” Na nia inisumpat'u Musa na “Tungked.” 3 Na nia menem pidtalu nu Kadenan sa lekanin na “Idtug'engka san sa lupa.” Na inidtug den mambu nu Musa, daka mimbaluy a nipay su tungked. Na nakasunud su Musa. 4 Na nia pidtalu nu Kadenan a Mapulu sa lekanin na “Segedi ka san sa ikug.” Na sinegedan den mambu nu Musa, daka mimbaluy menem a tungked. 5 Na nia menem pidtalu nu Kadenan kanu Musa na “Namba i enggula ka, ka enggu makapaginugut su manga taw a Israil sa saben-sabenal a mibpayag sa leka su Kadenan a Mapulu a Kadenan nu manga kaapuan nu a su Ibrahim, Iskak, enggu Yakub.”6 Pidtalu menem'u Kadenan a Mapulu kanu Musa i “Ililip'engka su lima nengka san mag kanu laleb'engka.” Na maitu den ba mambu i pinggula nin, na guna nin bugkuta su lima nin na inetuan na bugis. 7 Na guna su maitu na pidtalu menem'u Kadenan i “Ililip'engka 'bpaluman su lima nengka.” Na inililip'in den mambu su lima nin. Na guna nin pembugkuta na naawa menem su entu a sakit. 8 Na pidtalu pamun nu Kadenan i “Amaika di nilan paginugutan su edtalun nengka enggu su muna-muna a enggulan nengka a tanda a kagaipan na basi paginugutan nilan den su ikadua a enggulan nengka a kagaipan. 9 Na amaika di pamun silan maginugut kanu dua timan a entu a tanda a kangagaipan a enggulan nengka enggu su kadtalu nengka na kua ka sa ig kanu lawas'a ig'u Nilu ka ibubus'engka kanu mamala a lupa ka su entu ba a ig na embaluy a lugu.”
10 Na nia menem inisumpat'u Musa na “Hu Mapulu ku, na ampun aku nengka ka iganat den sa ganatan taman den sa kapembitiala nengka ba a nia sa laki na da aku bun 'gkataw embibitiala.” 11 Na nia inisumpat lun nu Kadenan na “Enduken? Entain besen i minaden kanu ngali nu taw? Entain ba i nangaden kanu taw sa di mamakadtalu, su di mamakakineg enggu su di mamakailay apeg den nu pamakailay? Dikena ba saki a Kadenan a Mapulu? 12 Tembu ba ganat ka den ka saki i mataw sa kambitiala nengka, pamandun ku seka u ngin i dait a edtalun nengka.”
13 Na nia menem pidtalu nu Musa na “Hu Mapulu ku na salakaw den i sugu ka.” 14 Guna su maitu na nalipungetan nu Kadenan su Musa. Na nia nin lun pidtalu na “Dikena ba edtebped kanu sa pused kani Harun a tupu nu Libi?a Katawan ku i mategel sekanin embibitiala. Na pakauma sekanin ka enggu ka nin makapagilaya taman sa mapia i ginawa nin sa kanu kapagilaya nu. 15 Na edtalu ka lun su ipapedtalu ku sa leka ka saki i mabaluy a ngali nu. Pamandun ku sekanu u ngin i dait a enggulan nu. 16 Si Harun i mataw mapasampay kanu manga taw u ngin i ipapedtalu ku sa leka. Na seka menem i mabaluy a mana saki. 17 Na pananggit ka bun su tungked ka namba i 'bpagusalen sa kapailay nengka sa manga tanda a kangagaipan.”
Su Kinambalingan nu Musa lu sa Egypt
18 Daka minuli mambu su Musa ka nagetaw kanu panugangan nin a si Jitru sa nia nin pidtalu na “Embalingan aku pan lu sa Egypt ka pamalisan ku pan u aden pamun bibiag kanu manga pagali ku lu.” Na sinugutan mambu sekanin nu panugangan nin taman sa pinalihalan nin sekanin. 19 Saleta mambu na pidtalu nu Kadenan a Mapulu kanu Musa i “Embalingan ka den lu sa Egypt ka su langun nu pegkiug sa leka 'bpagimatay na minatay den.”
20 Na guna su maitu na pinagkuda den nu Musa kanu kimar'in su manga wata nin enggu su kaluma nin ka mimbalingan den lu sa Egypt. Na pidtapik'in bun su tungked'u Kadenan. 21 Na pidtalu bun nu Kadenan a Mapulu kanu Musa i “Kanu kauma nengka lu sa Egypt na enggula ka langun su kangagaipan a ipapenggula ku sa leka lu kanu kaadapan nu Piraun. Ugaid'a padtegasen ku su pamusungan nu Piraun ka enggu di nin kasugutan sa makaawa su manga taw a Israil. 22 Na nia ka edtalu kanu Piraun na ‘Papedtuntayan nu Kadenan a Mapulu i su manga taw a Israil na initimbang'in sa kaka sa langun a wata nin. 23 Suguti ka i makaawa silan sia ka enggu nilan masimba su Kadenan a Mapulu. Ugaid'a amaika di nengka silan sugutan na imatayan nin su kaka sa langun a wata nengka a mama.’ ”
24 Na sia kanu kabpangintelenen nu Musa enggu su manga tagapeda nin 'bpawang sa Egypt na 'bpagimatayan sekaninb nu Kadenan. 25 Ugaid'a namagayas kemua sa magalang a watu si Zipura ka pinaletak'in su wata nin a mama ka kinigulan nin sa lugu su ay nin ka nia nin pidtalu na “Natalatantu den a lugu ku seka.” 26 Daka dala italus'u Kadenan su kabpagimatay nin lun. Saleta na nia ba a entu pedtalun ni Zipura sa kanu kinadtalu nin sa “Natalatantu den a lugu ku seka,” na su kapebpaletak.c
27 Saleta mambu na nadtalu den nu Kadenan a Mapulu kanu Harun i “Alaw ka si Musa lu kanu tawan-tawan a dalepa.” Na pinggula den mambu nu Harun su entu. Na lu nin inalaw su Musa kanu palaw nu Kadenan, na endaw i kinapagilaya nilan na sinium'in su Musa. 28 Na pinanudtul den mambu nu Musa kanu Harun su langun nu kadtalu nu Kadenan a Mapulu a pegkiugan nin ipapedsampay enggu su manga tanda a kagaipan a ipapenggula nin. 29 Na linemu den mambu silan dua sa Egypt ka linimud'ilan den su 'gkangaunutan nu Israil. 30 Na pidtalu nu Harun kanilan su langun na pidtalu nu Kadenan a Mapulu kanu Musa enggu pinggula nin den su langun nu tanda a kagaipan kanu kaadapan nu manga taw a Israil 31 taman sa naginugut mambu su manga taw. Guna nilan makineg i dala silan padtadaya nu Kadenan a Mapulu enggu nailay nu Kadenan su kinapakapasang kanilan na sinemugiud silan ka sinimba nilan su Kadenan a Mapulu.