Su Kinapangadap'u Musa enggu Harun kanu Piraun
5
Guna su maitu na linemu den su Musa enggu su Harun kanu Piraun ka pidtalu nilan lun i “Ipapedsampay nu Kadenan a Mapulu a Kadenan nu manga taw a Israil sa nia nin kadtalu na ‘Suguti ka sa makaganat su manga taw ku ka enggu silan makagkanduli sa laki lu kanu tawan-tawan a dalepa.’ ” 2 Na nia inisumpat'u Piraun na “Entain sekanin a Kadenan a Mapulu a pakikinegen ku i kadtalu nin sa kapaganat kanu manga taw a Israil? Di ku sekanin katawan enggu di ku sugutan sa makaganat su manga taw a Israil.” 3 Na nia pidtalu nu Musa enggu Harun na “Mibpapayag sa lekami su Kadenan nami a manga taw a Hibru tembu suguti kami sa makalu kami kanu tawan-tawan a dalepa ka enggu kami makagkurban kanu Kadenan nami a Mapulu ka telu gay pan i kalalag'ami lun. Na amaika di kami makalu na binasan kami nin ka ipatingguma nin sa lekami su manga sakit atawa ka bunun kami.” 4 Daka nia pidtalu nu Piraun kanu Musa enggu Harun na “Nginan ka 'bpagangga kanu sa kapenggalebek'u? Embalingan kanu langun lu kanu manga galebekan nu. 5 Ilay nu ba, madakel kanu a benal, ngintu ka 'bpagangga kanu pamun sa kapenggalebek'u?”Su Kinapangiseg'u Kapapegkapasang'u Piraun kanu manga Taw a Israil
6 Na kanu entu bun ba a gay na inipatawag'u Piraun su manga pedsaligan nin kanu galebekan apeg den nu manga kapatas'in a manga taw a Israil ka inisugu nin i 7 “Di nu den a benal menggi sa lagami su manga taw a Israil sa kabpagumbal'ilan sa budta a pinadtegas, ka silan den i papangilay nu. 8 Ugaid'a maitu bun ba i kadakel a umbalen nilan kanu danden. Di nu a benal kemulangi ka 'gkangapauk bu silan, tembu ba a nan 'bpangenin nilan i makaganat silan sia ka enggu kun silan makagkurban kanu Kadenan nilan. 9 Na makin nu pan umani i galebek'ilan ka enggu di nilan den makapamamantag su da katagan nin a manga bitiala.”
10 Daka linemu den mambu su manga pedsaligan nu Piraun apeg den nu manga kapatas a entu ka pidtalu nilan su katigan nu Piraun a “Di kanu den kun 'bpagenggan sa lagami. 11 Sekanu den i mataw mangilay! Ugaid'a su kadakel'u 'bpagumbalen nu na maitu bun ba kanu danden, di a benal mapakay a kakulangan.”
12 Guna su maitu na nataneb'u manga taw a Israil su dalepa a Egypt sa kabpangilay bu sa lagami. 13 Na pebpegesen bun silan nu 'gkangasaligan sa kaumbal'ilan sa budta a pinadtegas sa mana bun su kadakel'u 'gkaumbal'ilan kanu timpu a 'bpagenggan pan silan sa lagami. 14 Na amaika kulang su 'gkaumbal'ilan na papegkasakitan nu 'gkasaligan su manga kapatas a Israil a inibetad'ilan enggu nia nilan ibpagidsa na “Ngintu ka paidu bu i naumbal'u kagay taman saguna? Dikena den mana su nauna a 'gkaumbal'u.”
15 Sabap sa entu na nakambuku su manga kapatas lu kanu Piraun sa nia nilan pidtalu na “Ngin i nia ka maya i papegkaidan nengka sa lekami a manga panunugun nengka? 16 Pabpagumbalen kami nu sa budta a pinadtegas inunta na di kami nu den 'bpagenggan sa lagami, liu pan sa entu na papegkasakitan kami nu pan inunta na dikena lekami a kadupangan ka kanu manga taw nengka.” 17 Na nia bu pidtalu nu Piraun kanilan na “'Gkangapauk kanu bu ba a nan tembu ba a nan nia nu pegkiugan na sugutan ku sekanu sa makaganat kanu ka enggu kanu makagkurban kanu Kadenan nu a Mapulu. 18 Na makin embalingan kanu lu kanu manga galebekan nu. Ka da man menggay sa lekanu sa lagami. Ugaid'a maitu bun ba i kadakel a dait a umbalen nu a budta a pinadtegas na mana bun kanu danden.” 19 Sabap sa entu na nailay nu manga kapatas a manga taw a Israil i kapasang'u kambebetad'ilan sabap kanu kadtalu a entu a di kakulangan i kadakel'u 'bpagumbalen nilan a budta a pinadtegas uman gay.
Su Kinambuku nu Musa kanu Kadenan
20 Na guna mapasad embitiala nu manga kapatas su Piraun na nailay nilan su Musa enggu Harun a 'bpangangapa kanilan. 21 Daka nia nilan lun pidtalu na “Namba ka sekanu i pedsiksan nu Kadenan a Mapulu kanu pinggula nu a nia. Sabap sa lekanu na 'gkalipungetan kami nu Piraun taman kanu 'gkangaunutan. Timbang a sekanu bun i pebpagimatay sa lekami.”
22 Daka nangadap su Musa kanu Kadenan a Mapulu sa nia nin pidtalu na “Hu Kadenan ku a Mapulu, ngin i nia ka papegkapasangan nengka i manga taw a nia? Ngintu ka pinasia aku nengka pan? 23 Iganat den kanu kinadtalu ku kanu katigan nengka kanu Piraun na pinakapasangan nin den su manga taw nengka a Israil ugaid'a di nengka demun silan pedtabangan.”