6
Na nia pidtalu nu Kadenan a Mapulu kanu Musa na “Mailay nengka u ngin i pakaidan ku kanu Piraun. Sia makanggulalan kanu kabarakat ku na dikena bu sekanin matag makasugut sa kaawa nu ka sekanin pan i semekat mapaawa sa lekanu.”Su Kinasugu 'Bpaluman kanu Musa
2 Na pidtalu nu Kadenan kanu Musa i “Saki su Kadenan a Mapulu. 3 Na mibpayag aku a Kadenan a Barakat sa Langun kanu Ibrahim, Iskak enggu Yakub ugaid'a dala ku ipayag kanilan su ngala ku a Kadenan a Mapulu. 4 Nangaden aku sa kapasadan kanilan sa inggay ku kanilan su kalupan na Kanaan a pindilapuan nilan. 5 'Gkakineg ku su degeng'u manga taw a Israil sa kapapegkapasang kanilan sabap sa kabpangungulipen kanilan nu manga taw sa Egypt. Na di ku 'gkalipatanan su kapasadan ku. 6 Tembu edtalu ka kanu manga taw a Israil i saki su Kadenan a Mapulu a su Kadenan nu a mapambaya-baya sa lekanu sa kanu kapapegkapasang sa lekanu nu manga taw a Egypt. Sia makanggulalan kanu kabarakat ku na pambaya-bayan ku sekanu enggu ipatala ku kanu manga taw a Egypt su da idsan nin a kasiksan. 7 Na baluyn ku sekanu a manga taw ku enggu saki i mabaluy a Kadenan nu. Na katawan nu den i saki su Kadenan a Mapulu a su Kadenan nu a napambaya-baya sa lekanu sa kanu kapapegkapasang'u manga taw a Egypt. 8 Palun ku sekanu kanu kalupan a inibpasad ku kanu kaapuan nu a su Ibrahim, Iskak enggu Yakub taman sa ibpusaka ku sa lekanu su entu, ka saki man su Kadenan a Mapulu.”
9 Guna su maitu na inisampay mambu nu Musa su entu kanu manga taw a Israil ugaid'a da nilan pakikinega su Musa ka naawan den silan na inam sabap kanu kapasang'a 'gkatala nilan. 10-11 Daka pidtalu menem'u Kadenan a Mapulu kanu Musa i “Lu ka kanu Piraun ka edtalu ka lun i sugutan nin sa makaganat i manga taw a nan a Israil kanu dalepa nin.” 12 Ugaid'a nia inisumpat'u Musa kanu Kadenan a Mapulu na “Ilay ka ba! Saki pan a entu i 'bpakikinegen nu Piraun apia su manga taw a Israil na di aku nilan 'bpakikinegen? Di aku man mataw embibitiala.”
13 Na pidtalu nu Kadenan a Mapulu kanu Musa enggu Harun i pakatawan nilan kanu manga taw a Israil taman kanu Piraun i sinugu silan nu Kadenan sa kapaawa kanu manga taw a Israil sa kanu dalepa a Egypt.
Su Tarsilan pantag kanu Musa enggu Harun
14 Na nia ba su ama nu uman i sakambinabatan: Na su kaka sa langun a wata nu Israil a si Rubin na nia nin manga wata na si Hanuk, Palu, Hisrun enggu si Karmi. Silan ba a nia su manga muliataw nu Rubin.
15 Na si Simiun menem na nia nin manga wata a mama na si Yimuil, si Yamin, si Uhad, si Yakin, si Suhar enggu si Saul a nia nin ina na babay sa Kanaan. Na silan menem ba a nia su manga muliataw nu Simiun.
16 Na si Libi na nakagaus i umul'in sa magatus enggu telupulu enggu pitu lagun. Na nia su manga muliataw nu Libi sia kanu manga wata nin a mama a si Girsun, Kuhat enggu Mirari. 17 Na si Girsun a nia na nia nin manga wata a mama na si Libni enggu si Simi. Na silan ba a nia su manga muliataw nu Girsun. 18 Na nia menem manga wata a mama nu Kuhat na si Amram, Isar, Hibrun enggu si Usil. Na nakagaus i umul'i Kuhat sa magatus enggu telupulu enggu telu lagun. 19 Na si Mirari menem na nia nin manga wata a mama na si Mahli enggu Musi. Na silan ba a nia su manga muliataw nu Libi a nalabit sia kanu tarsilan nilan.
20 Na su Amram na nagkaluma nin su suled'u ama nin a babay a si Yukibid a nia nilan nambata na su Harun enggu su Musa. Na si Amram na nakagaus i umul'in sa magatus enggu telupulu enggu pitu lagun. 21 Na si Isar na nia nin manga wata a mama na si Kura, Nipig enggu si Zikri. 22 Na nia menem manga wata a mama nu Usil na si Misail, Ilsapan enggu Sitri.
23 Na nagkaluma nu Harun si Ilisaba a wata ni Aminadab a suled'i Nasun a nia nilan manga wata a mama na si Nadab, Abihu, Iliasar enggu si Itamar. 24 Na nia manga wata a mama ni Kura na si Asir, Ilkana enggu Abiasap. Na silan ba a nia su manga muliataw nu Kura.
25 Na si Iliasar a wata ni Harun na nia nin nagkaluma na isa kanu manga wata a babay ni Putil a nia nilan nambata a wata a mama na si Pinias. Na silan ba a entu su muliataw nu Libi.
26 Na su Harun ba a nia enggu su Musa i sinugu nu Kadenan a Mapulu a makapangunanan sa kanu kaawa nu manga taw a Israil sa kanu dalepa a Egypt a midsesenggaya silan sia luyud kanu tupu nu uman i isa. 27 Silan bun i mimbitiala kanu Piraun sa kapaawa kanu manga taw a Israil sa kanu dalepa a Egypt.
Su Kinasugu nu Kadenan kanu Musa enggu Harun lu kanu Piraun
28 Na kanu kinambitiala nu Kadenan a Mapulu kanu Musa lu sa Egypt, 29 na nia nin pidtalu na “Saki su Kadenan a Mapulu, na edtalu ka kanu Piraun su langun na pidtalu ku sa leka enggu su edtalun ku pan sa leka.” 30 Ugaid'a nia inisumpat'u Musa na “Panun ba man i kapakikineg'u Piraun sa laki? Di aku man mataw embibitiala.”