7
Na nia inisumpat'u Kadenan kanu Musa na “Baluyn ku seka a mana Kadenan kanu kaadapan nu Piraun enggu su suled'engka a si Harun i mabaluy menem a nabi a mapasampay sa bitiala. 2 Na langun a edtalun ku sa leka na isampay nengka menem kani Harun ka enggu sekanin menem i semampay lu kanu Piraun sa sugutan nin i makaganat den sa dalepa nin a Egypt su manga taw a Israil. 3 Ugaid'a pagkategasen ku su pamusungan nu Piraun sa apia madakel pan i ipailay ku a tanda a kagaipan sia kanu dalepa a Egypt 4 na dili bun makikineg sa lekanu. Ugaid'a ipatala ku kanu manga taw a Egypt su kasiksan sa kanu kapaliu ku kanu langun nu tupu nu manga taw ku a Israil sa kanu dalepa a Egypt. 5 Na amaika maitu na u magedam'u manga taw a Egypt su kapegkagaga ku enggu su kapaganat ku kanu manga taw a Israil kanu dalepa nilan na katawan nilan i saki ba su Kadenan a Mapulu.” 6 Na maitu den ba mambu i pinggula nu Musa enggu Harun. Pinaginugutan nilan su langun nu inisugu nu Kadenan a Mapulu kanilan. 7 Na su kinambitiala nilan kanu Piraun na nakawalupulu lagun i umul'u Musa enggu su Harun menem na nakawalupulu enggu telu lagun i umul'in.Su Tungked'u Harun a Mimbaluy a Nipay
8 Na pidtalu bun nu Kadenan a Mapulu kanu Musa enggu Harun i 9 “Amaika edtalun nu Piraun sa lekanu i mapailay kanu sa kagaipan na idtug'engka Harun su tungked'engka kanu kaadapan nu Piraun ka enggu embaluy a nipay.” 10 Daka linemu den mambu su Musa enggu Harun kanu Piraun ka pinggula nilan den su entu a inisugu nu Kadenan a Mapulu kanilan. Na inidtug mambu nu Harun su tungked'in kanu kaadapan nu Piraun enggu kanu manga 'gkangaunutan, na mimbaluy a nipay su tungked'in. 11 Guna su maitu na inipatawag'u Piraun su manga mategel mangalintaw enggu su mategel mangingilayan a manga taw nin, ka sia makanggulalan kanu kapegkagaga nilan na pinailingan nin kanilan su pinggula nu Harun. 12 Na uman i isa na minidtug kanu tungked'in na mimbaluy bun mambu a nipay ugaid'a lininu nu tungked'i Harun su manga tungked'ilan a entu. 13 Na apia ka maitu na mategas bun su pamusungan nu Piraun ka dala bun sekanin pakikineg kanilan a mana bun su kadtalu nu Kadenan a Mapulu.
Su Muna-muna a Siksa: Su Kinambaluy a Lugu nu Langun nu Ig sa Dalepa a Egypt
14 Na pidtalu menem'u Kadenan a Mapulu kanu Musa i “Mategas pamun su pamusungan nu Piraun ka di nin bun pedsugutan sa makaawa su manga taw a Israil. 15 Na namag sa mapita Musa, na lu ka kanu ligid'u lawas'a ig ka edtapik ka su tungked a mimbaluy pan a nipay ka angapi ka i kalu nu Piraun kanu lawas'a ig, 16 ka edtalu ka lun i ‘Pinasia aku nu Kadenan a Mapulu a Kadenan nu manga taw a Hibru ka ipapedtalu nin sa laki san sa leka su katigan nin a nia a “Suguti ka den sa makaganat su manga taw ku a Israil asal'a masimba aku nilan lu kanu tawan-tawan a dalepa kagina sampay saguna na di nengka bun silan pedsugutan.” 17 Tembu ipapedsampay nu Kadenan a Mapulu sa leka su katigan nin a nia a “Natalatantu a makilala nengka i saki ba su Kadenan a Mapulu. Ilay ka! Itapes ku kanu lawas'a ig su tungked a nia, na embaluy a lugu su ig 18 taman sa mamamatay su manga seda enggu 'gkadu su ig taman sa di den mapakay a inemen nu manga taw sa Egypt.” ’ ”
19 Na pidtalu pamun sa lekanin nu Kadenan a Mapulu i “Edtalu ka kani Harun i kuan nin su tungked'in ka ikayang'in ka enggu mabaluy a lugu su langun nu ig sa kanu dalepa a Egypt pagidsan i lawas'a ig, manga kakal, pawas, 'gkatingkungan a ig apeg den nu langun nu 'bpanaguan sa ig taman sa malapat'a lugu su kalupan nu Egypt.” 20 Na pinggula den nu Musa enggu Harun su entu a inisugu nu Kadenan a Mapulu kanilan, na inikayang'u Harun su tungked'in sia kanu kaadapan nu Piraun enggu kanu 'gkangaunutan. Entu pan ka initapes'in lu kanu ig na midsambuta demun i kinambaluy a lugu nu lawas'a ig 21 taman sa apia su langun nu ig sa kanu dalepa a Egypt na mimbaluy bun a lugu. Na namamatay su manga seda enggu migkadu su ig na di den kapakayan a inemen nu manga taw sa Egypt. 22 Ugaid'a sia nakanggulalan kanu kapegkagaga nu 'bpamangalintaw sa Egypt na nagaga nilan i entu miling tembu mategas bun su pamusungan nu Piraun ka da bun sekanin pakikineg kanu Musa enggu Harun a mana bun su kadtalu nu Kadenan a Mapulu. 23 Na makin minuli su Piraun ka da nin ipamamantag su entu a pinggula nilan. 24 Saleta mambu na pegkalut su manga taw sa Egypt kanu ligid'u lawas'a ig asal'a aden mainem'ilan ka di nilan den mainem su ig kanu lawas'a ig.
Su Ikadua a Siksa: Su manga Bakalat
25 Namakapitu gay den i naipus ulian nu kinapambaluy nu Kadenan a Mapulu kanu lawas'a ig sa lugu.