8
Na pidtalu menem'u Kadenan a Mapulu kanu Musa i “Lu ka kani Piraun ka edtalu ka i ipapedtalu nu Kadenan a Mapulu sa leka i ‘Suguti ka den sa makaganat su manga taw ku a Israil ka enggu silan makasimba sa laki. 2 Na amaika di ka semugut sa kaganat'ilan na tiuban ku su dalepa nengka sa madakel a bakalat 3 a makapenu kanu lawas'a ig taman sa mamedtepad lu kanu tulugan nengka taman den kanu bilik'engka apeg'u 'bpagigan nengka taman kanu manga kawalayan nu 'gkangaunutan enggu kanu manga walay nu manga taw nengka. Mameludep bun silan kanu manga 'bpangilutuan nu sa pan enggu lu kanu manga 'bpagusalen nu sa kabpagadum. 4 Na seka taman kanu manga taw nengka enggu kanu manga 'gkangaunutan na sampawan kanu nu madakel a bakalat.’ ”5 Pidtalu bun nu Kadenan a Mapulu kanu Musa i “Edtalu ka kani Harun i ikayang'in su tungked'in kanu manga lawas'u ig, kanu manga kakal enggu kanu manga pawas ka enggu makapenu su manga bakalat kanu langun nu entu kanu lusud'u Egypt.” 6 Na endaw demun i kinakayang'u Harun kanu tungked'in na namedsampaw den mambu su manga bakalat taman sa nakapenu den kanu kalupan nu Egypt. 7 Ugaid'a nagaga bun i entu miling'u 'bpamangalintaw nu Piraun a sia luyud kanu kapegkagaga nilan.
8 Na guna su maitu na inipatawag'u Piraun su Musa enggu su Harun ka pidtalu nin kanilan i “Ipangeni-ngeni nu kanu Kadenan a Mapulu sa iawa nin den i manga bakalat a nia sia sa lekami ka sugutan ku den sa makaganat i manga taw a Israil ka enggu silan makagkurban kanu Kadenan a Mapulu.” 9 Na nia inisumpat'u Musa kanu Piraun na “Uway mambu, edtalu ka bu sa laki u kanu i kiug'engka sa kapangeni-ngeni ku sa leka enggu kanu manga taw nengka taman den kanu manga 'gkangaunutan asal'a maawa su manga bakalat kanu walay nengka taman den kanu kawalayan nu manga taw nengka. Nia bu masama na su danden a bakalat a lu bu kanu lawas'u ig'u Nilu.” 10 Na nia inisumpat'u Piraun na “Namag bun a entu.” Na nia mambu inisumpat'u Musa na “Uway! Manggula su kiug'engka ka enggu nengka katawan i dala man pagidsan nu Kadenan a Mapulu a su Kadenan nami. 11 Na maawa su manga bakalat a nan kanu walay nengka taman den kanu kawalayan nu 'gkangaunutan enggu kanu walay nu manga taw nengka taman sa nia bu masama na su lu bun kanu lawas'a ig'u Nilu.”
12 Na ginemanat den mambu su Musa enggu su Harun lu kanu kaadapan nu Piraun, ka inipangeni-ngeni den nu Musa kanu Kadenan a Mapulu sa maawa den su manga bakalat a entu a inipatingguma nu Kadenan kanu Piraun. 13 Na pinakikineg mambu nu Kadenan a Mapulu su pangeni-ngeni nu Musa, ka namamatay su manga bakalat lu kanu manga walay nilan enggu kanu embala-bala taman den kanu 'bpangangawidan nilan. 14 Na pinadtatambaka nu manga taw a Egypt su manga bakalat a namamatay, na nakapenu su baw nin kanu lusud'u Egypt. 15 Na guna makasengaw su Piraun sa kanu tiuba a entu a natala nin na midtegas menem su pamusungan nin ka da nin bun pakikinega su Musa enggu su Harun a mana bun su kadtalu nu Kadenan a Mapulu.
Su Ikatelu a Siksa: Su manga Kasuk
16 Guna su maitu na pidtalu menem'u Kadenan a Mapulu kanu Musa i “Edtalu ka kanu Harun i ikayang'in su tungked'in ka itapes'in lu kanu lupa ka enggu mabaluy a kasuk su libubuk lu kanu lusud'u Egypt.” 17 Na pinggula nilan den mambu su entu. Endaw i kinatapes'u Harun kanu tungked'in lu kanu lupa na mimbaluy a kasuk su langun nu libubuk kanu lusud'u Egypt taman sa pibpudu-puduan nilan su manga taw taman den kanu manga binatang. 18 Na 'bpagilingan nu manga 'bpamangalintaw su entu sia luyud kanu kapegkagaga nilan ugaid'a da nilan magaga. Na magidsan pan i taw enggu binatang na dinudsukan nu kasuk. 19 Na nia nadtalu nu 'bpamangalintaw kanu Piraun na “Su Kadenan i minggula sa nia.”a Ugaid'a mategas bun su pamusungan nu Piraun ka dala nin bun pakikinega su Musa enggu su Harun a mana bun su kadtalu nu Kadenan a Mapulu.
Su Ikapat a Siksa: Su manga Langaw
20 Daka pidtalu nu Kadenan a Mapulu kanu Musa i “'Bpanay ka namag, lu ka kanu lawas'u ig ka 'bpelu ba su Piraun. Edtalu ka lun i nia ba su katigan nu Kadenan a Mapulu sa leka, ‘Suguti ka sa makaganat su manga taw ku ka enggu silan makasimba sa laki. 21 Amaika di nengka silan sugutan sa kaganat'ilan na patingguman ku sa leka su makapal a langaw taman den kanu manga taw nengka apeg'u 'gkangaunutan. Na makapenu i entu kanu walay nengka taman den kanu kawalayan nu manga taw nengka a Egypt. Na apia lu kanu liwawaw nu lupa a pendampuan nilan na aden. 22 Ugaid'a kanu entu ba a gay na ibida ku su dalepa a Gusin a pegkalebenan nu manga taw ku. Ka apia satiman a langaw na dala makatingguma kanilan ka enggu nengka katawan i saki ba su Kadenan a Mapulu apia kanu nia ba a dalepa. 23 Na isenggay ku su manga taw ku kanu manga taw nengka. Na namag bun a entu i kanggula ku kanu nia ba a tanda a kagaipan.’ ”
24 Na pinggula den mambu nu Kadenan a Mapulu su entu ka pinatingguma nin su makapal a langaw kanu walay nu Piraun taman kanu kawalayan nu manga taw nin. Na sangat a nakabinasa kanu lusud'u Egypt su entu.
25 Guna su maitu na inipatawag'u Piraun su Musa enggu su Harun ka pidtalu nin kanilan i “Uway! Sugutan ku den sekanu sa makagkurban kanu kanu Kadenan nu ugaid'a sia kanu bu kanu lusud'u Egypt.” 26 Na nia inisumpat'u Musa na “Di man mawagib i sia kami 'gkurban kanu Kadenan nami a Mapulu ka makangingilu i entu kanu manga taw a Egypt. Na amaika sia nami 'gkurbanan su Kadenan a Mapulu na mangingilu su manga taw a Egypt sa lekami na tabia bun ka pamalantayn kami nilan sa watu. 27 Na dait man a makalu kami kanu tawan-tawan a dalepa ka enggu kami makagkurban kanu Kadenan nami a Mapulu a mana su inisugu nin sa lekami. Na nasisita i telu gay i kalakaw nami sa entu.” 28 Na nia inisumpat'u Piraun na “Sugutan ku sekanu sa kagkurban nu kanu Kadenan nu a Mapulu lu sa tawan-tawan a dalepa ugaid'a da kanu bu gaid temangka. Na ipangeni-ngeni aku nu bu.” 29 Na nia mambu pidtalu nu Musa na “Uway! Na endaw i kaganat ku sia na ipangeni-ngeni ku kanu Kadenan a Mapulu i namag bun a entu na iawa nin den sa lekanu su makapal a nia a langaw. Ugaid'a di kami nengka menem magakali sa di nengka kasugut sa lekami sa kagkurban nami kanu Kadenan a Mapulu.”
30 Na guna su maitu na ginemanat den su Musa kanu kaadapan nu Piraun ka nangeni-ngeni kanu Kadenan a Mapulu. 31 Na pinakikineg mambu nu Kadenan a Mapulu su pangeni-ngeni nu Musa ka iniawa nin su manga langaw kanu walay nu Piraun taman kanu manga kawalayan nu manga 'gkangaunutan enggu kanu manga taw nin sa apia satiman na dala nasama lun. 32 Ugaid'a pinagkategas bun nu Piraun su pamusungan nin ka dala nin bun suguti sa makaganat su manga taw a Israil.