Su Ikalima a Siksa: Su Pakapatay a Sakit kanu manga Pangangayamen nu manga Taw a Egypt
9
Na nia menem pidtalu nu Kadenan a Mapulu kanu Musa na “Lu ka kanu Piraun ka edtalu ka lun i ipapedtalu nu Kadenan a Mapulu a Kadenan nu manga taw a Hibru i ‘Suguti ka den sa makaganat su manga taw ku ka enggu silan makasimba sa laki. 2 Ka amaika di nengka pamun silan sugutan sa kaganat'ilan 3 na saki demun i mapatingguma sa kanu mapasang a tiuba a mana su sakit a makapatay kanu manga pangangayamen nu apeg den nu manga kuda, kimar,a unta, sapi, bili-bili enggu su manga kambing'u. 4 Ugaid'a di ku iamung su manga pangangayamen nu manga taw ku a Israil sa apia satiman na da demun matay lun.’ ” 5 Na tinalanged den mambu nu Kadenan a Mapulu su gay a kanggula nin lun sa nia nin pidtalu na “Namag demun a entu i kapatingguma ku kanu nia ba a tiuba.”6 Na kanu temundug demun a gay na pinatingguma den ba nu Kadenan a Mapulu su entu a tiuba. Na langun nu pangangayamen nu manga taw a Egypt na naibped matay ugaid'a su langun nu pangangayamen nu manga taw a Israil na apia satiman na da demun minatay lun.
7 Na inipaamad'u Piraun su entu u benal a apia satiman na da demun minatay kanu pangangayamen nu manga taw a Israil. Ugaid'a apia ka maitu sa naamad'in sa apia satiman na da demun minatay lun na mategas pamun su pamusungan nu Piraun ka da nin bun suguti a makaganat su manga taw a Israil.
Su Ikanem a Siksa: Su Mawaga
8 Na guna su maitu na pidtalu nu Kadenan a Mapulu kanu Musa enggu Harun i “Akup kanu sa aw lu kanu pugun ka isambulak'engka Musa lu sa pulu lu kanu kaadapan nu Piraun 9 ka enggu maumbal a libubuk a makalapat kanu lusud'u Egypt a sabapan a kapamangetu na mawaga kanu manga taw a Egypt taman den kanu manga binatang.”
10 Daka minakup den mambu silan sa aw lu kanu pugun entu pan ka inisambulak'u Musa lu sa pulu kanu kaadapan nu Piraun a sabapan na kinapamangetu na mawaga kanu manga taw a Egypt taman den kanu manga binatang. 11 Na su 'bpamangalintaw na di nilan den 'gkagaga pedtindega su Musa ka pinamangetuan bun silan na mawaga a mana bun su langun nu manga taw a Egypt. 12 Ugaid'a pinadtegas bun nu Kadenan a Mapulu su pamusungan nu Piraun ka dala nin bun pakikinega su Musa enggu su Harun a mana bun su kadtalu nu Kadenan a Mapulu kanu Musa.
Su Ikapitu a Siksa: Su Kinaulan sa Ilu
13 Na pidtalu menem'u Kadenan a Mapulu kanu Musa i “'Bpanay ka lemu kanu Piraun ka edtalu ka lun i nia ba i ipapedtalu nu Kadenan a Mapulu a Kadenan nu manga taw a Hibru i ‘Suguti ka den sa makaganat su manga taw ku a Israil ka enggu silan makasimba sa laki. 14 Ka amaika di nengka silan sugutan na patingguman ku den sa leka enggu kanu manga taw nengka taman kanu manga 'gkangaunutan su sangat i kapasang'in a manga tiuba ka enggu nengka katawan i da man pagidsan ku i kapegkagaga nin sia sa dunia. 15 Na apia kanu nauna paman na mapakay a imatayan ku seka sa katiuba ku sa leka taman kanu manga taw nengka 16 ugaid'a da ku enggula i entu ka enggu nengka mailay su laki a kabarakat taman sa mabadtug su ingala ku kanu lusud'u dunia. 17 Ugaid'a seka na sampay saguna na ibpemamasela nengka pamun i ginawa nengka sa di nengka kapedsugut sa kaganat'u manga taw ku. 18 Na namag bun a entu kanu maya bun ba a kutika, na paulanen ku sa sangat i kapasang'in a ulan a ilu a dala pamun pagidsan nin iganat sa kinapangaden kanu dalepa a Egypt sampay den saguna. 19 Na pasugui ka Piraun su manga taw nengka sa isilung'ilan su manga pangangayamen nengka enggu su langun pan nu kaaden nengka a lu sa benday kagina magidsan pan i manga taw enggu pangangayamen a katabuan lu sa benday na nanget a matay u kadadsangan nu ulan a ilu.’ ”
20 Na su ped a 'gkangasaligan nu Piraun a nangagilekan kanu katigan a entu nu Kadenan a Mapulu na inisilung'ilan mamagayas su langun nu manga pangangayamen nilan enggu pinasilung'ilan bun su langun nu manga ulipen nilan. 21 Ugaid'a su dala pamamantag kanu katigan a entu nu Kadenan a Mapulu na pinadtaday nilan den su pangangayamen nilan taman kanu manga ulipen nilan lu kanu benday.
22 Na pidtalu bun nu Kadenan a Mapulu kanu Musa i “Ikayang'engka den su lima nengka ka enggu mulan den sa ilu kanu lusud'u Egypt. Na kaulanan su manga taw enggu su manga binatang taman den kanu langun nu pamumulanen nilan.” 23 Na inikayang den mambu nu Musa su tungked'in, daka midsambuta demun i kinadsalengan nu lugung enggu kinatalas'u kilat taman kanu lupa, ka pinaulan den nu Kadenan a Mapulu sa ulan a ilu kanu kalupan nu Egypt. 24 Na 'bpangiseg bun su kabpagulan sa ilu enggu su kapedtalas'u kilat. Na dala i nia pagidsan nin i kapasang'in a kinaulan sa ilu iganat kanu kinapangaden kanu dalepa a Egypt. 25 Na sangat a naminasakan su nia ba kanu manga taw enggu kanu langun nu binatang a natabu lu sa liu taman den kanu langun nu pamumulanen sa kanu kalupan nu Egypt. Na su manga palakayu-kayuan na nangatebped-tebped. 26 Na nia bu dala makalalagit kanu ulan a entu a ilu na su dalepa a Gusin a pegkalebenan nu manga taw a Israil.
27 Guna su maitu na inipatawag'u Piraun su Musa enggu Harun ka pidtalu nin kanilan i “Saguna a timpu na pedtaliman ku den i mindusa aku. Saki enggu su manga taw ku na nalimban, na saben-sabenal a 'gkabenalan kami nu Kadenan a Mapulu. 28 Na ipangeni-ngeni nu kanu Kadenan a Mapulu i patelenen nin den su kabpelugung a nia enggu kabpagulan sa ilu ka sugutan ku den sa makaganat kanu enggu di ku den a benal sekanu ungenen.”
29 Na nia inisumpat'u Musa na “Endaw i kaliu ku kanu nia a siudad na mangeni-ngeni aku den kanu Kadenan a Mapulu sa temelen den i kabpelugung a nia enggu kabpagulan sa ilu ka enggu nengka katawan i nia kigkuan kanu dunia na su Kadenan a Mapulu. 30 Ugaid'a 'gkatawan ku bun i seka enggu su manga 'gkangasaligan na dikena pamun 'gkangagilekan kanu Kadenan a Mapulu.”
31 Na nabinasa su manga pamumulanen a 'bpagumbalen a ginis enggu su bantad a barli kagina kanu nia a timpu na pedsabpeten den su bantad a barli enggu 'bpamangulak menem su manga pamumulanen a 'bpagumbalen a ginis. 32 Ugaid'a su ped a manga bantad na dala bun mabinasa kagina nauli i kinapangengetu nin.
33 Na daka ginemanat den mambu su Musa kanu kaadapan nu Piraun ka linemiu kanu siudad ka nangeni-ngeni kanu Kadenan a Mapulu. Daka tinemelen mambu su kabpelugung enggu su kabpagulan apeg'u kapendadsang'u ulan a ilu kanu kalupan. 34 Na guna menem mailay nu Piraun i tinemelen den su kabpelugung enggu su kabpagulan sa ilu na mindusa menem sekanin 'bpaluman. Na pinadtegas menem'u Piraun su pamusungan nin taman kanu manga 'gkangaunutan. 35 Na dala nin bun suguti sa makaganat su manga taw a Israil a mana bun su kadtalu nu Kadenan a Mapulu a sia nakanggulalan kanu Musa.