Su Ikawalu a Siksa: Su Makapal a Tapudi
10
Guna su maitu na pidtalu nu Kadenan a Mapulu kanu Musa i “Lu ka kanu Piraun ka pinadtegas ku menem su pamusungan nin apeg'u 'gkangaunutan. Na penggulan ku i nia ka enggu ku makapailay kanilan su manga tanda ku a kangagaipan 2 enggu mapanudtul'u kanu manga muliatawa nu u panun i kinapanama ku kanu manga taw a Egypt a sia nakanggulalan kanu kabarakat a inipailay ku kanilan. Na amaika maitu na katuntayan nu i saki ba su Kadenan a Mapulu.”3 Na linemu mambu su Musa enggu Harun kanu Piraun ka pidtalu nilan den i “Na ipapedtalu nu Kadenan a Mapulu a Kadenan nu manga Hibru i ‘Kanu pan basi i kapangalimbaba na ginawa nengka sa laki? Suguti ka su manga taw ku sa kaganat'ilan sia ka enggu aku nilan masimba. 4 Ka amaika dili nengka silan sugutan sa kaganat'ilan na namag bun a entu na patingguman ku kanu dalepa nengka su makapal a tapudi. 5 Na makapenu i nia kanu kalupan nengka taman sa di mailag su lupa sa kanu kakapal'in. Na ibpeden nilan su langun nu dala mabinasa sa kanu kinaulan sa ilu apeg den nu manga palakayu-kayuan a 'bpamangetu lu sa benday. 6 Na mamakapenu silan kanu manga walay nengka enggu kanu manga kawalayan nu 'gkangaunutan taman den kanu langun nu taw a Egypt. Na su maya ba i kapasang'in a manggula na dala pamun manggula kanu lusud'u Egypt iganat sa ganatan.’ ” Entu pan ka ginanatan nu Musa su Piraun.
7 Na nia pidtalu nu 'gkangasaligan nu Piraun sa lekanin na “Taman sa kanu pan basi i nia a kapapegkapasang sa lekitanu nu nia a taw? Suguti ka den man silan sa kaganat'ilan asal'a masimba nilan su Kadenan nilan a Mapulu. Di nengka 'gkailay i 'gkabinasa den su dalepa tanu a nia a Egypt?”
8 Na guna su maitu na pinambalingan nu Piraun su Musa enggu su Harun ka pidtalu nin i “Ganat kanu den ka enggu kanu makasimba kanu Kadenan nu a Mapulu ugaid'a entain ba i manga pabpagunuten nu?”
9 Na nia inisumpat'u Musa na “Langun nami, pagidsan i manguda atawa ka matua apeg den nu manga wata nami a babay-mama. Pananggiten nami bun su manga bili-bili, kambing enggu su manga sapi kagina pedsela-sela kami kanu Kadenan a Mapulu.” 10 Na nia menem pidtalu nu Piraun na “Uway, tapiden kanu nu Kadenan a Mapulu amaika sugutan ku sekanu sa kaganat'u sia a kaped su sakambinabatan nu, ugaid'a 'gkatusan a benal i aden 'gkapagitung'u a dikena mapia. 11 Na dili ku man i entu sugutan. Sekanu bu a manga mama i makaganat ka enggu makasimba kanu Kadenan nu a Mapulu a mana bun su 'bpangenin nu sa laki.” Na entu pan ka pinaawa silan nu Piraun kanu kaadapan nin.
12 Na nia pidtalu nu Kadenan a Mapulu kanu Musa na “Ikayang'engka su limab nengka ka enggu makatingguma su manga tapudi sia sa lusud'u Egypt. Na ibpeden nilan keman su langun nu nangasama a pamumulanen a dala mabinasa kanu kinaulan sa ilu.”
13 Daka inikayang den mambu nu Musa su tungked'in entu pan ka pinasanggiup'u Kadenan a Mapulu su sambel kanu kalupan nu Egypt a sia nakabpun sa sebangan kanu dalem'u nagagabian enggu nalalamagan. Na kanu kinagkapita na nakatingguma kanu kalupan nu Egypt su makapal a tapudi a nadtapik'u sambel. 14 Na nakalapat i entu kanu lusud'u Egypt. Na su maya ba i kakapal'in a tapudi na da pamun manggula sia sa Egypt iganat sa ganatan enggu di den i nia manggula 'bpaluman. 15 Na di den 'gkailag su lupa kanu kakapal'u tapudi. Na langun nu manga pamumulan a nangasama kanu kinaulan sa ilu na inibped'ilan keman apeg den nu unga nu palakayu-kayuan. Na da den mailay nengka a gadung pan, da den palakayu-kayuan, da den pamumulanen a nasama pan lu kanu manga benday.
16 Na inipatawag mamagayas'u Piraun su Musa enggu su Harun sa nia nin pidtalu kanilan na “Nakandusa aku kanu Kadenan nu a Mapulu taman sa lekanu. 17 Na ampun aku nu bu kanu nia ba a kinandusa ku enggu ipangeni-ngeni nu bu kanu Kadenan nu a Mapulu sa iawa nin den sa laki su tiuba a nia a pakapatay.”
18 Daka ginanatan nu Musa su Piraun ka nangeni-ngeni kanu Kadenan a Mapulu. 19 Daka pinasanggiup mambu nu Kadenan a Mapulu su sangat i kabagel'in a sambel a ebpun sa sedepan enggu makasedseg su manga tapudi lu kanu Maliga a Lagat. Na da mambu nasama a tapudi kanu lusud'u Egypt. 20 Ugaid'a pinagkategas bun nu Kadenan a Mapulu su pamusungan nu Piraun ka da nin bun suguti sa makaganat su manga taw a Israil.
Su Ikasiyaw a Siksa: Su Kinagkalibuteng'u Dalepa a Egypt
21 Na nia pidtalu nu Kadenan a Mapulu kanu Musa na “Ikayang'engka su lima nengka ka enggu pegkalibuteng sa tidtu-tidtu su lusud'u Egypt.” 22 Na inikayang den mambu nu Musa su lima nin, daka migkalibuteng mambu sa tidtu-tidtu su lusud'u Egypt kanu dalem'u telu gay. 23 Na da isa bu kanu manga taw sa Egypt i linemiu kanu manga walay nilan ka di den silan pamakapagilaga sa kalibuteng ugaid'a su pegkalebenan nu manga taw a Israil na dala 'gkalibuteng.
24 Na inipatawag menem'u Piraun su Musa ka pidtalu nin sa lekanin i “Ganat kanu den! Simba kanu den kanu Kadenan a Mapulu enggu paunut'u den su sakambinabatan nu ugaid'a itabun nu su manga pangangayamen nu.” 25 Ugaid'a nia inisumpat'u Musa lun na “Panun a entu i manggula nin? Suguti kami sa aden makagkurban nami kanu Kadenan a Mapulu. 26 Nasisita a mapananggit'ami su langun nu manga pangangayamen nami enggu apia satiman na dala matagak lun. Ka di nami pan katawan u ngin a pangangayamen i dait a makagkurban nami kanu Kadenan a Mapulu a su Kadenan nami, ka sekali nami pan katawan su entu na amaika lu kami den.”
27 Ugaid'a pinagkategas menem'u Kadenan a Mapulu su pamusungan nu Piraun ka da nin bun silan suguti sa makaganat 28 sa nia nin pidtalu kanu Musa na “Awa ka sia sa kasangulan ku'a! Da ka den mapailay sa laki 'bpaluman ka sa temundug a kailay ku sa leka, na matay ka den.” 29 Na nia inisumpat'u Musa na “Benal ka! Na mana bun su kadtalu nengka na di ku den seka mailay 'bpaluman.”