Su Kinapayag pantag kanu Kapatay nu Kaka sa Langun a Wata a Mama
11
Na saleta na nadtalu den nu Kadenan a Mapulu kanu Musa i “Mapatingguma aku pamun sa satiman a tiuba kanu Piraun taman kanu langun nu taw a Egypt. Na dikena bu sekanin matag semugut sa kaawa nu ka sekanin pan i mapaawa sa lekanu langun. 2 Na edtalu ka kanu manga taw a Israil magidsan pan i babay-mama i mamangeni silan sa bulawan enggu pilak sa kanu manga pagubay nilan a taw a Egypt.”3 Saleta mambu na kanu entu ba na pinagkalemek den nu Kadenan a Mapulu su pamusungan nu manga taw a Egypt sa kanu manga taw a Israil. Na sia kanu kapegkailay nu 'gkangasaligan nu Piraun taman kanu langun nu taw a Egypt na badtug a taw su Musa.
4 Na nia pan pidtalu nu Musa kanu Piraun na “Nia ba su katigan nu Kadenan a Mapulu, ‘Na magabi a entu sa kanu manga luk i gay na mukit aku kanu lusud'u Egypt. 5 Na mamamatay su langun nu manga kaka sa langun a wata a mama nu taw a Egypt iganat kanu kaka sa langun a wata a mama nu Piraun a pendatu taman den kanu manga kaka sa langun a wata nu mababa den sa langun a ulipena apeg den nu langun nu paganayan a pipis'u manga pangangayamen nu. 6 Na nia nengka bu makineg kanu lusud'u Egypt na su sangat i katanug'in a kabpaguliang, na da pamun i nia manggula iganat sa ganatan enggu di den i nia manggula 'bpaluman. 7 Ugaid'a lu kanu dalepa nu manga taw a Israil na dala makineg'engka lun a makaingel kagina da silan kagkaidi pagidsan i taw atawa ka pangangayamen, apia sangungu na asu na da makineg'engka. Na kanu maya ba a ukit na katawan nu i kapapembidaya nu Kadenan a Mapulu kanu manga taw a Israil sa kanu manga taw a Egypt.’ 8 Na semugiud sa laki su langun nu 'gkangaunutan sa nia nilan madtalu na ‘Ganat ka den enggu paunut ka su langun nu manga taw nengka.’ Na kanu entu bun ba a gay na gemanat aku mambu.”
Guna su maitu na ginemanat su Musa lu kanu kaadapan nu Piraun a 'gkasakit a benal i ginawa nin.
9 Na mana bun su pidtalu nu Kadenan a Mapulu kanu Musa a “Di kanu man pakikinegen nu Piraun ka enggu madakel pan i kagaipan a makapailay ku sia kanu lusud'u Egypt.” 10 Na pinggula nu Musa enggu Harun su langun nu entu a kangagaipan sia kanu kaadapan nu Piraun. Ugaid'a apia ka maitu na pinadtegas bun nu Kadenan a Mapulu su pamusungan nu Piraun sa di nin kapedsugut sa kanu kaganat'u manga taw a Israil kanu dalepa nin.