Su Kanduli nu Kalipuas enggu su Pan a Dala Pakembang'in
12
Na nia pan pidtalu nu Kadenan a Mapulu kanu Musa enggu Harun na 2 “Na su nia ba a ulan-ulan na nia ba i mabaluy a muna-muna a ulan-ulan sa lekanu. Na nia bun ba i mabaluy a ika-isa a ulan-ulan nu salagun sia sa lekanu. 3 Na edtalu nu kanu langun nu manga taw a Israil i su ikasapulu a gay kanu nia ba a ulan-ulan na magadil su uman i sakambinabatan sa satiman a manguda a bili-bili. 4 Na amaika su sakambinabatan ka paidu bu silan enggu di nilan maibped su satiman a bili-bili na inggay nin su sabad kanu pagubay nin ka embaden nilan sia kanu ngin i kadakel'ilan enggu sia kanu kadakel'u makakan lun. 5 Nia dait na mama a bili-bili atawa ka kambing a dala tila nin enggu nakasalagun pamun i umul'in. 6 Na tuganul'u muna su entu taman kanu ikasapulu enggu pat gay kanu nia ba a ulan-ulan. Entu pan ka kanu kadsukilep'in na sumbalin den nu manga taw a Israil su entu a pangangayamen. 7 Na kua kanu sa kanu lugu nu entu ka pangiguli nu su manga ligid enggu pulu nu bengawan nu walay a pegkanan nu kanu entu a pinanumbali. 8 Na kanu entu bun ba a magabi na kan nu su pinamagiaw nu a bili-bili atawa ka kambing apeg'u pan a da pakembang'in enggu su manga mapait a manga kamu. 9 Na di dait a ken nu su entu sa mailaw atawa ka tininda, ka pagiaw nu bu sa dala kulang'in apia su ulu enggu manga ay nin taman kanu manga tinay nin na di nu ibpagawa. 10 Na ibped'u keman su entu ka nia dait na dala kapitan lun, ka u aden masama lun na tutung'u. 11 Na sia kanu kapegkan nu na adil kanu den sa kaawa nu, nakambalegkas kanu den enggu nakabpakut kanu den taman sa nakasangan nu den su manga ampis'u ay nu enggu nakua nu den su manga tungked'u. Na pamagayas kanu kanu kapegkan nu, ka nia den ba su Kanduli nu Kalipuas'u Kadenan a Mapulu.a12 “Na kanu entu ba a magabi na mukit aku kanu lusud'u Egypt ka imatayan ku su langun nu kaka a wata a mama nu manga taw a Egypt apeg den nu paganayan a pipis'u manga pangangayamen nilan. Na siksan ku den su langun nu pegkakadenanen nu manga taw a Egypt ka saki man ba su Kadenan a Mapulu. 13 Na su lugu ba a entu a inibetad'u i mabaluy a tanda sa lu kanu ba pegkaleben, na u mailay ku su entu a lugu na lampasan ku su entu a walay. Na dili kanu makalalagit amaika siksan ku den su lusud'u Egypt.
14 “Na tanudi nu su entu a gay enggu idsela-sela nu uman lagun a Kanduli nu kanu Kadenan a Mapulu. Na su nia ba a atulan na inggulalan nu taman den kanu manga temundug pan a muliataw nu. 15 Na sia kanu dalem'u pitu gay na nia nu bu kan a pan na su pan a dala pakembang'in. Na kanu muna-muna demun a gay na iawa nu su langun nu pakembang kanu manga walay nu kagina apia entain i keman sa pan a aden pakembang'in iganat kanu entu ba a gay taman kanu ikapitu nin gay na ipitas kanu lumpukan nu manga taw a Israil. 16 Na kanu muna-muna a gay enggu kanu ikapitu nin gay na endidilimudan kanu enggu da kanu enggalebek ka simba kanu bu sa laki. Na nia tabia a manggalebek'u na su kapamaginatul'u bu kanu makan nu.
17 “Na idsela-sela nu su Kanduli nu Pan a Dala Pakembang'in a tademan kanu nia ba a gay a kinalipuas ku sa lekanu a manga taw a Israil sa dalepa a Egypt a midsesenggaya kanu sia luyud kanu tupu nu uman i isa enggu idsela-sela nu i nia taman kanu manga temundug pan a manga muliataw nu. 18 Na kanu magabi kanu ikasapulu enggu pat gay kanu muna-muna a ulan-ulan taman kanu magabi nu ikaduapulu enggu isa a gay kanu entu bun ba a ulan-ulan na nia nu bu kan a pan na su pan a dala pakembang'in. 19 Na kanu dalem'u pitu gay na dait a dala mailay a pakembang kanu lusud'u walay nu ka apia entain i keman sa aden pakembang'in magidsan pan i taw a Israil atawa ka dikena na ipitas kanu lumpukan nu manga taw a Israil. 20 Na apia endaw kanu nakambetad na da kanu a benal keman sa pan a aden pakembang'in ka nia nu bu kan a pan na su pan a dala pakembang'in.”
21 Na guna su maitu na inipatawag'u Musa su langun nu 'gkangaunutan nu manga taw a Israil ka pidtalu nin kanilan i “Kemua su langun nu sakambinabatan nu sa bili-bili ka sumbalin nilan ka idsela-sela nilan su Kanduli nu Kalipuas. 22 Na sia nu paigis su lugu nu entu kanu ladia entu pan ka kua kanu sa manga sapak'u kayub ka isumek'u ka ikigul'u kanu manga ligid enggu pulu nu bengawan nu. Na dala lemiu kanu manga walay taman sa mapita. 23 Ka amaika mukit su Kadenan a Mapulu ka imatayan nin den su kaka a wata a mama nu manga taw a Egypt na lampasan nin su manga walay amaika aden mailay nin lun a lugu lu kanu manga ligid enggu pulu nu bengawan nin. Na di nin sugutan a makaludep kanu manga walay nu su 'bpangimatay kanu manga kaka a wata a mama.
24 “Na su nia a atulan na dait a inggulalan nu taman den kanu manga muliataw nu taman sa taman. 25 Na amaika makalu kanu den kanu kalupan a inibpasad'u Kadenan a Mapulu a ibpagenggay nin sa lekanu na patalus'u bun su nia ba a penggulan. 26 Na amaika idsa nu manga wata nu i ‘Ngin i maena nu nia ba a penggulan?’ 27 na nia nu edtalu na ‘Nia ba su kurban nu Kanduli nu Kalipuas a kapedsela-sela kanu Kadenan a Mapulu kagina linampasan nin su manga walay tanu a manga taw a Israil lu sa Egypt kanu timpu a kinapangimatay nin kanu manga kaka sa langun a wata a mama nu manga taw a Egypt.’ ”
Na guna mapasad edtalu nu Musa su entu na sinemugiud su manga taw a Israil ka sinimba nilan su Kadenan a Mapulu. 28 Na pinaginugutan mambu nu manga taw a Israil su inisugu nu Kadenan a Mapulu kanu Musa enggu Harun.
Su Ikasapulu a Siksa: Su Kapatay nu Kaka sa Langun a Wata a Mama nu manga Taw a Egypt
29 Na kanu entu bun ba a magabi sa kanu luk i gay na inimatayan nu Kadenan a Mapulu su langun nu kaka a wata a mama sa Egypt iganat kanu kaka a wata a mama nu Piraun a pendatu kanu Egypt taman den kanu kaka a wata a mama nu manga bilanggu. Inimatayan nin bun su langun nu paganayan a pipis'u manga pangangayamen nilan. 30 Na kanu entu bun ba a magabi na nakagedam su Piraun enggu su manga 'gkangaunutan taman den kanu manga taw a Egypt. Na sangat a mapasang a kinapamanguliang'u manga taw a Egypt kagina dala isa bu a walay i dala minatay lun. 31 Na kanu entu bun ba na pinasuguan nu Piraun su Musa enggu su Harun ka inipadtalu nin kanu sinugu nin i “Awa kanu den langun! Ganati kami nu den ka enggu kanu den makasimba kanu Kadenan nu a Mapulu a mana su pedtalun nu a entu. 32 Na pananggit'u den su langun nu pangangayamen a mana su pedtalun nu, ka awa kanu den, ugaid'a ipangeni-ngeni aku nu bu kanu Kadenan nu a Mapulu sa latan aku nin sa nanam.”
33 Saleta mambu na su manga taw a Egypt na pinapamagayas'ilan den mapaganat su manga taw a Israil lu kanu dalepa nilan ka nia nilan 'gkadtalu na “Maibped tanu den matay.” 34 Na ginemanat den mambu su manga taw a Israil a pinamusay nilan su manga inadum a arina a dala pakembang'in enggu dala den maawa kanu inaduman lun ka pinutus'ilan bu kanu balegkas'ilan. 35 Saleta mambu na napaginugutan den nu manga taw a Israil su kadtalu nu Musa kanilan a mamangeni silan kanu manga taw a Egypt sa manga bulawan, pilak enggu balegkas. 36 Na inenggay nilan mambu su entu sabap sa inipagkahanda nu Kadenan a Mapulu kanu manga taw a Egypt i kasuatan nilan su manga taw a Israil. Na kanu maya ba a ukit na nakua nilan su manga kaaden nu manga taw a Egypt.
Su Kapabpeliu kanu manga Taw a Israil lu sa Egypt
37 Na iganat sa dalepa a Ramisis 'bpawang sa dalepa a Sukut na linemalag bu su manga taw a Israil. Na manga nem gatus ngibu i kadakel'u manga mama bu liu pan su manga babay enggu manga wata 38 apeg'u manga lapu a minunut sa kanilan taman den kanu madakel a benal a pangangayamen nilan magidsan pan i kambing, bili-bili atawa ka sapi. 39 Na inilutu nilan su nadtapik'ilan a entu a inadum a arina a dala pakembang'in a da nilan malakay milutu sa kanu kabpamagayas'ilan pengganat lu sa Egypt.
40 Na nakapat gatus enggu telupulu lagun i kinagkakaleben nu manga taw a Israil lu sa Egypt. 41 Na kanu kinaipus'u pat gatus enggu telupulu lagun na nakaganat silan kanu dalepa a Egypt. Na entu demun ba a gay na nakaganat silan langun a manga taw nu Kadenan a Mapulu a nakadsesenggaya sia luyud kanu tupu nu uman i isa. 42 Na kanu magabi ba a entu a kinaganat'ilan lu na tiniakapan silan nu Kadenan a Mapulu. Na iganat sa entu ba a timpu na uman lagun na ipedsela-sela nilan su kinatiakap'u Kadenan sa kanilan. Na taman kanu manga temundug pan a manga muliataw nilan na ipedsela-sela nilan bun su entu.
Su Atulan nu Kanduli nu Kalipuas
43 Na pidtalu nu Kadenan a Mapulu kanu Musa enggu Harun i “Nia ba i atulan kanu Kanduli nu Kalipuas, na di dait a keman su manga lapu kanu manga pegken a pinagadil kanu entu a Kanduli. 44 Ugaid'a su ulipen a napamasa na mapakay a keman amaika napaletak den silan. 45 Na di bun 'gkaalus a keman su manga lapu a gumagalebek a pembayadan. 46 Na su sinumbali kanu kanduli na sia bu pegken kanu ludep'u walay, di 'gkaalus a iliu kanu walay enggu di bun mapakay a panebpeden su manga tulan nin. 47 Na dait a idsela-sela i nia nu langun nu manga taw a Israil. 48 Na amaika aden manga lapu sia kanu pegkalebenan nu i miug mamung sa lekanu kanu kapedsela-sela nu kanu Kanduli nu Kinalipuas'u Kadenan a Mapulu na nia dait na mapapaletak muna su langun nu mama nu sakambinabatan nilan. Na entu pan ba ka malusud silan kanu manga taw a Israil enggu makaamung silan kanu entu a kapedsela-sela. Ugaid'a di mapakay a makakan kanu kanduli su taw a da mapaletak. 49 Na su nia ba a atulan na nakabpaliugat kanu langun nu manga taw a Israil taman den kanu manga lapu a nakasimbul sa lekanu.”