Su manga Atulan kanu Kapegkalendem kanu Kinapalipuas'u Kadenan a Mapulu kanu manga Taw a Israil
13
Daka pidtalu nu Kadenan a Mapulu kanu Musa i 2 “Iumun nu sa laki su langun na kaka sa langun a wata ka su langun na kaka sa langun magidsan pan i taw a Israil atawa ka pangangayamen nu na laki.”3-4 Na pidtalu mambu nu Musa kanu manga taw a Israil i “Tanudi nu su nia ba a gay, su gay a kinapaliu sa lekanu nu Kadenan a Mapulu kanu dalepa a Egypt a nangungulipen sa lekanu ka su kinapaliu nin sa lekanu na sia nakanggulalan kanu tidtu-tidtu a kapegkagaga nin. Na nia natabu kanu kinapaliu a entu sa lekitanu na ulan-ulan na Abib.a Na da kanu keman sa pan a aden pakembang'in. 5 Na amaika makapalu kanu den nu Kadenan a Mapulu kanu kawasa a kalupan a dalepa nu manga taw a Kanaan, manga taw a Hit, manga taw a Amur, manga taw a Hib enggu manga taw a Hibus a mana bun su inibpasad'u Kadenan kanu manga kalukesan nu a ibpagenggay nin sa lekanu, na uman mauma su nia ba a timpu kanu maya bun ba a manga gay na idsela-sela nu.” 6 Na kanu dalem'u pitu gay na nia nu bu kan a pan na su pan a da pakembang'in. Na kanu ikapitu nin gay na endidilimudan kanu ka idsela-sela nu su Kadenan. 7 Na nia nu bu kan a pan na su pan a da pakembang'in kanu dalem'u pitu gay. Dait a dala mailay a pakembang sa apia endaw kanu lusud'u 'gkasakupan nu.
8 “Na sia kanu kapedsela-sela nu na patuntayi nu i nia ba kanu manga wata nu sa nia nu edtalu kanilan na ‘Penggulan tanu i nia a tademan kanu ngin i pinggula nu Kadenan a Mapulu kanu kinapaliu nin sa lekami kanu dalepa a Egypt.’ 9 Na su kapedsela-sela a entu na mabaluy a tanda sia kanu lima nu enggu sia kanu edtumegan nu kilay nu asal'a makalangag'u su kasuguan nu Kadenan kagina su kinapalipuas'u Kadenan sa lekanu kanu dalepa a Egypt na sia nakanggulalan kanu tidtu-tidtu a kapegkagaga nin. 10 Na inggulalan nu su nia ba a atulan kanu uman lagun kanu maya bun ba a timpu.
Su Kinaumun kanu Kaka sa Langun a Wata a Mama kanu Kadenan
11 “Na amaika makapalu kanu den nu Kadenan a Mapulu kanu dalepa nu manga taw sa Kanaan a mana su inibpasad'in sa lekanu enggu kanu manga kalukesan nu enggu ibpagenggay nin den i entu sa lekanu 12 na iumun nu den kanu Kadenan a Mapulu su langun nu kaka sa langun a wata a mama apeg'u paganayan a pipis'u pangangayamen nu, ka su langun nu entu na umun den kanu Kadenan. 13 Ugaid'a su paganayan a pipis'u kimar na mapakay a maaun sa manguda a bili-bili. Na amaika di maaun na dait a lepun su lig'in. Na su kaka sa langun a manga wata nu a mama na nasisita a maaun nu.
14 “Na sia kanu manga mauma a timpu ka idsa nu manga muliataw nengka u ngin i maena nu nia ba na nia ka edtalu na ‘Sia kanu tidtu-tidtu a kapegkagaga nu Kadenan a Mapulu na pinaliu kami nin kanu dalepa a Egypt a su dalepa a nangungulipen sa lekami. 15 Na sabap sa da kasugut'u Piraun sa kaganat'ami na inimatayan nu Kadenan a Mapulu su langun na kaka sa langun a wata a mama kanu dalepa a Egypt magidsan pan i taw atawa ka paganayan a pipis'u pangangayamen. Na nia ba i sabap'in ka ipegkurban tanu kanu Kadenan a Mapulu su paganayan a mama a pipis'u pangangayamen tanu enggu 'gkaaun tanu su kaka sa langun a wata tanu a mama.’
16 “Na mabaluy i nia a tanda kanu lima nu enggu kanu edtumegan nu kilay nu kagina su kinaliu tanu kanu dalepa a Egypt na sia nakanggulalan kanu tidtu-tidtu a kapegkagaga nu Kadenan a Mapulu.”
Su Kinatiakap'u Kadenan kanu manga Taw a Israil kanu Kabpelalakaw nilan
17 Guna su sinugutan nu Piraun su manga taw a Israil sa kaganat'ilan lu, na dala silan paukita nu Kadenan lu kanu lalan a 'bpawang sa kalupan nu manga taw a Pilistin sa apia nia nin kaaden i entu ba i mapantek a lalan. Ka nia napagitung'u Kadenan a Mapulu na “Tabia bun ka makambunua silan na edsalin i itungan nilan ka embalingan silan sa dalepa a Egypt.” 18 Na tembu ba pinalibet pan nu Kadenan i kinapaukit'in kanu manga taw a Israil lu kanu tawan-tawan a dalepa a 'bpawang kanu Maliga a Lagat. Na kanu kinaganat'ilan sa Egypt na adil silan sa kambunua.
19 Na pinananggit'u Musa su manga tulan nu Yusup kanu kinaganat'ilan lu sa Egypt kagina entu ba i inibpaliugat'u Yusupb edtutuma kanu manga taw a Israil sa nia nin kadtalu na “Natatalanged i edtabangan kanu nu Kadenan. Na kanu kaganat'u sia na pananggit'u su manga tulan ku.”
20 Na ginemanat den mambu silan kanu dalepa a Sukut, na midtangen muna silan kanu dalepa a Itam, lu kanu ligid'u tawan-tawan a dalepa. 21 Na kanu kabpelalakaw nilan na pedtapiden silan nu Kadenan a Mapulu ka amaika malamag na 'bpangunanan kanilan su mana palaus a gabun, na amaika magabi menem na 'gkatayawan silan nu mana palaus a apuy ka enggu apia magabi atawa ka malamag na makatalus silan kanu kabpelalakaw nilan. 22 Na dala a benal silan tagaka nu gabun kanu timpu nu malamag, maitu bun su apuy kanu timpu menem'u magabi, ka lalayun kanilan 'bpangunanan su entu.