14
Na pidtalu menem'u Kadenan a Mapulu kanu Musa i 2 “Edtalu ka kanu manga taw a Israil i embalingan silan ka lu silan edtangen kanu kasangulan nu dalepa a Pi-hahirut a masupeg kanu dalepa a Baal-Sipun a pageletan nu dalepa a Migdul enggu kanu Maliga a Lagat. Na talatantu ka i lu silan edtangen kanu ligid'u lagat kanu lipag demun nu dalepa a entu 3 ka enggu nia mapagitung'u Piraun na 'gkangatadin kanu a manga taw a Israil lu kanu ligid'u tawan-tawan a dalepa sa di nu 'gkatawan u endaw kanu lemiu. 4 Na pagkategasen ku menem su pamusungan nu Piraun ka enggu kanu nilan maseled ugaid'a ipagedam ku sa lekanin taman kanu manga sundalu nin su kabarakat ku asal'a katawan nu manga taw a Egypt i saki ba su Kadenan a Mapulu.” Na pinaginugutan den mambu nu manga taw a Israil su entu.5 Na guna makineg'u Piraun i nakaganat den su manga taw a Israil na midsalin i pamikilan nin taman den kanu 'gkangaunutan sa nia nilan nadtalu na “Ngin i pinggula tanu a nia ka nasugutan tanu silan sa makaganat? Na da den mapanunugu tanu.” 6 Na guna su maitu na pinapagadil'u Piraun su manga pabubunua nin a pakakalisa enggu su manga sundalu nin. 7 Ka pinaunut'in su nem gatus a mangategel i kambunua nin a pakakalisa taman den kanu langun nu pakakalisa kanu lusud'u Egypt. Na uman i sakakalisa na aden mapulu nin. 8 Na saleta mambu na pinadtegas menem'u Kadenan a Mapulu su pamusungan'u Piraun asal'a maseled'ilan su manga taw a Israil a 'bpelalakaw sa dala geda-geda nin. 9 Na daka sineled den silan nu manga sundalu nu Piraun apeg den nu manga pakakalisa nin na nasaut'ilan su manga taw a Israil lu kanu ligid'u lagat a masiken kanu Pi-hahirut kanu kasangulan nu Baal-Sipun.
10 Na endaw i kinasandeng'u manga taw a Israil sa pakauma den su manga taw a Egypt enggu su Piraun na sangat a nangagilekan silan taman sa nakapaguguliang silan sa kabpangeni sa tabang kanu Kadenan a Mapulu 11 sa nia nilan nakambuku kanu Musa na “Ngintu, dala den 'gkalebengan sa lekami lu sa Egypt ka inanggit kami nengka pan sia sa tawan-tawan a nia a dalepa asal'a sia kami matay? Na ilay ka i 'gkanggula nami a nia sa kinaanggit'engka sa lekami sia. 12 Dikena ba pidtalu nami den sa leka sa kinaganat tanu pan sa Egypt i padtaday kami den ka nia nami pan tinemu i mapangungulipen kami nu manga taw a Egypt kumin sa sia kami matay sa tawan-tawan a nia a dalepa?”
13 Na nia pidtalu nu Musa na “Salig kanu man, da kanu magilek ka saguna na mailay nu u panun i kalipuas'u Kadenan a Mapulu sa lekanu ka iganat saguna na dili nu den mailay 'bpaluman i manga taw ba a nan a Egypt. 14 Na tembu ba patana kanu den ka su Kadenan a Mapulu demun i maninindeg sa lekanu.”
Su Kinalipag'u manga Taw a Israil kanu Lagat
15 Na pidtalu menem'u Kadenan a Mapulu kanu Musa i “Ngintu ka pedtawagen aku nengka pan? Edtalu ka sa manga taw a nan i temalus den silan. 16 Na seka menem na ikayang'engka su tungked'engka kanu lagat ka enggu edsisi su entu ka enggu kanu makalipag sa kanu mamala a lupa lu kanu luk'u lagat. 17 Na makin ku pagkategasen su pamusungan nu manga taw a Egypt ka enggu kanu nilan matundug, ka kanu maya ba a ukit na makapailay ku su kabarakat ku a sia makanggulalan kanu ngin i manggula nu Piraun taman kanu manga sundalu nin apeg den nu manga pakakalisa nin. 18 Na sabap sa kanu kabarakat ku a entu na katawan nu manga taw a Egypt i saki ba su Kadenan a Mapulu.”
19 Na saleta mambu na su malaikat'u Kadenan a 'bpangunanan kanu manga taw a Israil kanu kabpelalakaw nilan na lu midtampal sa ulian enggu su gabun a mana palaus na lu bun sa ulian 20 ka mibpagelet kanu manga taw a Egypt enggu kanu manga taw a Israil. Na maliwanag kanu temampal sa manga taw a Israil na malibuteng menem kanu temampal sa manga taw a Egypt tembu di silan pakadsupegaya kanu kalalamagan.
21 Na guna su maitu na inikayang den nu Musa su tungked'in kanu lagat. Na kanu nalalamagan na pinasanggiup'u Kadenan a Mapulu su mabagel a sambel ganat sa sebangan, na midsisi su lagat enggu migkamala sia sa luk a mana lalan a mamala. 22 Na nakalipag su manga taw a Israil sa nia nilan linalakawan na su mana lalan a mamala lu kanu luk'u midsisi a lagat a mana nakalending su ig kanu duakambala kanilan.
23 Na daka pinaneled silan nu langun nu pakakalisa nu Piraun taman kanu langun nu sundalu nin lu kanu luk'u lagat. 24 Na kanu 'gkatibuas na inilay nu Kadenan a Mapulu su manga sundalu nu Piraun lu kanu mana palaus a gabun enggu apuy ka binulibug'in silan. 25 Na pinamingig'in su manga tilikan nu manga kalisa nilan ka enggu silan 'gkapasangan mapadtalaguy taman sa nia nilan nadtalu na “Telenan tanu den i manga taw a nia ka su Kadenan demun a Mapulu i 'gkagkuntela tanu.” 26 Na daka pidtalu menem'u Kadenan a Mapulu kanu Musa i “Ikayang'engka menem su tungked'engka lu kanu lagat ka enggu 'gkadtikupan na ig su manga taw a Egypt apeg'u manga kalisa nilan taman kanu manga kuda nilan.” 27 Daka inikayang den mambu nu Musa su lima nin kanu lagat na kanu 'gkatibuas na nagulit su lagat. Saleta mambu na 'bpaginapas a benal su manga taw a Egypt sa katepad'ilan lu ugaid'a makin silan pinageled'u Kadenan a Mapulu. 28 Na naibped maled su langun nu pakakalisa nu Piraun taman kanu manga sundalu nin a naneled kanu manga taw a Israil. Na apia sakataw na dala nasama kanilan. 29 Ugaid'a su manga taw a Israil na mapia a benal i kinalipag'ilan kanu mamala a lalan a mana nakalending kanilan su ig kanu duakambala. 30 Na kanu entu ba a gay na inilipuas'u Kadenan a Mapulu su manga taw a Israil kanu manga taw a Egypt, nailay demun nu manga taw a Israil su manga bangkay nu manga taw a Egypt a nakadsambayak lu kanu ligid'u lagat. 31 Na guna mailay nu manga taw a Israil su kabarakat'u Kadenan a Mapulu a sia nakanggulalan kanu pinggula nin kanu manga taw a Egypt na naadenan silan na gilek kanu Kadenan a Mapulu enggu pinaginugutan nilan su panunugun nin a su Musa.