Su Sengal'u Kinapanaban
15
Guna su maitu na midsengal su Musa enggu su manga taw a Israil sa kapugi kanu Kadenan a Mapulu sa nia nilan ipedsengal na“Hu Kadenan a Mapulu na pedsengalan ku seka sa kapugi kanu dala idsan nin a kinapanaban nengka, inigeled'engka kanu lagat
su kuda enggu su manga pakakalisa.
2 Seka a Kadenan a Mapulu i bagel ku, seka i sabapan nu kapedsengal ku,
seka su kalipuasan ku,
seka su Kadenan ku a pebpugin,
seka su Kadenan nu kalukesan ku a dait a pebpugin.
3 Seka su 'bpaninindeg
a bedtuan sa Kadenan a Mapulu.
4 Na sia kanu lagat na namakageled su manga pakakalisa nu Piraun.
Sia kanu Maliga a Lagat na nangaled su manga mapulu nu pakakalisa nin.
5 Pidtikupan silan nu ig,
mana silan watu a namakagaled kanu kadaleman.
6 Hu Kadenan a Mapulu na dala pagidsan nu kapegkagaga nengka,
dala pagidsan nu kabagel'engka ka malupet-lupet su kuntela nengka.
7 Su dala idsan nin a kapegkagaga nengka i nakatalaw kanu kuntela nengka.
Kanu lipunget'engka na mana silan mangagangu a utan a 'gkatutung.
8 Kanu sengaw bu nu napas'engka na midsisi su lagat
a mana nakalending,
su didalem'u lagat na midtegas.
9 Nia kadtalu nu kuntela na
‘Seleden ku silan ka natalatantu a masaut ku,
enggumakeden ku su langun nu kaaden nilan sia kanu kapegkagaga ku
enggu kanu matalem ku na maibped-ibped silan.’
10 Ugaid'a kanu sanggiup'u napas'engka na nakatanggub kanilan su lagat,
mana bun silan kamanga a nakageled kanu kadaleman.
11 Hu Kadenan a Mapulu na dala man pagidsan nengka,
ka pegkakadenanen bu su langun nu ped. Kaadenan na gilek su manga taw sabap kanu makagaip-gaip a enggulan nengka.
Su kasuti nengka na dala pagidsan nin, su kabarakat'engka na dala lemawan lun.
12 Inikayang'engka bu su lima nengka
na pidtikupan silan nu lupa.
13 Sia kanu dala idsan nin a limu nengka na inagak'engka su manga taw a inilipuas'engka.
Pinangunanan nengka silan sia makanggulalan kanu bagel'engka 'bpawang kanu suti a dalepa nengka.
14 Su manga bangsa a nakakineg na kinemegkel'a gilek,
su manga taw a Pilistin na kinukuk'a gilek.
15 Su 'gkangaunutan nu manga taw a Idum na linansi na gilek,
su manga mapulu nu Muab na kinukuk'a gilek,
enggu su manga taw sa Kanaan na mana 'gkatunag'a gilek.
16 Sabap kanu dala idsan nin a kabarakat'engka
na gilek enggu tiagka i nagedam'ilan
a mana den silan watu a di pakanggagalebek gagalu nu kabpagukit'u manga taw nengka
a inilipuas'engka kanu manga kuntela nilan.
17 Hu Kadenan a Mapulu, 'bpananggiten nengka silan kanu palaw a ipebpusaka nengka,
taman sa lu nengka ba silan pagkalebenen kanu entu a 'bpayagan nengka,
su dalepa a inidtakena nengka kanu walay nengka a suti.
18 Su Kadenan a Mapulu i endatu taman sa taman.”
19 Guna den makalipag su manga taw a Israil a lu minukit kanu lalan a mamala lu kanu luk'u lagat na pinadtikupan nu Kadenan su manga kuda enggu su manga pakakalisa nu Piraun lu kanu lagat. 20 Saleta na su suled'i Harun a si Mariam a tinulunan nu Kadenan sa kapayag kanu kadtalu nin na kinemua sekanin sa tambul ka pinangunanan nin su manga babay sa kadtambul sa kanggalaw-galaw nilan. 21 Na pidsengalan silan ni Mariam sa
“Edsengalan tanu su Kadenan a Mapulu kanu dala idsan nin a kinapanaban nin, ka inigeled'in kanu lagat su manga kuda enggu su pakakalisa.”
Su Ig a Mapait
22 Na iganat kanu Maliga a Lagat na pinangunanan nu Musa su manga taw a Israil sa kinalu nilan kanu tawan-tawan a dalepa a Sur. Na nakatelu gay den i kabpelalag'ilan kanu tawan-tawan a dalepa na dala 'gkatun nilan a ig. 23 Na guna silan makauma kanu dalepa a bedtuan sa Mara na dili nilan 'gkainem su ig lu kagina mapait, tembu binedtuan su entu a dalepa sa Mara.a 24 Na guna su maitu na mimbuku silan kanu Musa sa nia nilan pidtalu na “Panun i kainem tanu?” 25 Daka nangadap su Musa kanu Kadenan, na inipailay nu Kadenan sa lekanin su tebped a kayu, na guna nin idtug su entu lu kanu ig na naawa su kapait'u ig.
Na minenggay lu ba su Kadenan a Mapulu sa atulan ka enggu nin silan kailayanan 26 sa nia nin pidtalu na “Amaika ka pakikinegen nu sa mapia su kadtalu ku enggu enggalebeken nu su ngin i matidtu taman sa inggulalan nu su langun nu kasuguan ku na di ku ipatala sa lekanu su manga sakit a inipatala ku kanu manga taw a Egypt kagina saki man ba su Kadenan nu a Mapulu a papegkapia sa kanu manga sakit'u.”
27 Na nakauma menem silan kanu dalepa a Ilim, na aden lu ba sapulu enggu dua a kalut enggu pitupulu pun a libi taman sa lu demun pan ba silan midtangen.