Su Pegken a Inenggay nu Kadenan
16
Na iganat sa dalepa a Ilim na nakauma menem su langun nu manga taw a Israil kanu tawan-tawan a dalepa a Sin a pageletan nu dalepa a Ilim enggu Sinai. Na nakauma silan lu kanu ikasapulu enggu lima gay kanu temundug a ulan-ulan sa kanu kinaganat'ilan lu kanu dalepa a Egypt. 2 Na mimbuku menem su manga taw a Israil kanu Musa enggu Harun lu kanu tawan-tawan a dalepa. 3 Na nia nilan lun pidtalu na “Namba ka lu kami den inimatayan nu Kadenan a Mapulu kanu dalepa a Egypt, ka lu na pakakan kami sa sapu na pangangayamen enggu manga pegken sa endaw i taman na kiug'ami. Ugaid'a sekanu na pinananggit kami nu sia kanu tawan-tawan a nia a dalepa ka 'bpagimatayan kami nu sa gutem.”4 Daka nia pidtalu nu Kadenan a Mapulu kanu Musa na “Ilay nu ka enggan ku sekanu sa makan a ebpun sa sulega. Na uman i isa na kemua sa endaw i nasisita nin kanu uman gay. Ka nia ba i ukit a kailay ku u paginugutan nilan su atulan ku atawa ka dili. 5 Na ugaid'a kanu ikanem'in gay na takep i kuan nu uman i isa kumin kanu manga nangaipus a gay, na adilen nilan su entu.”
6 Guna su maitu na nia pidtalu nu Musa enggu Harun kanu langun nu manga taw a Israil na “Saguna a magabi na maamad'u i su Kadenan a Mapulu i napaliu sa lekanu lu kanu dalepa a Egypt. 7 Na namag menem sa mapita na mailay nu su sigay nin ka nakasampay man sa lekanin su manga kapembuku nu, na dikena sekami i 'gkasungkang'u ka su Kadenan a Mapulu ka entain kami man a 'gkadtaluan nu kanu manga buku nu?” 8 Na pidtalu pan nu Musa i “Kanu entu ba na enggan kanu nu Kadenan a Mapulu sa sapu a makan nu kanu magabi na kanu mapita menem na pegken i inggay nin sa lekanu sa endaw taman i kiug'u. Kagina nakasampay sa lekanin su manga kapembuku nu sa lekanin. Ka dikena sekami i pembukuan nu ka entain kami a 'gkadtaluan nu kanu manga buku nu?”
9 Na pidtalu nu Musa kanu Harun i “Edtalu ka kanu langun nu taw a Israil i mangadap silan kanu Kadenan a Mapulu ka nakasampay su buku nilan sa lekanin.” 10 Na gagalu nu kapedtalu nu Harun kanu entu kanu manga taw na nangadap silan kanu Kadenan a Mapulu lu kanu tawan-tawan a dalepa na midsambuta demun i kinailay nilan kanu sigay nu Kadenan a Mapulu lu kanu gabun. 11 Na nia pidtalu nu Kadenan a Mapulu kanu Musa na 12 “Nakasampay sa laki su buku nu manga taw a Israil. Na nia ba i edtalu ka kanilan na ‘Kanu kadsukilep na enggan ku sekanu sa sapu a makan nu. Na kanu mapita menem na enggan ku sekanu sa pegken a makan nu sa endaw taman i kiug'u. Na kanu maya ba a ukit na katawan nu i saki su Kadenan a Mapulu a Kadenan nu.’ ”
13 Daka kanu edsukilep na nakatingguma su madakel a benal a papanuk a pugu. Na kanu mapita menem na nabalibet'a namug su pidtangenan nilan a dalepa. 14 Daka guna edtegas su namug na nakapayapat kanu lupa su mana ilu a namug. 15 Na guna mailay nu manga taw a Israil su entu na nagaip silan taman sa namakapamagidsaya silan sa “Ngin i nia ba?” Na nia pidtalu nu Musa na “Namba i pegken a inenggay nu Kadenan a Mapulu sa lekanu a makan nu. 16 Na nia atulan nu Kadenan pantag sa namba na uman i isa na kemua sa endaw bu i nasisita nin. Na iamung'in su sakambinabatan nin, na uman i sakataw na tenga sa supa.”
17 Na nangua den mambu su manga taw a Israil sa entu. Na aden kinemua sa madakel enggu aden bun kinemua sa paidu. 18 Na guna asada su kinua nilan, na su kinemua sa madakel na dala edsubela enggu su kinemua menem sa paidu na dala bun 'gkulang. Ka su nakua nilan na nangasasangan bu kanu nasisita nilan. 19 Na pidtalu bun nu Musa kanilan i “Da kanu den semama kanu temundug a gay.” 20 Ugaid'a aden bun sa kanilan i dala pakikineg kanu Musa, na guna 'gkapita na migkausang taman sa naguled su inisama nilan. Daka nalipungetan silan nu Musa. 21 Na iganat sa entu ba na uman mapita na nia bun den pegkuan nu uman i isa na u ngin bu i nasisita nilan. Na amaika pakakayang den su senang na su nangasama lu kanu lupa na 'gkangatunag.
22 Na kanu ikanem'in gay na takep i kinua nilan, sakasupa i uman i sakataw. Daka linemu kanu Musa su 'gkangaunutan nu manga taw a Israil ka inibpanun nilan su entu kanu Musa. 23 Na pinatuntayan nu Musa su entu kanilan sa “Nia kadtalu nu Kadenan a Mapulu pantag sa nan na ‘Namag a entu na Gay na Kabpangintelenen a gay a inisenggay kanu Kadenan a Mapulu. Na ilutu nu den i dait a ilutun nu, entu pan ka itagu nu su masama nu keman ka adil'u su entu sa kanu temundug a gay.’ ”
24 Na mana bun su pidtalu nu Musa kanilan na sinemama silan sa makan. Na su inisama nilan a entu kanu temundug a gay na dala 'gkausang enggu da paguled. 25 Na nia pidtalu nu Musa kanilan na “Namba i pegken nu saguna, ka saguna na Gay na Kabpangintelenen a inisenggay kanu Kadenan a Mapulu ka apia kemua kanu man na dala den matun nu. 26 Ka kanu dalem bu nu nem gay i aden makua nu kagina su ikapitu nin gay na da makua nu ka Gay nu Kabpangintelenen.”
27 Na apia ka maitu na aden bun linemiu ka nangilay kanu ikapitu nin gay ugaid'a dala nakua nin. 28 Daka nia pidtalu nu Kadenan a Mapulu kanu Musa na “Kanu basi i katelen nu semungkang kanu manga kasuguan ku enggu kanu manga atulan ku? 29 Tanudi nu, saki ba man su Kadenan a Mapulu a minenggay kanu Gay nu Kabpangintelenen. Tembu takep i inenggay ku sa lekanu a pegken kanu ikanem gay ka su ikapitu nin gay na entu ba su ibpangintelenen nu. Na dala isa bu i lemiu kanu ikapitu nin gay.” 30 Na iganat sa entu ba na 'bpangintelenen den silan uman mauma su ikapitu nin gay.
31 Na nia inibedtu nu manga taw a Israil sa kanu entu a pegken na Manna a nia nin kasela na mana pinipi a maputi a magebu enggu mamis i nanam'in. 32 Na nia pidtalu nu Musa sa kanilan na “Nia su kasuguan nu Kadenan a Mapulu, kua kanu sa tenga sa supa i kadakel'in ka itagu nu ka enggu nu makapailay kanu manga muliataw nu su inenggay ku sa lekanu a makan nu lu kanu tawan-tawan a dalepa kanu timpu a kinapaliu ku sa lekanu kanu dalepa a Egypt.” 33 Daka pidtalu nu Musa kanu Harun i kemua sekanin sa binangga ka betadan nin sa tenga sa supa a Manna ka ibetad'in kanu adapan nu Kadenan a Mapulu ka enggu makapailay kanu manga muliataw nilan. 34 Na mana bun su inisugu nu Kadenan a Mapulu kanu Musa na lu ba inibetad'u Harun kanu Kaun nu Kapasadan. 35 Na kanu dalem'u nakapatpulu lagun kanu tawan-tawan a dalepa na nia bu pegken nu manga taw a Israil na su pegken a bedtuan sa Manna taman sa kanu kinauma nilan kanu dulunan nu kalupan a Kanaan a dalepa a pedtamanan nilan.
36 (Su asadan a bedtuan sa umera na nia nin kadakel na manga tenga sa supa.)