Su Kinapangeni nu manga Taw a Israil sa Ig
17
Na ginemanat menem su manga taw a Israil kanu tawan-tawan a dalepa a Sin. Na sia kanu kabpelalakaw nilan na pakapangaut-aut silan kanu manga dalepa sia luyud kanu ngin i ipedsugu kanilan nu Kadenan a Mapulu. Nakauma silan sa dalepa a Ripidim na lu ba silan midtangen ugaid'a dala ig'u entu a dalepa. 2 Daka mimbuku silan kanu Musa sa nia nilan pidtalu na “Enggi kami sa ig a mainem'ami.” Na nia inisumpat'u Musa na “Nginan ka sia kanu pakambuku sa laki? Pembatalun nu su Kadenan a Mapulu.” 3 Na sangat a pakainem den a benal su manga taw a Israil taman sa nia nilan nakambuku kanu Musa na “Ngintu, pinasia kami nengka ebpun sa Egypt asal'a matay kami sa di kapegkainem apeg'u manga wata nami enggu su manga pangangayamen nami?” 4 Daka nangadap su Musa kanu Kadenan a Mapulu sa nia nin pidtalu na “Panun i pakaidan ku sa manga taw a nia ka mana kiugan aku nilan den mamalantay?” 5 Na nia inisumpat'u Kadenan a Mapulu kanu Musa na “Paunut ka su ped kanu 'gkangaunutan nu manga taw a Israil ka pangunanai nu su manga taw enggu pananggit ka su tungked a initapes'engka pan kanu lawas'u ig sa Nilu. 6 Na angatan ku sekanu lu kanu masela a watu lu sa palaw a Hurib. Na kanu kauma nu lu na itapes'engka su tungked lu kanu watu ka enggu lemiu su ig a mainem'u manga taw.” Na maitu den ba i pinggula nu Musa. Na nadsuliman a benal'u 'gkangaunutan nu manga taw a Israil su entu. 7 Na su entu a dalepa na binedtuan nilan sa Masa enggu Miribaa kagina lu ba mimbuku su manga taw a Israil kanu Kadenan a Mapulu enggu binatalu nilan sekanin sa nia nilan pidtalu na “Ngintu, pedtapiden tanu pamun nu Kadenan atawa ka dili den?”Su Kinambunua kanu manga Taw a Amalik
8 Na guna su lu den su manga taw a Israil sa dalepa a Ripidim na pembunun silan nu manga taw a Amalik. 9 Daka pidtalu nu Musa kanu Yusua i “Pamili ka kanu manga taw tanu ka pangunani ka silan kanu kambunua kanu manga taw a Amalik. Ka namag na lemu aku kanu untul'u palaw a iten ku su tungked'u Kadenan a inenggay nin sa laki.”
10 Na pinggula den mambu nu Yusua su pidtalu nu Musa. Inimbunua nilan den su manga taw a Amalik. Saleta na su Musa na linemu kanu untul'u palaw a kaped'in su Harun enggu si Hur. 11 Na amaika pakakayang su lima nu Musa na 'gkapasangan nu manga taw a Israil su kuntela nilan. Na amaika menem ka pakababa su lima nu Musa na 'gkapasangan silan nu manga taw a Amalik. 12 Guna su 'gkabelay den su ngelay nu Musa na kinemua su Harun enggu Hur sa watu ka pinaayan nilan sekanin lu enggu pidsambalan nilan temigel su ngelay nin taman kanu kinasedep'u senang. 13 Guna su maitu na tinalaw nu Yusua su manga taw a Amalik sa kinambunua.
14 Na pidtalu nu Kadenan a Mapulu kanu Musa i “Isulat'engka su nia a nanggula ka enggu nu di kalipatanan. Na ipabatia nengka ka asal'a makineg'i Yusua ka enggu nin 'gkatawan i ibpeden ku man mimatay su manga taw a Amalik.” 15 Na minumbal lu ba su Musa sa pegkurbanan a binedtuan nin sa “Su Kadenan a Mapulu i Pandala ku” 16 sa nia nin pidtalu na “Inikayang ku su lima ku kanu kulesi nu Kadenan a Mapulu. Su Kadenan a Mapulu na bunun nin su taw a Amalik taman den kanu manga temundug pan a muliataw nilan.”