Su Kinakakap'u Jitru kanu Musa
18
Na nakineg'i Jitru a isa a 'bpangurban kanu dalepa a Midian a panugangan nu Musa su langun nu pinggula nu Kadenan a Mapulu a su kinapaliu nin kanu manga taw nin a Israil taman den kanu Musa lu kanu dalepa a Egypt. 2-3 Saleta na kanu sia pan silan sa lalan 'bpawang sa Egypt na pinambalingan nu Musa su kaluma nin a si Zipura enggu su dua kataw a wata nin lu kani Jitru a panugangan nin ka inipatuganul'in lun pan gagalu. Na Girsuma i inibedtu nu Musa kanu kaka a wata nin a mama kagina nia nin pidtalu kanu kinambata lun na “Lapu aku kanu dalepa.” 4 Na Ilisirb menem i inibedtu nin kanu ikadua a wata nin kagina nia nin pidtalu kanu kinambata lun na “Su Kadenan nu kalukesan ku i tinemabang sa laki ka inilipuas aku nin kanu sundang'u Piraun.”5 Na pibpawangan ni Jitru su mamanugang lun a su Musa a kaped'in su kaluma nu Musa enggu manga wata nu Musa lu kanu tawan-tawan a dalepa a masiken kanu palaw nu Kadenan. 6 Na pinasabutan bun ni Jitru kanu Musa i pakauma sekanin a kaped'in su kaluma enggu su dua kataw a wata a mama nu Musa 7 tembu inalaw nu Musa silan. Na sinugiudanc nu Musa su panugangan nin enggu sinium'in, entu pan ka nagidsaya silan u ngin i betad'u uman i isa. Daka tinemalus silan kanu tuleda a pegkakalebenan nin. 8 Na pidsinantal'u Musa kani Jitru su langun nu pinggula nu Kadenan a Mapulu kanu Piraun taman kanu manga taw a Egypt sabap kanu manga taw a Israil. Na pidtalu bun nu Musa u ngin i kapasang'u natala nilan kanu timpu a sia silan sa lalan enggu panun i kinalipuas'u Kadenan a Mapulu kanilan. 9 Na napia a benal i ginawa ni Jitru kanu langun nu mapia a pinggula nu Kadenan a Mapulu kanu manga taw a Israil sia kanu kinapalipuas'in kanilan kanu manga taw a Egypt. 10 Na nia nadtalu ni Jitru na “Pugin su Kadenan a Mapulu a linemipuas sa lekanu kanu Piraun taman den kanu manga taw a Egypt! Pugin su Kadenan a Mapulu a napambaya-baya kanu manga taw a Israil kanu kinapangungulipen kanilan lu sa Egypt! 11 Na saguna ku pan natawan i su Kadenan besen a Mapulu i labi a barakat kanu langun nu kadenan, kagina inilipuas'in su manga taw a Israil kanu manga taw a Egypt kanu kinapakapasang'ilan kanilan.”
12 Guna su maitu na nananggit si Jitru sa ipegkurban kanu Kadenan a kurban a pedtutungen langun enggu ped pan a kurban. Daka nakauma su Harun enggu su 'gkangaunutan nu manga taw a Israil ka namagatuang silan keman kanu adapan nu Kadenan.
Su Kinapamili nu Musa sa Makatabang lun sa Kapangukum
13 Kanu temundug a gay na nangukum su Musa kanu manga taw kanu di nilan 'bpamagayunan, na pedsusukelia su manga taw sia kanu adapan nu Musa iganat sa mapita taman sa magabi. 14 Na guna mailay ni Jitru su entu na nia nin pidtalu kanu Musa na “Ngin i penggulan nengka kanu manga taw a nan? Nginan ka pebpuluan nengka i nan a galebek? Iganat sa mapita taman sa magabi na pedsusukelia bu i manga taw a nan sa leka sa kapegkukum'engka lun.” 15 Na nia inisumpat'u Musa kanu panugangan nin na “'Gkanggalebek ku i nia kagina su manga taw den i pedsupeg sa laki ka ipebpagidsa nilan u ngin i atulan nu Kadenan. 16 Ka amaika aden di nilan 'bpamagayunan na 'bpananggiten nilan sa laki ka saki i mataw lun pegkukum u entain i 'gkawagiban, entu pan ka patuntayan ku kanilan u ngin i atulan nu Kadenan kanu maitu ba a 'gkanggula.”
17 Na nia pidtalu nu panugangan nin sa lekanin na “Di nengka 'gkasugat i ukit'in. 18 Papegkapasangan nengka samba i ginawa nengka taman kanu manga taw. Di nengka man magaga i nan enggula amaika seka bu. 19 Na pakikineg ka, ka pamandun ku seka enggu su Kadenan i temapid sa leka. Patalus ka bun i kapedsupeg'engka kanu Kadenan sabap kanu manga taw a nan, idedsa nengka sa lekanin su ngin i di nilan 'bpagayunan. 20 Patalus ka bun i kabpamandu nengka kanilan pantag kanu manga atulan nu Kadenan enggu kanu manga kasuguan nin, pamandu ka bun silan u panun i kapaguyag-uyag'ilan enggu ngin i inibpaliugat a enggulan nilan. 21 Ugaid'a pamili ka sa manga taw a kasaligan a makagaga mangukum a aden gilek'in kanu Kadenan enggu di kabayadan. Umbal ka silan a 'gkaunutan kanu sangibu i kadakel'in a manga taw, atawa ka magatus i kadakel'in a manga taw, atawa ka limapulu i kadakel'in a manga taw, atawa ka sapulu i kadakel'in a manga taw. 22 Silan den i mataw mangukum kanu mangapegkag bu a di 'bpagayunan sa kanu apia ngin a kutika. Na nia nilan bu isupeg sa leka na su mangaugat bu a di 'bpagayunan. Na kanu maya ba a ukit na kalemuan ka kagina 'gkadtabangan ka nilan. 23 Na amaika unutan nengka i nia ba a bitiala ku a mana bun su kalinian nu Kadenan na di ka den kapasangan enggu makauli pan sa malilintad su manga taw.”
24 Na pinaginugutan mambu nu Musa su langun nu panduan nu panugangan nin. 25 Na namili den mambu sekanin sa manga taw a Israil a makagaga mangukum ka inumbal'in silan a 'gkaunutan kanu sangibu i kadakel'in a manga taw, su ped na kanu magatus i kadakel'in a manga taw, su ped menem na kanu limapulu i kadakel'in, enggu su ped menem na kanu sapulu i kadakel'in a manga taw. 26 Silan den i mataw mangukum kanu manga taw kanu mangapegkag bu a di nilan 'bpagayunan sa kanu apia ngin a kutika. Nia nilan bu isupeg kanu Musa na su mangaugat bu a di nilan 'bpamagayunan.
27 Guna su maitu na nagetaw den mambu su panugangan ni Musa ka minuli den lu kanu dalepa nin.