Su Palaw sa Sinai
19
Na nakadua ulan i naipus ulian nu kinaliu nilan kanu dalepa a Egypt na nakauma su manga taw a Israil kanu tawan-tawan a dalepa a Sinai 2 ulian nu kinadtangen nilan kanu dalepa a Ripidim. Na lu silan migkampu kanu ligid'u palaw na Sinai. 3 Daka tinemakedeg su Musa kanu palaw asal'a makineg'in su katigan nu Kadenan. Na nia pidtalu sa lekanin nu Kadenan a Mapulu na “Edtalu ka kanu manga taw a Israil a tupu nu Yakub i 4 ‘Saben-sabenal a nailay nu demun u ngin i kinapakaid ku kanu manga taw a Egypt. Na tiniakapan ku sekanu sa kinapananggit ku sa lekanu sia sa laki a mana su kapedtiakap 'bpananggit'u papanuk kanu manga pipis'in. 5 Na amaika saben-sabenal a unutan nu su kadtalu ku enggu enggulan nu su kapasadan ku na ibida ku sekanu kanu langun nu manusia, ka saki man i kigkuan kanu sakadunia. 6 Na baluyn ku sekanu a ikelas a bangsa enggu baluyn ku bun sekanu a 'bpamangurbana sia sa laki.’ Nia ba i edtalu ka kanu manga taw a Israil.”7 Daka mimbaba su Musa ka linimud'in su manga 'gkangaunutan nu manga taw a Israil ka pidsinantal'in kanilan su langun nu inisugu nu Kadenan a Mapulu a ipasampay nin kanilan. 8 Na isa bu i kinasumpat'ilan sa “Uway, inggulalan nami su langun nu katigan nu Kadenan a Mapulu.”
Na mimbalingan den mambu su Musa lu kanu Kadenan a Mapulu ka pidtalu nin den su sawal'u manga taw. 9 Na nia inisumpat'u Kadenan a Mapulu kanu Musa na “Mangalimbaba aku a mana makapal a gabun ka enggu makineg'u manga taw su kambitiala ku sa leka ka enggu ka nilan kapaginugutan iganat saguna.”
Su Kapedsuti nu manga Taw kanu Ginawa nilan
Na kanu kinapasampay a entu nu Musa kanu sawal'u manga taw kanu Kadenan 10 na nia pan pidtalu nu Kadenan a Mapulu kanu Musa na “Lu ka kanu manga taw ka papagadil ka silan sa kasuti nilan kanu ginawa nilan iganat saguna taman sa namag. Na edtalu ka kanilan i pamipian nilan su manga balegkas'ilan 11 ka enggu adil den silan kanu ikatelu nin gay. Kagina kanu entu ba a gay na mangalimbaba aku kanu palaw sa Sinai lu kanu kaadapan nu langun nu taw. 12 Balibeti ka sa dulunan su palaw, edtalu ka kanu manga taw i sigulun nilan i dala lemampas kanu dulunan atawa ka makakembil bu lun ka apia entain i makakembil lun na natalatantu a imatayan. 13 Ka magidsan pan i taw atawa ka binatang a makakembil lu ba na dait a imatayan sa ukit a kapamalantay lun sa watu atawa ka busugen kagina di mapakay a amin su manga nakakembil a entu. Ugaid'a amaika makineg den su uni nu tambuli a matanug na entu pan ba a mapakay a temakedeg su manga taw lu kanu palaw.”
14 Daka mimbaba menem su Musa lu kanu manga taw ka pidtalu nin kanilan i sutin nilan i ginawa nilan taman sa pipian nilan su manga balegkas'ilan 15 ka enggu adil den silan kanu ikatelu nin gay. Na dala isa bu kanilan i embalagiuma kanu kaluma nilan.
16 Na kanu mapita-pita demun kanu ikatelu nin gay na tinemalas i kilat enggu linemugung. Nabausan na makapal a gabun su palaw taman sa nakineg su matanug a uni nu tambuli. Daka kinemegkel sa gilek su manga taw lu kanu pegkampuan nilan. 17 Na pinangunanan nu Musa su manga taw sa kaliu nilan kanu pegkampuan nilan 'bpawang lu kanu kaudsadan nu palaw ka enggu nilan makineg su katigan nu Kadenan. 18 Na nabausan nu makapal a bel su palaw a Sinai kagina nangalimbaba su Kadenan a Mapulu a mana apuy a pedtapuk a mana 'gkatutung a walay. Na nakuyung sa mabagel su palaw. 19 Saleta mambu na pegkatanug-pegkatanug bun su uni nu tambuli. Daka midtalu su Musa enggu sinemumpat mambu su Kadenan a Mapulu sa mana lugung.
20 Na nangalimbaba su Kadenan a Mapulu lu kanu untul'u palaw sa Sinai, entu pan ka pinatakedeg'in su Musa 21 ka nia nin lun pidtalu na “Embaba ka, ka edtalu ka kanu manga taw i di silan lemampas kanu dulunan asal'a mailay aku nilan ka natalatantu a matay silan. 22 Na apia su manga 'bpamangurban a katatapan a pedsupeg sa laki na dait a sutin nilan i ginawa nilan, ka amaika dili na imatayan ku silan.” 23 Na nia inisawal'u Musa kanu Kadenan a Mapulu na “Di man lemampas i manga taw a entu sa kanu dulunan ka pinapatan nengka den silan sa tangkan nilan su entu kagina sinuti nengka.” 24 Na pidtalu menem'u Kadenan a Mapulu kanu Musa i “Embaba ka, ka paunut ka sia si Harun ugaid'a di a benal mapakay a itegel'u manga taw a nan i katakedeg'ilan sia asal'a mailay aku nilan, apia su 'bpamangurban na dili bun mapakay a mailay aku nilan. Ka amaika enggulan nilan su entu na imatayan ku silan.”
25 Na mimbaba den su Musa ka pidtalu nin den su entu kanu manga taw.