Su Sapulu a Kasuguan
20
Na pidtalu nu Kadenan kanu manga taw su langun nu nia: 2 “Saki su Kadenan a Mapulu a Kadenan a napaawa sa lekanu kanu dalepa a Egypt a nangungulipen sa lekanu.3 “Da kanu semimba sa apia ngin a pegkakadenanen ka saki bu i simba nu.
4 “Da kanu mangumbal sa balahala a magkakadenan nu magidsan pan i lu sa kawang-kawangan, sia sa lupa atawa ka sia kanu ig. 5 Di nu semugiudi su langun nu entu ba atawa ka masimba nu ka saki su Kadenan a Mapulu a Kadenan nu a di malilini sa aden tumpuk'in sa lekanu. Ka apia entain a taw i kemias sa laki na siksan ku taman kanu ikapat a tupu nin. 6 Ugaid'a apia entain menem i ikalimu aku nin taman sa unutan nin su manga kasuguan ku na ipagedam ku sa lekanin su tidtu-tidtu a limu ku taman den kanu ngibu-ngibuan a tupu nin.
7 “Di nu musal sa dala katagan nin su ingala ku a Kadenan nu a Mapulu ka natalatantu a siksan ku su apia entain i musal lun sa dala katagan nin.
8 “Dili nu a benal lemipatani su kasenggay nu sa laki kanu Gay nu Kabpangintelenen. 9 Kanu dalem'u nem gay na mapakay kanu a enggalebek. 10 Ugaid'a kanu ikapitu nin gay na isenggay i entu sa laki a Gay nu Kabpangintelenen. Kanu nia ba a gay na da kanu enggalebek apia su manga wata nu magidsan pan i babay enggu mama enggu su manga ulipen nu a babay-mama apeg den nu manga pangangayamen nu taman den kanu manga lapu kanu dalepa nu. 11 Ka apia saki a Kadenan a Mapulu na nakanem gay i kinapangaden ku kanu langit, kanu lupa enggu kanu lagat taman den kanu langun nu namakadalem lun, ka kanu ikapitu nin gay na nangintelenen aku. Tembu ba pinalihalan ku a Kadenan a Mapulu su Gay nu Kabpangintelenen taman sa sinuti ku.
12 “Na pagadati nu su ama nu enggu su ina nu ka amaika maitu na makapaguyag-uyag kanu sa mauget kanu kalupan a inggay ku sa lekanu.
13 “Da kanu mangimatay.
14 “Da kanu 'gkiuga.
15 “Da kanu mamanegkaw.
16 “Da kanu edsaksi sa dikena benal kanu apia entain.
17 “Di nu maginagkay u ngin i aden kanu kaped'u a mana su kaluma nin, su manga ulipen nin a mama atawa ka babay enggu su manga pangangayamen nin taman den kanu langun nu kaaden nin.”
Su Kinagilek'u manga Taw a Israil
18 Na guna nilan mailay su pedtalas a kilat enggu su matanug a lugung apeg den nu matanug a uni nu tambuli enggu su pedtapuk a makapal a bel lu kanu palaw na kinemegkel silan sa gilek tembu dala silan ubay. 19 Na nia nilan nadtalu kanu Musa na “Seka den i edtalu sa lekami ka pakikinegen nami seka. Di kami nengka den mapambitiala kanu Kadenan ka matay kami!” 20 Na nia inisumpat'u Musa kanu manga taw na “Da kanu 'gkagilek ka pembatalun kanu bu nu Kadenan asal'a kaadenan kanu na gilek sa lekanin ka enggu kanu di endusa.” 21 Na su Musa bu i sinemupeg kanu Kadenan lu kanu makapal a gabun ka su manga taw na dala silan supeg.
Su Kasuguan pantag kanu Pegkakadenanen enggu Pegkurbanan kanu Kadenan
22 Na nia pidtalu nu Kadenan a Mapulu kanu Musa na “Edtalu ka kanu manga taw a Israil i ‘Nakineg'u demun a benal su kinadtalu ku lu kanu sulega, 23 tembu ba da kanu a benal mangaden sa magkakadenan nu magidsan pan i bulawan atawa ka pilak. 24 Ka makin nia nu enggula na umbali aku nu sa pegkurbanan a lupa, ka lu aku nu ba 'gkurbani sa kurban a pedtutungen langun enggu su kurban nu a tanda kanu kinaisa nu sa laki a mana su manga bili-bili, kambing atawa ka sapi. Lu aku nu umbali kanu endaw i itutulu ku sa lekanu a kasimban nu sa laki ka lemu aku ba ka palihalan ku sekanu. 25 Na amaika umbalan aku nu menem sa pegkurbanan a watu na di nu den mapambias-biasi su entu, ka amaika pambias-biasan nu pan na di den makadait sa laki. 26 Di nu den 'bpagumbali sa panikan ka enggu di kanu den makagkadaw kanu kapanik'u.’