21
“Nia ba su atulan a edtalu ka kanu manga taw a Israil.Su manga Atulan pantag kanu manga Ulipen
2 “Amaika ka makapamasa su apia entain sa lekanu sa ulipen a pagidsan nu bun a taw a Hibru na kanu dalem'u nem lagun na enggalebek bu sekanin sa lekanu. Ugaid'a sia kanu ikapitu nin lagun na dait den a makambaya-baya sekanin sa di den nasisita a mayad pan. 3 Na amaika nia nu mapamasa i ulipen a dala kaluma nin na pambaya-baya nu sekanin sa dala bun kaluma nin. Ugaid'a amaika aden kaluma nin kanu kinapamasa nu lun na pambaya-baya nu sekanin apeg'u kaluma nin. 4 Na amaika pagkaluman nu mapulu nin su ulipen a mama taman sa makambata su kaluma nin na sia kanu kambaya-baya nin na di makaunut su kaluma nin enggu su wata nin. 5-6 Ugaid'a amaika kalilingayan nin su kaluma nin enggu su wata nin taman kanu mapulu nin na ipangimbenal'in su entu lu kanu adapan nu Kadenan ka enggu sekanin madtapik lu kanu bengawan ka asal'a kapesuan nu mapulu nin su tangila nin a tanda sa ulipen nin den sekanin taman sa taman.
7 “Na amaika 'bpasan nu ama nin su wata nin a babay ka enggu mapangungulipen na di sekanin makambaya-baya a mana su manga mama a ulipen a pinamasa. 8 Na amaika su babay ka 'bpasan ka enggu magkaluma nu mapulu nin ugaid'a di sekanin 'gkalilinian nu mapulu nin na 'gkapakayan a ipaaun sekanin kanu pagali nin. Ugaid'a di mapakay a mabpasa nu mapulu nin su babay lu kanu manga lapu kagina sekanin demun i minenda kanu babay. 9 Ugaid'a amaika su babay a pinamasa nu mapulu nin ka ipagkaluma nin kanu wata nin na makatimbang'in sa wata nin su entu a babay.
10 Na amaika mangaluma su mama sa salakaw a babay na dili nin makadtalipenda su kaenggay nin sa kauyagan, balegkas enggu su kadulug'in kanu nauna a kaluma nin. 11 Na amaika dili enggulan nu mama su entu na dait a makambaya-baya den su entu a babay sa dili den nasisita a aunen.
Su Atulan pantag kanu Makagkaid kanu Ped'in
12 “Na apia entain i makasakit taman sa makapatay kanu ped'in na dait a imatayan bun. 13 Ugaid'a amaika dikena nadtibaba su entu a kinaimatay enggu sinugutan nu Kadenan a manggula su entu na makapalalaguy su nakapatay lu kanu dalepa a itutulu ku sa lekanu. 14 Ugaid'a apia entain i masakit i ginawa nin sa ped'in taman sa matay nin sa pidtibaba nin na apia malalaguy pan sekanin lu kanu pegkurbanan sa laki na kua nu bun sekanin ka imatayi nu.
15 “Na apia entain i kasakitan nin su apia entain kanu dua a lukes'in na dait a imatayan.
16 “Apia entain bun i kuan nin su ped'in ka 'bpasan nin atawa ka pangungulipenen nin na imatayan bun. 17 Apia entain i edtalu-talu sa mawag kanu ama nin atawa ka ina nin na dait a imatayan. 18 Na amaika aden dua kataw a malimbul a mabetay nin sa watu atawa ka masuntuk'in su sakataw taman sa malepu nin ugaid'a da bun matay 19 ka migkapia bun enggu pakalakaw bun u pedtudek, na su taw a nakagkaid lun na dili masala. Ugaid'a nasisita a tuludun nin taman sa 'gkapia enggu kabayadan nin su manga gay a dala kanggalebeki nu taw a entu.
20 “Na amaika betayn nu mapulu nin su ulipen nin pagidsan pan i babay atawa ka mama taman sa matay nin semambut na dait a masiksa sekanin. 21 Ugaid'a amaika dili matay semambut su ulipen ka makagaus pan sa sagay atawa ka dua gay na dili den masiksa su mapulu kagina sekanin bun i kigkuan kanu ulipen a entu.
22 “Na amaika aden malimbul a makalalagit sa magingay taman sa makambata sa dikena nin pan timpu ugaid'a dala bun gaid kagkaidi su wata enggu su ina nin na su kaluma nu babay na dait a mapabayad sia maludep kanu atulan nu manga 'bpamangukum. 23 Ugaid'a amaika nagkaidan a benal su embatay a entu taman sa aden matay kanilan na imatayan bun su minggula sa entu. 24 Amaika aden napisek sa kanilan na piseken bun su nakagkaid kanilan. Amaika aden kagebangan kanilan na gebangan bun su nakagkaid a entu. Amaika aden nalepu sa kanilan dua pagidsan pan i lima atawa ka ay na lepun bun su lima atawa ka su ay nu nakagkaid a entu. 25 Amaika aden nalupang sa kanilan dua na lupangen bun su nakalupang a entu. Amaika aden napalian kanilan na palian bun su nakapali a entu. Amaika aden nakalisan kanilan na kalisan bun su nakakalis a entu.
26 “Na amaika betayn nu mapulu sia sa mata su ulipen nin a mama atawa ka babay taman sa mapisek na makapambaya-baya nin su entu a ulipen a bayad kanu kinapisek'in lun. 27 Na amaika kagebangan nu mapulu su ulipen nin a babay atawa ka mama na makapambaya-baya nin su entu a ulipen a bayad kanu kinagebang'in lun.
28 “Na amaika makasidung su sapi sa taw taman sa matay nin na dait a pamalantayn sa watu taman sa matay bun su sapi ugaid'a di dait a ken su sapu nin enggu su kigkuan kanu sapi na dili den masugat'a kawagib. 29 Ugaid'a amaika 'gkatawan bun nu kigkuan i 'bpanidung su entu a sapi ugaid'a dala nin lugena taman sa nakapatay na pamalantayn su sapi taman sa matay enggu imatayan bun su kigkuan lun. 30 Ugaid'a amaika ipapamangun sa lekanin su minatay nu sapi nin na di den sekanin imatayan. 31 Na amaika makapatay su sapi sa wata a mama atawa ka wata a babay na maitu bun ba i atulan nin. 32 Na amaika makapatay su sapi sa ulipen a mama atawa ka babay na su kigkuan na makabayad sa telupulu a pilak kanu kigkuan kanu ulipen enggu su sapi na pamalantayn taman sa matay.
33 “Na amaika aden kalut atawa ka kinemalut a da nin sapengi na aden naulug lu ba a sapi atawa ka kimar, 34 na su kigkuan kanu kalut na dait a bayadan nin su entu a naulug ugaid'a lekanin den su entu a naulug. 35 Amaika pinanidung'u sapi nengka su sapi nu pagubay nengka taman sa minatay na dait a 'bpasan su nanidung ka embaden su bayad'in enggu embaden bun su sapu nu nasidung a sapi. 36 Ugaid'a amaika natawan bun danden i 'bpanidung su entu a sapi ugaid'a dala lugena nu kigkuan lun na kasambian nin su minatay a sapi ugaid'a lekanin den su minatay a sapi.