Su manga Atulan pantag kanu Kaaden
22
“Amaika aden manegkaw sa sapi atawa ka bili-bili ka sumbalin nin atawa ka 'bpasan nin na kasambian nin sa makalima matakep su sapi, na su bili-bili menem na makapat matakep. 2 Na amaika sia kanu magabi ka aden makaludep kanu walay a 'bpanegkaw enggu masigkem taman sa matay sekanin na di masugat'a kawagib su nakapatay lun. 3 Ugaid'a amaika manggula i nia sa kanu malamag na masugat'a kawagib su nakapatay lun. Na su tanegkawn menem a masigkem na nasisita a kabayadan nin su langun nu pinanegkaw nin, na amaika di nin magaga mamayad na sekanin i mabpasa a makabayad kanu pinanegkaw nin.4 “Na amaika su pinanegkaw nin magidsan i sapi, kimar atawa ka bili-bili ka lu pamun sa lekanin na dait a kabayadan nin sa takep.
5 “Na amaika makabukawa su pangangayamen enggu makabinasa kanu pamumulanen apeg'u kauyagan nu ped a taw na kabayadan nu kigkuan kanu ayam su nabinasa nu ayam'in. Nia nin lun makabayad na su mapia den sa langun kanu pamumulanen nin.
6 “Na amaika aden namidsul a nakalalagit'in matutung su pamumulanen nu ped a taw taman sa naibped su langun nu lu sa benday na dait a kasambian nu namidsul su langun nu entu.
7 “Amaika aden mapatagu sa kuleta atawa ka igagama kanu pagubay nin ka mapanegkaw su entu na amaika masigkem su nanegkaw na kabayadan nin sa takep. 8 Na ugaid'a amaika su nanegkaw ka dala masigkem na su sinaligan a entu na dait a madtapik lu kanu 'bpamangukum ka enggu nin makadsapa kanu adapan nu Kadenan a Mapulu i sabenal-sabenal a dala lakit lambay nin kanu entu a natadin. 9 Na amaika ka aden magagawa kanu manga natadin a pangangayamen atawa ka igagama enggu balegkas na makadsapa silan sia kanu adapan nu Kadenan. Na entain i katumanan sa 'bpangagaw na sekanin i makabayad lu kanu kigkuan sa makadua matakep.
10 “Na amaika aden inipatuludu a kimar, sapi, bili-bili atawa ka apia ngin a pangangayamen a natadin atawa ka nalepu enggu minatay ugaid'a dala nakailay kanu entu a nanggula, 11 na su tinemuludu na edsapa kanu Kadenan a Mapulu sa saben-sabenal a dala lekanin sa entu. Na su kigkuan kanu pangangayamen na dait a maginugut sekanin enggu di den kabayadan nu tinemuludu su pangangayamen a entu. 12 Ugaid'a amaika pinanegkaw su entu a pangangayamen na kabayadan nu tinemuludu lun. 13 Na amaika nia lun nakapatay i talaw a binatang na dait a edtapik su tinemuludu lun sa amadan a makapailay nin ka enggu dili sekanin makapamayad.
14 “Amaika aden sinemembay sa pangangayamen kanu pagubay nin ka nalepu atawa ka minatay nin sa dala lu su kigkuan lun na kabayadan nu sinemembay su entu. 15 Ugaid'a amaika lu bun su kigkuan lun na dili den makabayad labi den u inalkilan su entu ka su alkila nin i mabaluy a bayad'in.
Su Ped pan a manga Kasuguan nu Kadenan a Mapulu
16 “Amaika aden mama a malilini sa laga taman sa dulugen nin na nasisita a kasunggudan nin enggu magkaluma nin. 17 Ugaid'a amaika dili miug su ama nu babay sa mapangaluma su wata nin na masala su mama sa endaw i alaga nu sunggudan.
18 “Na su manga 'bpamangalintaw na dait a imatayan. 19 Na apia entain i imbalagiuma nin su manga pangangayamen na dait a imatayan. 20 Na apia entain i 'gkurban kanu pegkakadenanen na dait a imatayan ka su Kadenan bu a Mapulu i dait a pegkurbanan.
21 “Dili nu mameges su manga lapu kanu dalepa nu ka nia nu pamikil na nakalapu kanu bun kanu dalepa a Egypt.
22 “Dili nu mameges su manga balu enggu su manga taw a ilu 23 ka amaika pamegesen nu silan sa apia ngin a ukit, ka mangeni silan sa laki sa tabang na nasisigulu a pakikinegen ku silan. 24 Na kalipungetan enggu imatayan ku sekanu sia makanggulalan sa kambunua nu. Mabalu su kaluma nu enggu mailu bun su manga wata nu.
25 “Amaika makapautang kanu sa kanu pagidsan nu bun a taw a Hibru a miskinan na dili nu den milingi su galebekan nu pabpagutang sa 'bpagiseg. 26 Na amaika su pagubay nengka a entu ka nia nin makadtudtud sa leka na su lambung'in na imbalingan nengka sa di pan makasedep su senang. 27 Kagina entu bu ba i lambung'in a makabaus'in kanu lawas'in kanu magabi. Na amaika di nengka imbalingan ka mangeni sekanin sa tabang sa laki na tabangan ku sekanin kagina sangat man a malimu aku.
28 “Na di ka semakutu su Kadenan enggu da ka edtalu sa mawag kanu 'gkangaunutan nu dalepa nengka.
29 “Di ka lemipatani su umuna ku a ebpun kanu manga mapia a unga nu sabpet'u. Iumun nu sa laki su kaka sa langun a wata nu a mama. 30 Igkurban nu bun sa laki su muna-muna a pipis'u langun nu sapi, kambing enggu bili-bili nu. Pitu gay bu i kadtangen nin lu kanu ina nin ka kanu ikawalu nin gay na inggay nu den sa laki.
31 “Inisenggay kanu den a mabaluy a taw ku. Tembu da kanu a benal keman sa kanu sapu nu pangangayamen a inimatayan nu manga talaw a binatang. Na ipakan nu den kanu manga asu.