Su manga Atulan pantag kanu manga Kawagib
23
“Da kanu mamanudtul sa dikena benal. Da kanu edtitigus sa dikena benal asal bu na katampilan nu su taw a dupang.2 “Da kanu magigiamung kanu galebekan a dikena mapia kanu madakel a taw. Amaika edtitigus kanu sa bitiala na di ka migkug su bantang asal bu na lu ka makaluyud kanu kadakelan. 3 Di nu temampili su manga taw a miskinan sabap bu kanu kamiskin nilan.
4 “Amaika mailay nu a nakabukawa su sapi atawa ka kimar'u kuntela nengka na dait a isigkil'engka lu sa lekanin. 5 Amaika mailay nengka a matunggad su kimar'u kuntela nengka sabap kanu 'bpananggiten nin na dili nu mapadtaday ka makin nu edtabangi.
6 “Sigulu nu i makaenggay su kawagib'u manga miskinan sia kanu kakukum lun. 7 Da kanu manendit sa dikena benal. Da kanu mimatay sa taw a dikena 'gkabenalan ka siksan ku i apia entain a enggula sa entu.
8 “Sia kanu kakukum'u na da kanu mapabayad ka entu ba i sabapan a makadapeng kanu mata nu 'gkangaunutan sa kailay nilan kanu ngin i benal enggu pakapelen sa kaenggay sa kawagib kanu manga taw a pakabenal.
9 “Di nu mapakapasangi su manga lapu, ka nagedam'u bun u panun i kapasang'u kandilapu ka sekanu na nakandilapu kanu bun lu kanu dalepa a Egypt.
Su manga Atulan pantag kanu Gay enggu Lagun nu Kabpangintelenen
10 “Na kanu dalem'u nem lagun na makapangangawid kanu taman sa makasabpet kanu. 11 Ugaid'a kanu ikapitu nin lagun na padtaday nu muna su 'bpangangawidan nu ka da kanu pan 'bpangangawid. Na amaika aden metu lu kanu inawidan nu na padtaday nu den a makua nu manga miskinan asal'a makapaguyag'ilan, na amaika aden nadsama na padtaday nu den a makan nu manga talaw a binatang. Na maitu bun ba i pakaidi nu kanu manga pamumulan nu a ubas enggu ulibus. 12 Na enggalebek kanu kanu dalem'u nem gay ugaid'a kanu ikapitu nin gay na pangintelenen kanu ka enggu makapangintelenen bun su manga sapi, kimar apeg'u manga ulipen nu enggu su manga lapu a kaped'u sa kapegkakaleben. 13 Paginuguti nu su langun nu kadtalu ku sa lekanu. Da kanu mangeni-ngeni kanu manga pegkakadenanen enggu apia su kapamelabit'u lun na di nu enggula.
Su Telu Timan a Kanduli
14 “Idsela-sela nu su telu timan a kanduli nu sa laki kanu dalem'u salagun 15 a mana su Kanduli nu Pan a Dala Pakembang'in sia luyud kanu ngin i kasuguan ku sa lekanu. Na kanu dalem'u pitu gay na kan kanu sa pan a dala pakembang'in. Inggulalan nu i nia sia kanu initandu ku a gay kanu ulan-ulan nu Abib. Kagina entu ba su ulan-ulan a kinaliu nu kanu dalepa a Egypt. Na nia dait na uman i isa sa lekanu na mananggit sa makagkurban nin sa laki. 16 Idsela-sela nu bun su Kanduli nu Muna-muna a Masabpet'u kanu pinangangawidan nu kanu dalem'u salagun. Na idsela-sela nu bun su Kanduli nu Mauli a Masabpet'u kanu dalem'u salagun amaika malimud'u den su langun nu nasabpet. 17 Na uman lagun na dait na makatalabuk su langun nu mama kanu telu timan a nia a kanduli a simba nu sa laki a Kadenan nu a Mapulu.
18 “Na amaika 'gkurban kanu sa laki sa lugu na di nu munuti sa apia ngin a aden pakembang'in. Na da kanu semama kanu temundug a gay sa kasebudan nu manga pangangayamen a inigkurban kanu kanduli sa laki. 19 Pananggit'u lu kanu walay nu Kadenan nu a Mapulu su mapia sa langun kanu muna-muna a unga nu masabpet'u.
“Di nu lemabuani su pipis a kambing kanu gatas'u ina nin.a
Su Pasad'u Kadenan sa Kakua kanu Kalupan nu Kanaan
20 “Ilay ka Musa, sugun ku su malaikat san sa lekanu ka enggu kanu nin kapangunanan enggu katiakapan sa kanu kaangay nu kanu dalepa a inadil ku sa lekanu. 21 Na pakikineg ka sekanin enggu unuti ka su kadtalu nin. Di ka sekanin semungkang ka su langun nu penggulan nin na sia ganat sa laki, na amaika makandusa kanu na siksan kanu nin. 22 Amaika pamakikinegen nengka sekanin sa mapia enggu enggulan nengka su langun nu edtalun ku na saki i maninindeg sa lekanu lu kanu manga kuntela nu. 23 Tapiden kanu nu malaikat ku sa kaangay nu kanu kalupan nu manga taw a Amur, manga taw a Hit, manga taw a Piris, manga taw a Kanaan, manga taw a Hib enggu manga taw a Hibus. Na binasan ku silan langun. 24 Na amaika lu kanu den na da kanu semimba kanu pegkakadenanen nilan apia su kapamagigiling'u kanu penggulan nilan. Ka makin binasa nu langun su pegkakadenanen nilan enggu lupet-lupet'u su manga watu a pinatindeg'ilan a masimba nilan. 25 Saki i simba nu a Kadenan nu a Mapulu ka enggan ku sekanu sa makan nu enggu mainem'u. Itangka ku sekanu kanu manga sakit. 26 Na dala babay a kaawan na kagingayan enggu dili makambata kanu dalepa nu enggu pagkalendun ku bun su manga umul'u. 27 Pakagilekan ku enggu bulibugen ku su langun nu taw a kauman nu a magkuntela nu taman sa makapalalaguy silan. 28 Pakagilekanb ku su manga taw a Hib, su manga taw a Kanaan enggu su manga taw a Hit ka enggu silan makaawa. 29 Ugaid'a kanu dalem'u salagun na dili ku pan silan paawan langun ka enggu dili makadtaday su kalupan enggu di 'gkadakel su manga talaw a binatang. 30 Edtatagituan ku i kapaawa ku kanilan taman sa sekanu i 'gkadakel enggu makua nu su entu a kalupan. 31 Na nia mabaluy a sakup'u na iganat sa kanu Maliga a Lagat enggu lu kanu lagat'u Miditiranianc taman den lu kanu tawan-tawan a dalepa enggu kanu lawas'a ig'u Yupratis. Ipatalaw ku sa lekanu enggu paawan ku su langun nu pegkakaleben kanu entu a dalepa. 32 Na da kanu mumbal sa kapasadan kanilan enggu kanu manga pegkakadenanen nilan. 33 Di ka silan semuguti sa makagkakaleben silan kanu kalupan nu ka makandusa kanu sa laki kagina makalalagit kanu kanu kapedsimba nilan kanu manga pegkakadenanen nilan. Na amaika maitu na masela a kabinasan i entu sa lekanu.”