Su Kapasadan nu Kadenan a Mapulu kanu manga Taw a Israil
24
Na pidtalu nu Kadenan a Mapulu kanu Musa i “Takedeg ka sia apeg'i Harun, Nadab enggu Abihu enggu paunut ka bun su pitupulu kataw a 'gkangaunutan nu manga taw a Israil. Na simba aku nu lu kanu dikena bun gaid matangka sia. 2 Seka bu i makasupeg sa laki, ka su ped na lu bu sa mawatan. Na su madakel a taw na di mapakay a temakedeg sia.”3 Na inisampay den mambu nu Musa kanu manga taw su langun nu kadtalu nu Kadenan a Mapulu enggu su langun nu manga atulan nin. Na isa bu i kinasumpat'ilan langun sa “Paginugutan nami langun su katigan nu Kadenan a Mapulu.” 4 Daka inisulat'u Musa su langun nu pidtalu nu Kadenan a Mapulu. Na kanu mapita-pita na minumbal su Musa sa pegkurbanan lu kanu udsadan nu palaw enggu linibet'in sa sapulu enggu dua a watu a tanda kanu sapulu enggu dua a tupu nu Israil. 5 Entu pan ka sinugu nin su manganguda sa 'gkurban kanu Kadenan a Mapulu sa manga kurban a pedtutungen langun enggu 'gkurban bun sa manga mama a sapi a tanda sa kinaisa sia kanu Kadenan a Mapulu. 6 Na kinua nu Musa su sabad kanu lugu ka initagu nin kanu manga matikungkung a lampay, na su sabad menem na inipamesik'in lu kanu pegkurbanan. 7 Kinua nin su libelu nu kapasadan ka binatia nin kanu manga taw. Na nia inisawal'u manga taw na “Paginugutan nami taman sa inggulalan nami su langun nu kadtalu nu Kadenan a Mapulu.” 8 Daka kinua nu Musa su matikungkung a lampay a aden lugu nin ka inipamesik'in kanu manga taw enggu nia nin pidtalu kanilan na “Su nia ba a lugu na minilut kanu kapasadan nu Kadenan a Mapulu sa lekanu sia luyud kanu langun nu entu a kasuguan a inenggay nin.”
9 Na tinemakedeg den mambu su Musa enggu si Harun apeg'i Nadab enggu Abihu taman den kanu pitupulu kataw a manga 'gkangaunutan nu manga taw a Israil. 10 Na nailaya nilan su Kadenan a Kadenan nilan a manga taw a Israil. Na su pendampuan nin na makalagid sa watu a bilu a sapiru a mana kaliwanag'u langit. 11 Ugaid'a apia nailay nu 'gkangaunutan nu manga taw a Israil su Kadenan na dala silan matay taman sa kineman pan silan enggu mininem lu.
12 Daka pidtalu nu Kadenan a Mapulu kanu Musa i “Sia ka, ka ibpagenggay ku sa leka su maulad a watu a sinulatan ku kanu manga atulan ku enggu kasuguan ku a ipamandu nengka kanu manga taw.” 13 Na guna su maitu na linemu den kanu palaw nu Kadenan su Musa a kaped'in su pedtabang lun a si Yusua. 14 Na pinadtakena nu Musa kanu 'gkangaunutan nu manga taw a Israil i “Angapi kami nu taman sa kambalingan nami sia. Na si Harun enggu si Hur i matabun sa lekanu. Na amaika aden kamutuan nu na lu kanu 'bpawang sa kanilan.”
15 Na guna su linemu den su Musa na nabausan na gabun su palaw. 16 Ka linangkapan nu sigay nu Kadenan a Mapulu su palaw a Sinai. Na kanu dalem'u nem gay na nabausan bu na gabun su palaw. Na kanu ikapitu nin gay na tinawag'u Kadenan a Mapulu lu kanu gabun su Musa. 17 Na nailay nu manga taw a Israil su sigay nu Kadenan a Mapulu a mana 'bpangalaw-kalaw a apuy lu kanu untul'u palaw. 18 Na kanu kapedtakedeg'u Musa na nabausan sekanin na gabun. Na nakapatpulu kamagabi enggu malamag i kinadtangen nin lu kanu palaw.