Su manga Ibpagenggay a Mausal kanu Balung-balung a Tuleda a 'Bpangadapan kanu Kadenan
25
Na pidtalu nu Kadenan a Mapulu kanu Musa i 2 “Edtalu ka kanu manga taw a Israil i menggay silan sa laki sa endaw i maluwag kanu ginawa nilan. Na seka i talima kanu ibpagenggay nilan. 3 Na nia ka bu talima na bulawan, pilak enggu galang, 4 inumbal a tanul a ebpun kanu bumbul'a bili-bili a nia nin suga na bilu, lambayung enggu maliga, maitu bun su mapia a ginis enggu su pinadtatambil a bumbul'a kambing, 5 apeg'u upis'a mama a bili-bili a pidsugan sa maliga, mapia a manga upis'a binatang enggu kayu a pansiu, 6 lana a 'bpagusalen sa palitan, manga ibpanimbul kanu lana a 'bpagusalen sa kapedsuti enggu mamut a pedtutungen. 7 Maitu bun su manga palamata a watu a uniks apeg den nu manga ped a palamata a watu a ibpaneket kanu liu nu uyut a nakalapis kanu laleb'u pidsugan a balegkas'u mapulu nu 'bpamangurban enggu lu kanu untul'u salay kanu waga nu balegkas a entu.8 “Na umbal kanu sa Balung-balung a Tuleda a 'Bpangadapan nu sa laki a lu aku nu ba lalayun madtagapeda. 9 Na umbal'u su entu taman kanu langun nu igagama nin sia luyud kanu ngin i ipapata ku sa leka.
Su Kaun nu Kapasadan
10 “Paumbal ka sa Kaun nu Kapasadan a nia nu usal a kayu na pansiu. Patpulu enggu lima kapulgada i tilenduan nin enggu duapulu enggu pitu kapulgada menem i balawagan nin, na su kalambeg'in na duapulu enggu pitu kapulgada bun. 11 Na lumbus ka sa bulawan a da simbul'in su liu enggu ludep'in enggu balibeti ka bun sa pibpalasan a bulawan su manga ligid'in. 12 Pabetadi ka su pat timan a palaus'in sa malibpuluk a bulawan a mana balusu. 13 Paumbal ka bun sa manga bantial a kayu a pansiu a lumbusen sa bulawan. 14 Iselub'u su manga bantial a entu lu kanu manga malibpuluk a entu a mana balusu ka enggu masapuat. 15 Di nu den mawa su manga bantial a entu lu kanu manga malibpuluk a entu. 16 Na ibetad'engka lu ba su tebi na watu a sinulatan kanu kapasadan ku a inggay ku sa leka. 17 Umbali nu sa dapenga a bulawan a da simbul'in a patpulu enggu lima kapulgada i kalendu nin enggu duapulu enggu pitu kapulgada i kaulad'in. 18-19 Na paumbal ka bun sa dua timan a buntal'a malaikat a bulawan a aden papak'inb kanu duakambala kanu ligid'u dapeng'in. 20 Na nia dait na makadsangula su entu enggu su papak'ilan na 'gkasilungan nin su dapeng'u Kaun nu Kapasadan enggu 'gkatulungan nilan su entu. 21 Na idapeng'engka su dapeng'u Kaun nu Kapasadan amaika makabetad'engka su tebi na watu a sinulatan kanu kapasadan ku a ibpagenggay ku sa leka. 22 Na lu aku 'bpapayag sa leka kanu luk'u dua timan a buntal'a malaikat kanu untul'u Kaun nu Kapasadan ka inggay ku su kasuguan ku kanu langun nu manga taw a Israil.
Su Lamisan a Pembetadan sa Pan kanu Adapan nu Kadenan a Mapulu
23 “Paumbal ka bun sa lamisan a kayu a pansiu a nia nin kalendu na telupulu enggu nem kapulgada, sapulu enggu walu kapulgada menem i kaulad'in enggu duapulu enggu pitu kapulgada i kalambeg'in. 24 Na lumbus ka sa bulawan a dala simbul'in enggu balibeti ka bun sa pibpalasan a bulawan su manga ligid'in. 25 Lendingi nu sa pat kapulgada i kaulad'in a kayu enggu libeti ka sa pibpalasan a bulawan. 26 Na paumbali ka sa bulawan a mana balusu su pat a pisuk'u lamisan a masupeg kanu manga palaus'in. 27 Na su bulawan a entu a mana balusu a pedseluban sa bantial na nia dait na masupeg lu kanu pat kapulgada a entu a inilending. 28 Na nia dait na su manga bantial na kayu a pansiu enggu nalumbus sa bulawan. 29 Paumbal ka bun sa manga lampay enggu tagayan a bulawan a dala simbul'in. Paumbal ka bun sa manga binangga enggu ladia a bulawan a dala simbul'in a mausal kanu kurban a ipembubus.c 30 Na tatap kanu betad sa pan sia kanu adapan ku lu kanu lamisan ba a entu.
Su 'Bpametadan sa Palitan
31 “Na paumbali ka bun sa 'bpametadan sa palitan a bulawan a dala simbul'in a pibpalasan sa ulak a mimbekad. Na su 'bpaguntulan lun enggu su pibpalasan sa ulak a mimbekad na dikena pakapitas i kabpagumbal lun kanu lawas'u 'bpametadan sa palitan. 32 Na padsapaken sa nem timan a enggaga-telu timan i uman i sabala. 33 Na uman i sakasapak kanu entu na 'bpalasan sa telu timan a mana ulak a almun a mimbekad. 34 Na su lawas'u entu na 'bpalasan sa pat timan a mana ulak a almun a mimbekad. 35 Na su telu timan kanu entu a manga ulak na lu ibetad kanu atag'u uman i edsumpatan nu sapak'in. 36 Na dikena pakapitas i kabpagumbal kanu manga ulak a entu enggu kanu manga sapak'in kanu lawas'u 'bpametadan sa palitan a bulawan a da simbul'in. 37 Na paumbal ka bun sa pitu timan a palitan ka ipametad'engka lu ba asal'a katayawan su sia kanu kasangulan nin. 38 Na su ibpanipit kanu pus'u palitan enggu su pakasalulung lun na nia dait na bulawan a dala simbul'in. 39 Na nia dait na telupulu enggu lima kakilu a bulawan a dala simbul'in i mausal'u kanu kaumbal kanu 'bpametadan sa palitan apeg'u langun nu igagama nin. 40 Sigulu ka i makapaumbal'engka i nia sia luyud kanu ipebpapata ku sa leka sia kanu nia a palaw.