Su Balung-balung a Tuleda a 'Bpangadapan kanu Kadenan
26
“Na su Balung-balung a entu a Tuleda a 'Bpangadapan sa laki na nia ka lun usal na sawati a mapia a ginisa a edsugan sa tanul a bilu, lambayung enggu maliga. Paburdai ka sa pibpia-pianan a buntal'a malaikat.b 2 Na nia dait na pamagidsan su kaulad'u manga ginis. Nia nin tilenduan na sapulu enggu pat kamitru enggu nia nin menem balawagan na dua kamitru. 3 Padtatambil ka sa enggaga-lima timan su manga ginis a entu, 4 entu pan ka padtangilai ka sa ginis a nia nin suga na bilu su sakaligid kanu sakatambilan, na maitu bun ba i pakaidi ka kanu sakaligid kanu ikadua a sakatambilan. 5 Na nia dait na lima-wati i ipadtangila kanu sakaligid kanu sakatambilan, maitu bun ba i pakaidan kanu ikadua a sakatambilan enggu nia dait na nakadsangula su inipadtangila kanu sakatambilan lu kanu inipadtangila kanu ikadua a sakatambilan. 6 Paumbal ka bun sa lima-wati a sangkatan a bulawan a makapadsumpat kanu dua timan a entu a pinadtatambil a manga ginis. Na kanu maya ba a ukit na makadsumpat su entu ka enggu masatiman su manga ginis'u Balung-balung a Tuleda a 'Bpangadapan sa laki.7 “Paumbali ka bun sa sawati enggu isa a ginis a ebpun sa bumbul'a kambing a makalapis kanu mapia a entu a ginis'u Balung-balung a Tuleda. 8 Na nia tilenduan nu uman i satiman kanu entu na sapulu enggu lima kamitru enggu nia nin menem balawagan na dua kamitru. 9 Na padtatambil ka bun su lima timan kanu entu a ginis a ebpun sa bumbul'a kambing enggu su nem timan menem a nasama na padtatambilen bun ugaid'a su satiman kanu nem timan a entu a ginis na igayung lu kanu kasangulan nu Balung-balung a Tuleda enggu lepin su entu. 10 Padtangilai ka bun sa lima-wati a ginis su sakaligid kanu sakatambilan, na maitu bun ba i pakaidan kanu sakaligid kanu ikadua a sakatambilan. 11 Na paumbal ka bun sa lima-wati a sangkatan a galang a makapadsumpat kanu pinadtatambil a entu a manga ginis a ebpun sa bumbul'a kambing ka enggu masatiman bu. 12 Na su subela kanu pinadtatambil a entu a ibpelapis kanu Balung-balung a Tuleda na lu patayungen sa taligkudan 13 enggu su subela menem kanu duakambala kanu lendu nu ibpelapis a enggaga-sapulu enggu walu kapulgada na lu patayungen kanu duakambala a ligid'u Balung-balung a Tuleda a 'Bpangadapan sa laki. 14 Na umani ka pamun lemapis su Balung-balung a Tuleda sa upis'a mama a bili-bili a pidsugan sa maliga enggu lapisi ka pamun sa mapia i embalangan nin a upis'a binatang.
15 “Na nia dait na su manga palaus'u Balung-balung a Tuleda na papan a kayu a pansiu. 16 Na nia kalendu nu uman i palaus a papan na lima kamitru enggu su balawagan nin menem na duapulu enggu pitu kapulgada. 17 Na uman i palaus a papan na basayan sa mana sapa i pudit'in ka enggu mapia i kakapet'in. 18 Na dua-wati i kadakel'a umbal ka a palaus a papan a binasayan i pudit'in ka ibetad lu tampal sa laya nu Balung-balung a Tuleda. 19 Na umbal ka bun sa pat-wati a udsadan a pilak a kapaudsadan kanu manga palaus a papan, dua timan a udsadan sa kanu uman i palaus. 20-21 Na maitu bun ba i pakaidan sa kanu lu tampal kanu ilud'u Balung-balung a Tuleda. 22 Na su lu menem tampal sa sedepan kanu taligkudan nu Balung-balung a Tuleda na maitu bun ba i pakaidan lun ugaid'a nem timan bu a palaus a papan 23 ugaid'a metad bun menem sa dua timan kanu duakambala a pisuk'u taligkudan 24 a seluban sa malibpuluk a mana balusu su tampal sa pulu nin ka enggu makabpikit. 25 Tembu ba mabaluy a walu timan a palaus a papan su lu kanu taligkudan enggu sapulu enggu nem a udsadan a pilak.
26 “Umbali ka bun sa enggaga-lima timan a balawagen a kayu a pansiu su telu timan a ligid'u Balung-balung a Tuleda. Lima timan kanu tampal sa laya, 27 lima timan bun kanu tampal sa ilud enggu lima timan bun kanu tampal sa sedepan a taligkudan nu Balung-balung a Tuleda. 28 Na nia dait na su balawagen lu kanu luk na makauma kanu duakambala a ligid'in. 29 Na lumbus ka sa bulawan su manga palaus a papan a entu enggu umbal ka bun sa bulawan a malibpuluk a mana balusu a kaseluban kanu manga balawagen a linumbus bun sa bulawan.
30 “Na patindeg'u su Balung-balung a Tuleda a 'Bpangadapan sa laki sia luyud kanu ngin i inipapata ku sa leka sia kanu nia ba a palaw.
Su manga Dalinding
31 “Paumbal ka bun sa dalinding a mapia a ginis a ebpun sa tanul a bilu, lambayung enggu maliga. Paburdai ka sa pebpia-pianan a benal a buntal'a malaikat a aden papak'in. 32 Isangkat'engka su entu lu kanu sangkatan a bulawan lu kanu pat timan a palaus a kayu a pansiu a linumbus sa bulawan a pinaudsad kanu udsadan a pilak. 33 Na isangkat bun su entu a dalinding kanu atag'u sangkatan a inipadsangkata kanu muna-muna a lapis'u Balung-balung a Tuleda. Ka nia ba a dalinding i mabaluy a makapadsenggaya kanu Suti a Bilik enggu kanu Suti sa Langun a Bilik. Na su Kaun nu Kapasadan na lu ibetad kanu Suti sa Langun a Bilik, 34 entu pan ka dapengan su Kaun nu Kapasadan kanu dapeng'in. 35 Na su lamisan menem na lu ibetad kanu tampal sa ilud'u Suti a Bilik enggu su 'bpametadan menem sa palitan na lu ibetad kanu tampal sa laya nu Suti a Bilik lu kanu 'gkasangulan nu lamisan.
36 “Paumbali ka bun sa dalinding su bengawan nu Balung-balung a Tuleda sa mapia a ginis a ebpun sa tanul a bilu, lambayung enggu maliga a 'bpia-pianan i kaburda lun. 37 Na paumbal ka bun sa lima timan a palaus a pansiu a linumbus sa bulawan. Na lu nengka ba ideket su sangkatan a pedsangkatan kanu dalinding a mapia a ginis. Na su lima timan a entu a palaus na paudsad ka bun sa lima timan a udsadan a galang.