Su Pegkurbanan
27
“Paumbal ka bun sa pegkurbanan a kayu a pansiu a siyawpulu kapulgada a edsulung-sulung i kaulad'in enggu nia nin menem kalambeg na limapulu enggu pat kapulgada. 2 Pabpalasi ka sa mana sidung su pat a pisuk'in a dikena pakapitas i kabpagumbal lun sa kanu pegkurbanan enggu lumbus ka su entu sa galang. 3 Na paumbali ka bun sa 'bpametadan sa aw, ibpamala sa aw enggu matikungkung a lampay. Paumbali ka bun sa 'bpametadan sa waga na apuy enggu mana tinidur a 'bpagusalen kanu sapu nu binatang. Na su langun nu entu na galang. 4 Paumbali ka bun sa mana salalan a galang enggu paumbali ka bun sa mana balusu a galang su uman i pisuk'u pegkurbanan, 5 entu pan ka iansad su mana salalan a entu a galang lu kanu pegkurbanan. Na ikapet menem su mana balusu a galang lu kanu manga pisuk'u pegkurbanan lu tampal kanu baba nu nakabalibet lun. 6 Paumbali ka bun sa dua timan a bantial a kayu a pansiu a linumbus sa galang. 7 Na lu nengka ba iselub su manga bantial kanu manga malibpuluk a entu a mana balusu ka enggu masapuat su pegkurbanan. 8 Na nia dait na su umbalen a pegkurbanan na papan a kayu a pansiu enggu kinaung i ludep'in. Na ipaumbal'engka i nia sia luyud kanu i ipebpapata ku sa leka sa kanu nia a palaw.Su Lama-lama enggu su Alad'u Balung-balung a Tuleda a 'Bpangadapan kanu Kadenan a Mapulu
9-11 “Paumbali ka bun sa lama-lama su Balung-balung a Tuleda a 'Bpangadapan sa laki. Paumbali ka bun su entu sa mapia a ginis a ibalibet'engka lun, na su sia mag sa laya na patpulu enggu pat kamitru enggu maitu bun su sia mag sa ilud na patpulu enggu pat kamitru bun i kalendu nin. Na su palaus'in a sia mag sa laya na dua-wati enggu lumbusen su entu sa galang. Na su udsadan nin menem a dua-wati na galang a dala simbul'in. Na maitu bun ba i pakaidan kanu dua-wati a palaus'in enggu udsadan nin a sia mag sa ilud. Ugaid'a su manga sangkatan nin enggu su manga balawagen nin na pilak. 12 Na su sia menem mag sa sedepan a ginis na nia nin kalendu na duapulu enggu dua kamitru enggu ipedsangkat su entu lu kanu sawati a palaus a pebpagudsaden kanu sawati a udsadan. 13 Na nia kaulad'u lama-lama nin a sia mag sa sebangan na duapulu enggu dua kamitru. 14-15 Na su ginis a sia mag kanu kawanan nu bengawan na nem kamitru enggu tenga, maitu bun ba su sia mag sa biwang na nem kamitru enggu tenga bun. Na enggaga-telu timan i palaus'in enggu enggaga-telu timan bun i udsadan nin.
16 “Na su bengawan nu lama-lama na pabetadi ka sa mapia a ginis a manga siyawa kamitru i balawagan nin a binurdan sa tanul a bilu, lambayung enggu maliga enggu pat timan i palaus'in a pebpagudsaden sa pat timan a udsadan. 17 Na nia dait na su langun nu palaus'u lama-lama na aden sangkatan nin a pilak enggu balawagen nin a pilak, na su udsadan nin menem na galang. 18 Na su kaulad'u lama-lama na patpulu enggu pat kamitru, na su tilenduan nin menem na duapulu enggu dua kamitru. Na su kalambeg'u alad'in na subela dua kamitru enggu 'gkabalibet i entu nu manga mapia a ginis. 19 Na nia dait na su kasangkapan a katatapan a 'bpagusalen kanu Balung-balung a Tuleda na galang apeg'u manga budsud a 'bpagiketan kanu manga ginis magidsan pan i sia sa liu enggu sia sa ludep.
Su Tenggung'u Palitan
20 “Na sugu ka su manga taw a Israil sa pananggitan ka nilan sa lana nu unga nu kayu a ulibus asal'a katenggungan su palitan lu kanu Balung-balung a Tuleda ka enggu lalayun i kakaleg'u palitan 21 a lu kanu liu nu dalinding'u Kaun nu Kapasadan lu kanu Balung-balung a Tuleda a 'Bpangadapan sa laki. Na si Harun enggu su manga wata nin a mama i temuganul kanu palitan asal'a dili matay su kaleg'in kanu kalalamagan sia kanu adapan ku. Na su nia ba a atulan na dait a inggulalan nu manga taw a Israil taman kanu manga temundug pan a muliataw nilan.”