Su Balegkas'u manga 'Bpangurban
28
Na pidtalu bun nu Kadenan a Mapulu kanu Musa i “Isenggay nengka kanu manga taw a Israil su suled'engka a si Harun apeg'u manga wata nin a mama a si Nadab, Abihu, Iliasar enggu si Itamar ka enggu silan i mabaluy a 'bpamangurban sa laki.a 2 Na paumbali ka sa suti a balegkas su suled'engka a si Harun a makadait kanu galebekan nin a mapulu sa langun nu 'bpangurban. 3 Na edtalu ka kanu langun nu inenggan ku sa kategelan sa kapamanay i pamanayan nilan sa mapia a balegkas si Harun ka enggu sekanin makasenggay a mabaluy a mangurban sa laki. 4 Na nia nilan umbalen a balegkas na lambung a pibpalasan a malendu i ngelay nin enggu lambung a bilu a sepak enggu balegkas a ebpun sa tanul a bilu, maliga enggu lambayung. Umbalan nilan bun sa ilapis a mana uyut sia mag sa laleb enggu pakut, enggu umbalan nilan bun sa suleban. Umbalan nilan bun sa balegkas sa kapangurban su manga wata a mama ni Harun ka enggu silan makapangurban sa laki. 5 Na nia nilan usalen kanu langun nu entu na mapia a ginis, bulawan enggu tanul a bilu, lambayung enggu maliga.Su Pidsugan a Balegkas'u 'Bpangurban
6 “Na su pidsugan a balegkas'u 'bpangurbanb na nia dait a usalen lun na su mapia a ginis a ebpun sa tanul a bilu, lambayung enggu maliga enggu amungan bun sa bulawan. Na 'bpia-pianan a benal i kaumbal lun. 7 Pabetadi ka bun sa salay su duakambala a waga nin ka enggu makadsumpat su kasangulan enggu taligkudan nin. 8 Na pabetadi ka sa pakut a mapia bun a ginis a ebpun sa tanul a bilu, lambayung enggu maliga a amungan bun sa bulawan. 9 Na pakua ka sa dua timan a watu a uniks ka paukili ka kanu manga ngala nu wata a mama nu Israil. 10 Na nia dait na padtundug-tundugen su kaukil kanu manga ngala nilan iganat sa kaka taman sa ali. Na uman i watu na nem kataw i iukil'engka lun a ngala. 11 Na paukili ka sa mana kabpagukil'u manga panday entu pan ka edtuanganan sa bulawan 12 ka ibetad su entu lu kanu untul'u waga nu pidsugan a balegkas ka enggu mabaluy a tademan kanu manga tupu nu taw a Israil. Na kanu maya ba a ukit na lalayun madtapik'u Harun sa kanu kaadapan ku su manga ngala nilan a tademan kanilan. 13 Na nia dait na bulawan i ipaumbal'engka a tuangan, 14 maitu bun su dua timan a sinubid a bulawan a dala simbul'in ka iket'engka kanu tuangan a bulawan.
Su Pinaguyutan a Lapis sia sa Laleb
15 “Paumbali ka bun su pidsugan a balegkas sa lapis sia sa laleb a aden uyut'in a 'bpagusalen sa katuntay kanu kahanda nu Kadenan.c Na nia nilan usalen na mana bun su inusal kanu pidsugan a balegkas'u 'bpangurban a mapia a ginis a ebpun sa tanul a bilu, lambayung enggu maliga enggu amungan bun sa bulawan. Na 'bpia-pianan a benal i kaumbal lun. 16 Na nia dait a kaulad'in na siyaw kapulgada a edsulung-sulung. 17 Pabetadi ka bun sa pat kuyug a manga mapia a watu. Na nia nengka ibetad kanu muna-muna a kuyugan na su watu a rubi, tupas enggu biril. 18 Na su ikadua menem a kuyugan na nia nengka lun ibetad na su watu a imirald, sapira enggu diamanti. 19 Na su ikatelu menem a kuyugan na su watu a asintu, agat enggu amitis, 20 na su ikapat menem a kuyugan na nia nengka lun ibetad na su watu a krisulitu, uniks enggu yaspir. Na su langun nu entu na pidtuanganan sa bulawan. 21 Na su sapulu enggu dua a watu na nakaukil lun su ngala nu uman i sakataw kanu wata nu Israil a mabaluy a tademan kanu sapulu enggu dua a katupuan. 22 Na paumbal ka sa manga sinubid a bulawan a dala simbul'in. 23 Na paumbal ka bun sa dua timan a mana sising a bulawan ka ibetad'engka lu kanu pulu nu dua timan a pisuk'u lapis a aden uyut'in. 24 Na lu ba pakaiket su dua timan a entu a sinubid a bulawan. 25 Na ibpagiket bun su sabala a pusan nu entu lu kanu tuangan a bulawan a nakadeket kanu waga nu salay nu pidsugan a balegkas'u 'bpangurban. 26 Paumbali ka pamun su uyut a entu sa dua timan a bulawan a mana sising ka ibetad'engka lu kanu dua timan a pisuk'in sa baba sia tampal sa didalem. 27 Paumbal ka pamun sa dua timan pan a bulawan a mana sising a ibetad'engka menem lu kanu liwawaw nu pidsugan a balegkas lu mag kanu pulu nu pebpakutan. Na nakadtipasa sa paidu su mana sising a inibetad sia kanu pisuk sa baba nu lapis a aden uyut'in, 28 entu pan ka pabpikit ka malud sa tali a bilu su mana a entu manga sising a bulawan asal'a di 'gkiab-kiab su uyut a inilapis.
29-30 “Na amaika maitu na uman lemudep si Harun kanu Suti a Bilik sa kapangadap'in sa laki na 'gkatapik'in sia kanu laleb'in su manga ngala nu tupu nu Israil a nakabetad lu kanu lapis a aden uyut'in a tademan kanilan taman sa taman. Na ipaguyut'in bun lu kanu uyut a entu su urim enggu tumimd ka enggu nin katawan su kahanda ku kanu manga taw a Israil.
Su Ped a Balegkas'u 'Bpangurban
31 “Na aul ka bun sa lambung a bilu a sepak a 'gkalapisan nu pidsugan a balegkas'u 'bpangurban. 32 Na nia dait na aden kaseluban na ulu a linampingan asal'a dili makisi. 33-34 Na su sanggayad'in na paumbali ka sa mana manga unga na kayu a pumigranata a ebpun sa tanul a bilu, lambayung enggu maliga. Na paumbali ka bun sa tungkaling a bulawan a lu ipametad kanu pamageletan nu mana a entu unga nu kayu a pumigranata. 35 Na nia dait na iselub'i Harun i nia uman nin inggulalan su galebekan nin sia kanu adapan nu Kadenan a Mapulu ka enggu makineg su uni nu tungkaling sia kanu kaludep'in enggu kaliu nin kanu Suti a Bilik asal'a di sekanin matay.
36 “Paumbali ka bun sa paliwatu a bulawan a dala simbul'in enggu paukili ka sa kadtalu a ‘Iniumun kanu Kadenan a Mapulu.’ 37 Ibalud'engka sa tali a bilu su paliwatu a bulawan lu kanu suleban ni Harun. Na nia dait na lu sa kanu kasangulan 38 kanu pantag'u bias'u Harun. Ka entu ba i tanda sa 'gkapamawa ni Harun su apia ngin a kadusan nu manga taw a Israil sa kanu kapegkurban nilan lu kanu adapan nu Kadenan a Mapulu ka enggu nin kasuatan su kurban nilan.
39 “Na aul ka bun sa lambung a mapia i ginis'in a malendu i ngelay nin a pibpalasan, umbal ka bun sa suleban a mapia bun i ginis'in. Na maitu bun ba, umbal ka bun sa pakut a binurdan. 40 Paumbali ka bun sa lambung, suleban enggu pakut su manga wata ni Harun ka enggu silan makadait kanu suti a galebekan nilan. 41 Na iselub'engka su entu kanu suled'engka a si Harun enggu kanu manga wata nin a mama entu pan ka bubusi ka silan sa lana ka enggu makasangan den kanilan su galebekan'ilan. Iumun nengka silan sa laki a mabaluy a makapangurban kanu manga taw sia sa laki. 42 Paumbali ka bun silan sa sangiawa ka enggu di silan makagkadaw. 43 Na su langun nu entu na iselub'ilan ka enggu di silan makandusa enggu matay uman silan lemu kanu Balung-balung a Tuleda a 'Bpangadapan sa laki atawa ka semupeg kanu pegkurbanan lu kanu Suti a Bilik. Na su nia ba a atulan na dait a inggulalan ni Harun taman kanu manga temundug pan a muliataw nin.