Su Kinaumun kani Harun enggu kanu manga Wata nin a Mama sia kanu Kadenan a Mapulu
29
“Na nia ba i enggula ka kani Harun apeg'u manga wata nin a mama sia kanu kaumun nengka kanilan sia sa laki asal'a mabaluy a makapangurban sa laki. Na kua ka sa manguda a mama a sapi enggu dua timan a mama a bili-bili a dala tila nin. 2 Kua ka bun sa mapia sa langun a arina ka ilutu ka sa pan, dinangay a sinimbulan sa lana enggu dinangay a sinidsingan sa lana. Na su langun nu entu na dala pakembang'in. 3 Entu pan ka ibetad'engka kanu baskit ka edtapik ka sia sa laki apeg'u manguda a mama a sapi enggu su dua timan a mama a bili-bili.4 “Na edtapik ka si Harun apeg'u manga wata nin a mama lu kanu bengawan nu Balung-balung a Tuleda a 'Bpangadapan sa laki ka paigui ka silan. 5 Entu pan ka iselub'engka kani Harun su lambung a malendu i ngelay nin a pibpalasan, entu pan ka su lambung a bilu a sepak apeg'u pidsugan a balegkas sa tanul a bilu, lambayung enggu maliga, entu pan ka su lapis a aden uyut'in a sia sa laleb. Ibpakut'engka sa lekanin su binurdan sa mapia a pakut'u pidsugan a balegkas. 6 Na ipaselub'engka kani Harun su suleban enggu ideket lu ba su paliwatu a bulawan a dala simbul'in a tanda sa kanu kinaumun sa lekanin kanu Kadenan. 7 Na kua ka sa lana a 'bpagusalen kanu kapedsuti ka bubusi ka su ulu nin a tanda nu kinasangan ku sa lekanin. 8 Na ipambalegkas'engka bun kanu manga wata a mama ni Harun su lambung'ilan. 9 Na ibpakut'engka bun kanilan su pakut'ilan enggu iselub'engka bun kanilan su suleban nilan ka enggu silan mabaluy a 'bpangurban taman sa taman. Na kanu maya ba a ukit na kasanganan nengka si Harun apeg'u manga wata nin a mama kanu galebek'ilan.
10 “Na edtapik ka su manguda a mama a sapi lu kanu adapan nu Balung-balung a Tuleda a 'Bpangadapan sa laki ka padapeneti ka kani Harun apeg'u manga wata nin su ulu nu sapi. 11 Na entu pan ka sumbali ka su sapi lu kanu adapan ku a Kadenan nu lu kanu bengawan nu Tuleda a 'Bpangadapan nu sa laki. 12 Na kua ka sa lugu nu sapi ka tagui ka su manga sidung a lu kanu manga pisuk'u pegkurbanan. Na su manga nasama a lugu na ibubus'engka lu kanu udsadan nu pegkurbanan. 13 Na entu pan ka kua ka su langun nu kasebudan a nakabalibet kanu didalem'u tian nu sapi enggu su dua timan a kidni nin apeg'u manga kasebudan nin enggu su sapak kanu atay nin ka tutung ka langun lu kanu pegkurbanan. 14 Ugaid'a sabap sa kurban i entu kanu manga kadusan na su sapu nin menem apeg'u upis'in taman kanu manga tinay nin na lu ka tutung kanu liu nu pegkampuan nu.
15 “Na entu pan ka kua ka su satiman a mama a bili-bili ka padapeneti ka kani Harun apeg'u manga wata nin su ulu nu entu. 16 Na entu pan ka sumbali ka ka ipamesik'engka su lugu nin lu kanu embala-bala kanu pegkurbanan. 17 Na pangelet ka su bili-bili enggu pangagasi ka su manga tinay nin apeg'u manga ay nin, entu pan ka limud ka su langun nu entu apeg den nu ulu nin. 18 Na tutung ka i nia langun lu kanu pegkurbanan ka mabaluy i nia a pedtutungen a kurban a umun ku. Na su baw nu nia a pedtutungen a kurban na makasuat sa laki a Kadenan a Mapulu.
19 “Na kua ka bun su satiman pan a mama a bili-bili, ka padapeneti ka kani Harun apeg'u manga wata nin a mama su ulu nu bili-bili. 20 Na entu pan ka sumbali ka, enggu kua ka kanu lugu nin ka ikigul'engka lu kanu kawanan a atag'u tangila ni Harun apeg'u manga wata nin a mama enggu kanu kawanan a ama na lima nilan enggu ay nilan. Na su nasama kanu lugu na ipamesik'engka kanu embala-bala kanu pegkurbanan. 21 Na kua ka sa lugu a paidu lu kanu pegkurbanan ka isimbul'engka kanu lana a 'bpagusalen kanu kapedsuti, entu pan ka ipamesik'engka kani Harun apeg'u manga wata nin a mama taman kanu manga balegkas'ilan. Na kanu maya ba a ukit na makaumun den si Harun sa laki apeg'u manga wata nin a mama taman kanu manga balegkas'ilan. 22 Na entu pan ka kua ka su kasebudan nu bili-bili apeg'u kasebudan nu ikug'in taman den kanu kasebudan a nakabalibet kanu didalem'u tian nin enggu su dua timan a kidni nin apeg'u manga kasebudan nin enggu su sapak kanu atay nin. Na kua ka bun su kawanan a bubun nin kagina su bili-bili a entu na 'bpagusalen sa kapedsangan kanilan kanu galebekan nilan. 23 Na kua ka bun kanu baskit sa satiman a pan, dinangay a sinimbulan sa lana enggu dinangay a sinidsingan sa lana a da manga pakembang'in a ipegkurban sa laki a Kadenan a Mapulu. 24 Na ibetad'engka kanu palad'u lima nu Harun enggu kanu palad'u lima nu manga wata nin a mama ka ikayang'ilan su entu, ka nia ba su inipulu a kurban sa laki. 25 Na kua ka su langun nu entu a umun sa laki ka tutung ka lu kanu untul'u kurban a entu a tinutung langun a kurban. Na su baw nu nia a pedtutungen a kurban na makasuat sa laki a Kadenan a Mapulu. 26 Na kua ka su laleb'u bili-bili a tanda kanu kinasangan kani Harun ka ikayang'engka, ka nia ba su inipulu a kurban sa laki. Na nia ba i mabaluy a umun nengka.
27 “Na isenggay nengka sa laki su laleb enggu su bubun nu bili-bili a inusal kanu kinagkurban sa inipulu kanu kinasangan kani Harun enggu kanu manga wata nin a mama. 28 Na uman 'gkurban su manga taw a Israil sa kurban a tanda nu kinaisa nilan sa laki a Kadenan a Mapulu na isenggay nilan su bubun enggu laleb a umun sa laki ka entu ba i mabaluy a umun ni Harun enggu su manga wata nin a mama.
29 “Na amaika madala den si Harun na su balegkas'in kanu suti a galebek'in na lu makaenggay kanu wata nin atawa ka kanu manga temundug pan a muliataw nin a makasambi sa lekanin ka enggu nilan mambalegkas kanu kasangan sa kanilan sa galebekan. 30 Na embalegkasen nilan su entu kanu dalem'u pitu gay sa kanu kapenggulalan nilan kanu galebekan nilan kanu Kadenan a Mapulu lu kanu Suti a Bilik.
31 “Na kua ka su bili-bili a entu a inigkurban kanu kinasangan ka ilutu ka lu kanu lama-lama nu suti a Balung-balung a Tuleda a 'Bpangadapan sa laki 32 ka enggu makan ni Harun apeg'u manga wata nin a mama lu kanu bengawan nu entu su sapu nu bili-bili enggu su manga pegken a nasama kanu baskit. 33 Na silan bu a 'bpamangurban i kapakayan a keman kanu entu ba ka inisenggay su entu a kurban sa kaampun kanu manga dusa nilan sia kanu kinasangan kanilan enggu kinasuti kanilan. 34 Na amaika aden masama sa entu na kanu mapita na nia dait na tutungen ka di den mapakay a kanen nu apia entain sabap sa kurban i entu a inisenggay.
35 “Na maitu ba i enggula ka kanu Harun enggu kanu manga wata nin a mama sia kanu kasangan nengka kanilan. Na enggula ka su entu sia luyud kanu inisugu ku sa leka. Na kanu dalem'u pitu gay na sangani ka bu silan. 36 Na uman gay na sumbali ka sa sapi a kurban kanu kaampun kanu kadusan nilan enggu kanu pegkurbanan. Na sidsingi ka sa lana su pegkurbanan ka enggu mabaluy a suti. 37 Na enggula ka i nia kanu dalem'u pitu gay ka enggu mabaluy a suti sa langun su pegkurbanan, na apia ngin i makakembil lun na makasenggay kanu Kadenan a Mapulu.a
Su Uman Gay a Kapegkurban
38 “Na uman gay na nia nu igkurban na dua timan a bili-bili a nakasalagun i umul'in, 39 satiman sa kanu mapita-pita enggu satiman menem kanu kadsukilep. 40 Na su kagkurban nu kanu bili-bili kanu mapita na amungi ka sa manga sakakilu enggu tenga a mapia a arina enggu simbuli ka sa sakalitelu a lana nu ulibus. Amungi ka bun sa sakalitelu a alak a ebpun sa ig'a ubas ka namba su kurban a ipembubus. 41 Na maitu bun i iamung'engka sa kanu kagkurban nengka kanu bili-bili sa kanu kadsukilep ka umun ku su entu. Na su baw nu nia a pedtutungen a kurban na makasuat sa laki a Kadenan a Mapulu. 42 Na su nia ba a kurban a pedtutungen langun na dait a enggula nu uman-uman gay taman kanu temundug pan a manga muliataw nu. Na lu nu i nia enggula kanu ubay nu bengawan nu Balung-balung a Tuleda a 'Bpangadapan sa laki. Ka lu ku ba seka imbitiala 43 enggu 'bpayag kanu manga taw a Israil. Na sia makanggulalan kanu sigay ku na mabaluy a suti su Balung-balung a Tuleda a 'Bpangadapan sa laki. 44 Sutin ku man su Balung-balung a Tuleda a 'Bpangadapan sa laki apeg'u pegkurbanan enggu sutin ku bun si Harun apeg'u manga wata nin asal'a makapangurban kanu manga taw sia sa laki. 45 Madtagapeda aku nu manga taw a Israil enggu saki i mabaluy a Kadenan nilan. 46 Na katuntayan nilan i saki ba su Kadenan a Mapulu a napaliu sa kanilan lu kanu dalepa a Egypt a madtagapeda nilan. Saki ba su Kadenan a Mapulu a Kadenan nilan.