Su Tutungan kanu Mamut a Tutungen
30
“Paumbal ka sa tutungan a kayu a pansiu a pedtutungan kanu mamut a tutungen. 2 Na nia dait a kaulad'in na sapulu enggu walu kapulgada a edsulung-sulung. Na su kalambeg'in menem na manga telupulu enggu nem kapulgada. Na su uman i pisuk'in na 'bpalasan sa mana sidung. 3 Na lumbus ka sa bulawan a dala simbul'in su entu magidsan i sia sa untul'in enggu kanu manga ligid'in apeg'u pinabpalas sa mana sidung. Na balibeti ka bun sa pibpalasan a bulawan su manga ligid'in a mag sa pulu. 4 Na sia kanu atag'u inibalibet a bulawan kanu manga ligid'in a mag sa pulu na betadi ka sa mana balusu a bulawan a kaseluban sa bantial amaika sapuaten. 5 Na nia ka umbal a bantial na kayu a pansiu enggu lumbus ka bun sa bulawan. 6 Na lu nengka ibetad su tutungan a entu kanu liu demun nu dalinding a ginis a nakapagelet kanu nabetadan nu Kaun nu Kapasadan ka lu aku ba 'bpayag sa leka kanu dapeng'u Kaun nu Kapasadan. 7 Na sia kanu kapedtiakap'i Harun kanu manga palitan kanu uman mapita na temutung sekanin sa mamut a tutungen lu kanu pegkurbanan. 8 Na maitu bun ba i enggulan nin na temutung bun sa mamut a tutungen kanu katutud'in kanu manga palitan sa kanu kadsukilep. Na enggula nu i nia ba sia kanu adapan ku taman kanu manga temundug pan a muliataw nu. 9 Da kanu a benal 'gkurban sia ba sa salakaw a tutungen a mamut atawa ka manga unga na pamumulanen enggu manga binatang atawa ka manga kurban a ipembubus. 10 Uman salagun na limpiun ni Harun su tutungan a entu sa ukit a kakigul'in lun sa lugu kanu mana a entu manga sidung. Na nia nin ikigul lun na su lugu nu binatang a inigkurban kanu kaampun kanu kabaladusan. Na enggula nu i nia taman kanu manga temundug pan a manga muliataw nu kagina su nia a pegkurbanan na iniumun den sa laki a Kadenan a Mapulu.”Su Makaenggay nu manga Taw a Makatebus'ilan kanu Umul'ilan
11 Na pidtalu nu Kadenan a Mapulu kanu Musa i 12 “Kanu kabilang'engka kanu manga taw a Israil na uman i isa na makaenggay sa makatebus'ilan kanu umul'ilan sia sa laki ka enggu dala makatingguma kanilan a kabinasan sa kanu kinaamung kanilan milang. 13 Na uman i sakataw a mabilang'engka na nia nin makatebus kanu umul'in na manga nem kagelamus a pilak sia luyud kanu timbangan nu 'bpamangurban. Na su entu a inenggay nilan i mabaluy a kurban nilan sa laki. 14 Na su langun bu a nabilang a nia nin umul na iganat sa duapulu lagun 'bpapulu i dait a makaenggay sa entu ba. 15 Na magidsan pan i manga kawasa enggu manga miskinan na isa bu i kadakel'a makaenggay nilan ka manga nem kagelamus bun a pilak a makatebus'ilan kanu umul'ilan kanu Kadenan a Mapulu. 16 Usal ka i entu kanu manga galebekan lu kanu Balung-balung a Tuleda a 'Bpangadapan sa laki. Na su entu a ipedtebus'ilan kanu umul'ilan na maumbal a ukit sa kanu kagkalendem ku sa kanilan.”
Su Palanggan a Galang
17 Na pidtalu bun nu Kadenan a Mapulu kanu Musa i 18 “Umbal ka sa palanggan a galang enggu 'bpaguntulan lun a galang bun. Na betadi ka sa ig a kapangagasan. Na lu nengka ibetad kanu pageletan nu Balung-balung a Tuleda enggu kanu pegkurbanan lu sa lama-lama. 19 Na lu ba kemua si Harun enggu su manga wata nin a mama sa makagagas'ilan kanu ay nilan enggu lima nilan. 20-21 Uman silan lemudep lu kanu Balung-balung a Tuleda a 'Bpangadapan sa laki atawa ka semupeg lu kanu pegkurbanan ka 'gkurban silan sa laki na lu ba silan mangagas kanu ay nilan enggu lima nilan ka enggu di silan matay. Na nia dait na inggulalan ni Harun taman kanu manga temundug pan a manga muliataw nin su nia ba a atulan.”
Su Lana sa Kapedsuti
22 Pidtalu bun nu Kadenan a Mapulu kanu Musa i 23 “Kua ka sa manga mapia sa langun a ibpanimbul sa lana a nem kakilu a mira, telu kakilu a mamut a sinamun, telu kakilu bun a mapia i baw nin a mamis 24 enggu nem kakilu a kasia. Na nia dait a kinatimbang sa entu na sia luyud kanu timbangan nu 'bpamangurban. Na kua ka bun sa sakagalun a lana na ulibus.a 25 Na padsisimbul ka su entu ka umbal ka a suti a lana a mana bun su kabpangumbal'u mategel mangumbal sa kamutan. Na entu den ba i mabaluy a suti a lana 26 a ipedsuti kanu Balung-balung a Tuleda a 'Bpangadapan sa laki, su Kaun nu Kapasadan, 27 su lamisan apeg'u manga igagama nin, su 'bpametadan sa palitan taman kanu manga igagama nin, su tutungan kanu mamut a tutungen 28 enggu su pegkurbanan sa pedtutungen a pangangayamen taman kanu manga igagama nin, maitu bun ba su palanggan enggu su 'bpaguntulan lun. 29 Isenggay nengka i nia sa laki ka enggu mabaluy a suti. Na apia ngin i makakembil sa entu na makasenggay kanu Kadenan a Mapulu.
30 “Bubusi ka bun kanu lana a ipedsuti si Harun enggu su manga wata nin ka enggu makaumun sa laki a mabaluy a makapangurban. 31 Na edtalu ka kanu manga taw a Israil i ‘Nia ba su suti a lana ku, na maya ba i usal'u taman den kanu manga temundug pan a muliataw nu. 32 Na dili nu musal kanu manga taw a 'gkadsalilidan demun enggu di nu milingi i kinaumbal lun asal'a mausal'u kanu ginawa nu. Kagina su nia a lana na suti tembu itimbang'u su nia sa suti. 33 Na apia entain i mumbal atawa ka musal sa nia a dikena 'bpangurban na ipitas kanu lumpukan nu manga taw a Israil.’ ”
Su Mamut a Tutungen
34 Na pidtalu nu Kadenan a Mapulu kanu Musa i “Kua ka sa manga mamut a ibpanimbul a mana su istakti, unika, galbanu enggu kamangian a pamagidsan i kadakel'in 35 ka umbal ka a mamut a tutungen a mana bun su kabpangumbal'u mategel mangumbal sa kamutan enggu simbuli ka sa timus. Na su langun nu entu na mabaluy a sangat i kasuti nin. 36 Na su ped kanu tutungen a entu a inumbal na lupet ka ka ibetad'engka lu kanu kaadapan nu Kaun nu Kapasadan lu kanu Balung-balung a Tuleda a 'bpayagan ku sa leka. Na nia dait na itimbang'engka i nia a suti sa langun. 37 Na di nu i nia milingi mumbal a mausal'u kanu ginawa nu ka itimbang'u i nia sa iniumun sa laki a Kadenan a Mapulu. 38 Na apia entain i miling lun i nia mumbal a usalen nin a kamutan na ipitas kanu lumpukan nu manga taw a Israil.”