Su manga Pebpanday kanu Balung-balung a Tuleda a 'Bpangadapan kanu Kadenan a Mapulu
31
Na pidtalu nu Kadenan a Mapulu kanu Musa i 2 “Pinamili ku si Bisalil a wata ni Udi a apu ni Hur a ebpun kanu tupu nu Yahuda. 3 Na pinalangkapan ku sekanin kanu Ruh ku enggu inenggan ku sa tidtu-tidtu a kapegkagaga sa katuntay nin kanu langun nu galebekan 4 sa kabpanday sa manga mapia i palas'in a bulawan, pilak enggu galang 5 apeg'u kabpagukil sa watu, kayu taman den kanu langun nu embalangan na kapebpanday. 6 Na pinamili ku bun si Uhuliyab a wata ni Ahisamak a ebpun kanu tupu nu Dan ka enggu makatabang kani Bisalil. Na inenggan ku bun sa kapegkagaga su langun nu mategel sa kabpanday ka enggu nilan manggalebek su langun nu inisugu ku sa leka 7 a mana su kapatindeg kanu Balung-balung a Tuleda a 'Bpangadapan sa laki, su kabpanday kanu Kaun nu Kapasadan apeg'u dapeng'in enggu su langun nu igagama nu Tuleda 8 a mana su lamisan enggu su igagama nin, su bulawan a 'bpametadan sa palitan enggu su igagama nin, su tutungan sa mamut a tutungen 9 taman den kanu pegkurbanan kanu pedtutungen a pangangayamen enggu su langun nu igagama nin, apeg den nu palanggan enggu su 'bpaguntulan lun. 10 Na umbalen nilan bun su suti a balegkas a pembalegkasen ni Harun apeg'u pembalegkasen nu manga wata nin a mama sa kanggulalan nilan kanu kabpangurban 11 enggu su lana a 'bpagusalen sa kapedsuti taman den kanu mamut a tutungen a 'bpagusalen kanu Suti a Bilik. Na enggalebeken nilan su langun nu nia sia luyud kanu ipebpapata ku sa leka.”Su Atulan kanu Gay nu Kabpangintelenen
12 Na pidtalu bun nu Kadenan a Mapulu kani Musa i 13 “Edtalu ka kanu manga taw a Israil i inggulalan nilan su inisugu ku a Gay nu Kabpangintelenen. Na nia ba i tanda nu kapasadan tanu taman kanu manga temundug pan a muliataw nu sa saki ba man su Kadenan a Mapulu a sinemenggay sa lekanu sa mabaluy a manga taw ku. 14 Na inggulalan nu su Gay nu Kabpangintelenen kagina suti su nia. Na apia entain i di enggulalan lun ka enggalebek kanu nia ba a gay na ipitas kanu manga taw a Israil taman sa imatayan. 15 Enggalebek'u den su langun nu dait a enggalebeken nu kanu dalem'u nem gay ka su ikapitu nin gay na Gay na Kabpangintelenen a iniumun sa laki a Kadenan a Mapulu. Na apia entain i enggalebek kanu nia ba a gay na dait a imatayan. 16 Tembu sekanu a manga taw a Israil na dait a inggulalan nu su kasuguan ku sa lekanu pantag kanu Gay nu Kabpangintelenen taman den kanu manga temundug pan a muliataw nu 17 ka nia ba i tanda nu kapasadan tanu taman sa taman. Kagina kanu dalem'u nem gay na linimbag ku su langit enggu su lupa ugaid'a kanu ikapitu nin gay na nangintelenen aku.”
18 Na guna mapasad edtalu nu Kadenan a Mapulu su entu kanu Musa lu kanu palaw nu Sinai na inenggay nin kanu Musa su dua timan a tebi na watu a sinulatan nin kanu manga kasuguan nin.