Su Bulawan a Sapi
32
Na guna su da babaya makambaba su Musa kanu palaw na su manga taw a Israil na linemu silan kani Harun ka pidtalu nilan i “Umbali kami sa manga kadenan a makapangunanan sa lekitanu kagina si Musa a nangunanan sa lekitanu sa kinaliu tanu lu sa dalepa a Egypt na di tanu den katawan u ngin den i nanggula nin.” 2 Na nia inisumpat'i Harun sa kanilan na “Kua nu su manga pamalang a bulawan nu manga kaluma nu enggu manga wata nu ka it'u sia sa laki.” 3 Daka kinua mambu langun nu manga taw su manga pamalang'ilan a bulawan ka init'ilan lu kani Harun. 4 Na linimud'i Harun su langun nu entu ka tinunag'in entu pan ka inumbal'in sa mana buntal'a manguda a mama a sapi. Na nia pidtalu nu manga taw a Israil na “Nia ba su kadenan tanu a napaliu sa lekitanu a manga taw a Israil kanu dalepa a Egypt.”5 Na guna mailay ni Harun su entu na minumbal sekanin sa pegkurbanan lu kanu kasangulan nu inumbal'in a bulawan a sapi sa nia nin pidtalu na “Namag a entu na 'gkanduli tanu kanu Kadenan a Mapulu.”
6 Daka kanu mapita na mibpanay silan gemedam ka migkurban silan sa kurban a pedtutungen langun enggu su kurban a tanda kanu kinaisa nilan kanu Kadenan a Mapulu. Na kineman silan enggu namanginem taman sa midsisigalaw silan sa subela.
7 Na pidtalu nu Kadenan a Mapulu kanu Musa i “Embaba ka kagina su manga taw nengka a pinangunanan nengka sa kinaliu nilan lu sa Egypt na mindusa silan. 8 Malemu nilan gaid linipatanan su manga kasuguan ku kanilan ka minumbal silan sa pegkakadenanen a sapi ka sinimba nilan taman sa pigkurbanan nilan sa nia nilan pedtalun na ‘Nia ba su kadenan tanu a manga taw a Israil a napaliu sa lekitanu lu sa dalepa a Egypt.’ ”
9 Na pidtalu bun nu Kadenan a Mapulu kanu Musa i “Naamad ku den i kangategas'u ulu nu nia a manga taw. 10 Na padtaday aku nengka sa kapagedam ku kanilan sa lipunget ku sa kabinasa ku kanilan. Na seka taman kanu manga muliataw nengka i baluyn ku a masela a bangsa.”
11 Ugaid'a napalat-lat sa nanam su Musa kanu Kadenan sa nia nin pidtalu na “Hu Kadenan ku a Mapulu, ngintu ka ipagedam'engka su lipunget'engka kanu manga taw nengka a iniliu nengka kanu dalepa a Egypt a sia nakanggulalan kanu dala idsan nin a kapegkagaga nengka enggu kanu kabarakat'engka? 12 Na ngin den i edtalun nu manga taw a Egypt? Pinaliu nengka su manga taw nengka ka enggu nengka silan kaimatayan kanu palaw a nia ka asal'a madala den silan sa dunia? Hu Kadenan iawa nengka den su lipunget'engka, di ka den 'bpagimatayi su manga taw nengka. 13 Na tademi ka su inibpasad'engka sa mabagel kanu manga panunugun nengka a mana si Ibrahim, Iskak enggu Yakub sa pagkadakelen nengka su tupu nilan a mana bitun sa langit i kadakel'in enggu su ibpagenggay nengka a kalupan a mabpusaka nu manga katupuan nilan taman sa taman.” 14 Daka dala den patalusa nu Kadenan a Mapulu su kahanda nin a kabinasa nin kanu manga taw nin.
15 Na mimbaba den su Musa lu kanu palaw a inanggit'in su dua timan a tebi a watu a nasulatan su duakambala nin kanu kasuguan nu Kadenan. 16 Na su Kadenan a Mapulu demun i tinemebi enggu sinemulat kanu entu.
17 Na guna makineg'u Yusua su ingel'u kabpelalis'u manga taw na pidtalu nin kanu Musa i “Mana aden pembunua lu sa kampu!” 18 Na nia inisumpat'u Musa na “Dikena i nan ingel'u kinapanaban sa kapembunua atawa ka ingel'a natabanan ka nia ku 'gkakineg na ingel'a kapedsisigalaw.”
19 Na guna su masiken den su Musa lu kanu kampu, na nasandeng'in su pegkakadenanen nilan a sapi enggu su kapedsagayan nilan. Na sangat a nalipunget su Musa, daka inidtug'in su dua timan a entu a tebi a watu lu kanu udsadan nu palaw taman sa naupak su entu. 20 Daka kinua nin su sapi a inumbal'ilan ka tinutung'in enggu linupet'in ka inisambulak'in kanu ig ka inipainum'in kanu manga taw a Israil.
21 Na guna su maitu na nia nin pidtalu kani Harun na “Ngin i pinakaidan nu manga taw a nia sa leka ka nakapadtaday nengka silan sa kinandusa nilan sa tidtu-tidtu?” 22 Na nia inisumpat'i Harun na “Di aku nengka man 'gkalipungeti suled ku ka 'gkatawan nengka bun su nia a manga taw na malemu a benal endusa. 23 Pidtalu nilan sa laki i ‘Umbali kami sa kadenan a mangunanan sa lekitanu kagina di tanu den katawan u ngin den i nanggula ni Musa a nangunanan sa lekitanu kanu kinaliu tanu kanu dalepa a Egypt.’ 24 Tembu pidtalu ku sa kanilan i iten nilan sa laki su manga bulawan nilan. Na guna nilan maanggit su entu na inidtug ku lu kanu apuy na nia nin nambaluyan na sapi.”
25 Na nailay nu Musa i papedtadayn ni Harun su manga taw a di den pakadtutuganula, na sabap sa entu na nabaluy silan a 'gkatatawan nu manga kuntela nilan. 26 Guna su maitu na midtindeg su Musa kanu bengawan nu pegkampuan nilan ka nia nin pidtalu na “Apia entain i pedtampil kanu Kadenan a Mapulu na semia sa laki.” Daka su langun mambu nu tupu nu Libi na linemu sa lekanin. 27 Na nia pidtalu nu Musa kanilan na “Nia ba i katigan nu Kadenan a Mapulu a Kadenan tanu a manga taw a Israil, ‘Kua nu su manga sundang'u ka libet'u su pegkampuan tanu ka imatayi nu su manga taw a nia apia suled'u pan, pakat'u atawa ka pagubay nu.’ ” 28 Na pinggula mambu nu manga tupu nu Libi su inisugu nu Musa. Na manga telu ngibu i minatay kanu entu ba a gay. 29 Daka pidtalu nu Musa kanu manga tupu nu Libi i “Kanu nia a gay na iniumun nu den su ginawa nu kanu Kadenan a Mapulu ka apia su manga wata nu enggu su manga suled'u na pinangimatayan nu, tembu pinalihalan kanu nu Kadenan kanu nia ba a gay.”
30 Na kanu temundug a gay na pidtalu nu Musa kanu manga taw a Israil i “Nakandusa kanu sa tidtu-tidtu. Ugaid'a temakedeg aku ka mangilay aku sa ukit sa di kalu-kalu u ampunen nu Kadenan a Mapulu su kadusan nu.” 31 Na mimbalingan den mambu su Musa lu kanu Kadenan a Mapulu ka pidtalu nin i “Hu Kadenan a Mapulu, masela a kadusan i nanggula nu manga taw a nia ka nangaden silan sa pegkakadenanen nilan a bulawan. 32 Ugaid'a u mapakay bu na ampun ka den silan kanu kadusan nilan a entu, na amaika dili nengka den maampun silan na nia tinemu i punas ka den su ngala ku kanu libelu a sinulatan nengka kanu manga taw nengka.” 33 Ugaid'a nia inisumpat'u Kadenan a Mapulu kanu Musa na “Nia ku punasen i ngala nin kanu libelu ku na su apia entain i nakandusa sa laki. 34 Na ganat ka den ka pangunani ka su manga taw lu kanu dalepa a pidtalu ku sa leka, ka pangunanan kanu nu malaikat ku. Ka mauma bun i timpu a siksan ku silan sabap kanu kabaladusan nilan.”
35 Daka napatingguma su Kadenan a Mapulu sa tiuba kanu manga taw a Israil sabap kanu sapi a bulawan a inipaumbal'ilan kanu Harun.