33
Na pidtalu menem'u Kadenan a Mapulu kanu Musa i “Ganat ka sia enggu paunut ka su manga taw a pinaliu nengka ebpun kanu dalepa a Egypt ka lu kanu kanu kalupan a inibpasad ku kanu Ibrahim, Iskak enggu Yakub a inggay ku kanu manga tupu nilan. 2 Na paunan ku su malaikat sa lekanu ka enggu nin makapaawa su manga taw a Kanaan, manga taw a Amur, manga taw a Hit, manga taw a Piris, manga taw a Hib enggu su manga taw a Hibus. 3 Na lu kanu kanu kawasa a entu a kalupan ugaid'a di ku sekanu tapiden ka aden a entu na sia pan sa lalan na kaimatayan ku den sekanu sabap kanu kangategas'u ulu nu.”4 Na guna makineg'u manga taw su mapasang a katigan nu Kadenan a Mapulu na sangat a nalidu i ginawa nilan taman sa apia sakataw kanilan na dala sinemangan sa manga ipebpalas'ilan kanu lawas'ilan. 5 Ka nia ba a entu katigan nu Kadenan a ipapedtalu nin kani Musa kanu manga taw na “Mangategas man i ulu nu a manga taw ka apia man mangagan bu i katapid ku sa lekanu na matay ku man sekanu. Saguna na pukas'u su manga inipanangan nu kanu manga lawas'u ka ilayn ku pan u ngin i dait a enggulan ku sa lekanu.” 6 Daka iganat lu ba kanu palaw a Huriba na pinukas den nu manga taw a Israil su manga bulawan nilan.
Su Tuleda a Pinatindeg'u Musa lu kanu Liu nu Pegkampuan nilan
7 Na nia katatapan na papedtindeg su Musa sa tuleda lu kanu liu nu pegkampuan nilan sa dikena bun gaid matangka, na pembedtuan nin su entu sa Tuleda a Pedtalabukan kanu Kadenan a Mapulu. Na apia entain i pegkiug pedtuntay kanu kahanda nu Kadenan a Mapulu na 'bpelu ba kanu entu a Tuleda a Pedtalabukan a lu kanu liu nu pegkampuan. 8 Na uman lemu su Musa kanu Tuleda a entu na 'bpamedtindeg su manga taw lu kanu bengawan nu manga tuleda nilan ka pedtulikan nilan su Musa kanu kabpeludep'in lu. 9 Na amaika pakaludep den su Musa kanu Tuleda a entu na pembaba su mana palaus a gabun lu kanu bengawan nu Tuleda ka ipembitiala nu Kadenan a Mapulu su Musa. 10 Na uman 'gkailay nu manga taw su mana palaus a gabun kanu bengawan nu Tuleda na pedsugiud silan kanu Kadenan a Mapulu lu kanu bengawan nu manga tuleda nilan. 11 Na ipembitiala nu Kadenan a Mapulu su Musa sa mana pakapagadapa demun silan enggu mana silan 'bpakat sa kapembitiala nilan. Na amaika pembalingan su Musa kanu kampu nilan na su 'gkasaligan nin a pedtabang lun a si Yusua a wata ni Nun na pegkalidtabun kanu entu ba a Tuleda.
Su Kabpayag'u Kadenan a Mapulu kanu Musa
12 Na pidtalu nu Musa kanu Kadenan a Mapulu i “Tatap'engka pedtalun sa laki i pangunanan ku i manga taw a nia ugaid'a dala nengka pamun ipayag sa laki u entain i pabpagunuten nengka sa laki. Na pidtalu nengka bun i katawan aku nengka a benal enggu 'gkasuatan aku nengka. 13 Na u saben-sabenal a 'gkasuatan aku nengka na ipayag'engka sa laki su kahanda nengka ka enggu ku seka makilala sa tidtu-tidtu enggu kasuatan aku nengka pan a benal. Na itimbang'engka a manga taw nengka su bangsa a nia.” 14 Na nia inisumpat'u Kadenan a Mapulu na “Tapiden ku seka taman sa papangintelenen ku seka.” 15 Na nia menem inisumpat'u Musa na “Amaika di kami nengka tapiden lu na di kami den pebpagawa kanu palaw a nia. 16 Ka panun i kataw nu ped sa 'gkasuatan aku nengka apeg'u manga taw nengka amaika di kami nengka tapiden? Panun ba i kataw nilan sa inisenggay kami nengka kanu manga taw sia sa dunia amaika maitu sa di kami nengka tapiden?” 17 Na nia inisumpat'u Kadenan a Mapulu kanu Musa na “Enggulan ku su pedtalun nengka a nan sa laki kagina 'gkasuatan ku man seka enggu 'gkakilala ku a benal seka.” 18 Na nia menem inisumpat lun nu Musa na “Amaika maitu na 'bpayagi aku nengka.” 19 Na nia inisumpat'u Kadenan a Mapulu na “Ipailay ku sa leka su langun nu kapianan ku enggu ipayag ku sa leka su ingala ku a Kadenan a Mapulu. Ikalimu ku su apia entain i pegkiugan ku pegkalimu. Latan ku sa nanam su apia entain i pegkiugan ku a 'bpelatan sa nanam. 20 Ugaid'a di ku ipailay sa leka i beneng ku kagina apia entain i makailay sa laki na matay.” 21 Na nia pan pidtalu nu Kadenan a Mapulu kanu Musa na “Patindegen ku seka sia kanu watu a nia a masiken sa laki. 22 Ka sia kanu kaukit ku na iludep ku seka kanu lingkab'u watu enggu dapengan ku su entu kanu lima ku taman kanu kaukit ku. 23 Na entu pan na iawa ku su lima ku ka enggu nengka mailay su taligkudan ku ugaid'a dili mapakay a mailay nengka su beneng ku.”